ސަރަހައްދީ އެންމެ ބޮޑު ފުޓްބޯޅަ މުބާރާތް ސާފްޗެމްޕިއަންޝިޕް 2023 ގައި މިއަދު ހަވީރު ކުޅެވުނު ގްރޫޕް ބީގެ މެޗުގައި ދިވެހިރާއްޖެ އާއި ބަންގްލަދޭޝް ވާދަކުރި މެޗު 3-1 ގެ ނަތީޖާއަކުން ބަންގްލަދޭޝް ކާމިޔާބުކޮށްފި އެވެ.

މިއީ 1985 ވަނަ އަހަރު ސާފު ގޭމްސްގައި 8-0 ގެ ނަތީޖާއަކުން ދިވެހިރާއްޖެ އަތުން މޮޅުވިފަހުން ފާއިތުވެދިޔަ 37 އަހަރުތެރޭގައި ދިވެހިރާއްޖެ އަތުން ބަންގްލަދޭޝަށް ހޯދުނު އެންމެ ތަފާތުބޮޑު ނަތީޖާއެވެ.

މެޗު ފެށިގެން ދެޓީމުގެ ފަރާތުން ދާދި ހަމަހަމަ ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ދިވެހި ޓީމުންނެވެ. މި ލަނޑު ފުރަތަމަ ހާފުގެ 17 ވަނަ މިނެޓުގައި ކާމިޔާބުކޮށްދިނީ ހަމްޒާ މުހައްމަދު އެވެ. މިއީ އަލީ ފާސިރު ތަނަވަސްކޮށްދިން ފުރުސަތެއްގައި ބަންގްލަދޭޝްގެ ޕެނަލްޓީއޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

Advertisement

ފުރަތަަމަ ހާފުގެ ބޮޑުބައިގައި ރާއްޖެ ލީޑުގައި އޮވެގެން ކުޅުނު މި މެޗުގައި ބަންގްލަދޭޝް އިން މެޗުގެ ނަތީޖާ އެއްވަރުކުރި ލަނޑު ފުރަތަަމަ ހާފުގެ 41 ވަނަ މިނެޓުގައި ކާމިޔާބުކޮށްދިނީ އެޓީމުގެ ރާކިބު ހުސެއިން އެވެ. މިއީ އަރިމަތިން އެޓީމުގެ ކުޅުންތެރިއަކު ރާއްޖޭގެ ޕެނަލްޓީ އޭރިއާ ތެރެއަށް ހުރަސްކޮދިން ބޯޅައެއްގައި ޓޮޕޫ ބާމަން ބޮލުން ޖައްސާލި ބޯޅައެއް ރާއްޖޭގެ ގޯލް އޭރިޔާ ތެރޭގައި މުޅިން ހުސްކޮށް ހުރެ ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ބަންގުލަދޭޝް އިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކުރު އިރު، ރާއްޖޭގެ ކުޅުންތެރިންގެ ފަރާތުން ފެނިގެންދިޔައީ ވަރަށް ޕްރެޝަރު ގައި ކުޅެމުންދިޔަ ތަނެވެ. ފަސޭހަ ޕާސްތަކެއް ތަކުރާރުކޮށް ގެއްލުވާލަމުންދިޔައިރު، ޓީމުގެ މަސައްކަތުގެ ރޭޓު ވެސް ފެނުނީ ބަންގްލަދޭޝްގެ ގެ ކުޅުންތެރިންނަށް ވުރެ މާބޮޑަށް ވެސް ދަށްކޮށެވެ.

ބަންގްލަދޭޝް އިން މި މެޗުގައި ފުރަތަަމަ ފަހަރަށް ލީޑު ހޯދީ ދެވަނަ ހާފުގެ 67 ވަނަ މިނެޓުގައެވެ. މިއީ އެޓީމަށް ލިބުނު ކޯނަރަކުން ރާއްޖޭގެ ޕެނަލްޓީ އޭރިއާ ތެރެއަށް ހުރަސްކޮދިން ބޯޅައެއް ދިފާއުކުރަން އުޅުމުގެ ތެރޭގައި ރާއްޖޭގެ ކީއްޕަރު ހުސެއިން ޝަރީފަށް ހެދުނު ގޯހެއްގެ ފައިދާ ނަގައި އެޓީމުގެ ތާރިގު ކާޒީ ކާމިޔާބުކޮށްދިން ލަނޑެކެވެ.

މި މެޗުގައި ބަންގްލަދޭޝް އިން ކާމިޔާބުކުރި ތިންވަނަ ލަނޑު ދެވަނަ ހާފުގެ 90 ވަނަ މިނެޓުގައި އެޓީމުން އުފެއްދި ކައުންޓާ އެޓޭކެއްގައި ކާމިޔާބުކޮށްދިނީ މިޑްފީލްޑަރު ޝެކް މޮރްސަލިން އެވެ. 

މެޗުގެ ދެވަނަ ހާފުގައި ރާއްޖެ ޓީމުން އެންމެ ހުސް ފުރުސަތެއް ލިބުނީ ހަމްޒާއަށެވެ. މެޗުގެ އިތުރު ވަގުތުގެ ތެރޭގައި ބަންގްލަދޭޝްގެ ޕެނަލްޓީއޭރިއާ ބޭރުން ލިބުނު ފުރުސަތުގައި ހަމްޒާ ފޮނުވާލި ބާރު ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ. މިއާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން ބަންގްލަދޭޝް ކުރީގައި އޮވެގެންނެވެ.

މިމެޗުގެ ނަތީޖާއެކު މިގުރޫޕްގައި ބަންގްލަދޭޝް، ދިވެހިރާއްޖޭ އަދި ލުބުނާން މިއިން ކޮންމެ ޓީމަކަށް ވަނީ ތިން ޕޮއިންޓް ލިބިފައެވެ. މި ގުރޫޕްގައި މިރޭ ކުޅޭ ބޫޓާން އަދި ލުބުނާން ވާދަކުރާ މެޗުން ލުބުނާން މޮޅުވެއްޖެނަމަ އެޓީމަށް މުބާރާތުގެ ސެމީ ފައިނަލުގެ ޖާގައެއް ކަށަވަރުވެގެން ދާނެއެވެ.

މި މެޗުން ރާއްޖެ ބަލިވުމުން މިހާރު މުބާރާތުގައި އިތުރަށް ކުރިއަށް ދިއުމަށްޓަކައި ރާއްޖެއަށް އޮތް ހަމައެކަނި ފުރުސަތަކީ ގްރޫޕްގެ ފަހު މެޗުގައި ލުބުނާން ބަލިކުރުމެވެ. ނަމަވެސް މުބާރާތުގައި ދެޓީމުން ދައްކާފައިވާ ކުޅުމަށް ބަލާއިރު މިއީ ވުމަށްވުރެ ނުވުން ގާތްކަމެކެވެ.