ސާފްޗެމްޕިއަންޝިޕް ފުޓްބޯޅަ މުބާރާތުގެ ގުރޫޕް ބީގައި މިއަދު ހަވީރު ބަންގްލަދޭޝް އަތުން ބަލިވި މެޗަށްފަހު އޮތް ނިއުސް ކޮންފަރެންސް ރާއްޖޭގެ ގައުމީ ޓީމުގެ ކޯޗު ހާޒިރުނުވެ މީޑިއާއަށް ފިލައިފިއެވެ.

މިއަދުގެ މެޗަކީ 2003 ވަނަ އަހަރު ބަންގުލަދޭޝްގައި ބޭއްވުނު ސާފްޗެމްޕިއަންޝިޕް ފުޓްބޯޅަ މުބާރާތުގެ ފައިނަލުގައި ޕެނަލްޓީ ޖަހައިގެން އެޓީމު ރާއްޖޭގެ އަތުން މޮޅުވިފަހުން މި މުބާރާތުގެ މެޗެއްގައި ރާއްޖެ އަތުން ބަންގްލަދޭޝަ ހޯދި ފުރަތަަމަ މޮޅެވެ.

މީގެ އިތުރުން މިއީ 1985 ވަނަ އަހަރު ސާފް ގޭމްސްގައި ރާއްޖެ އަތުން 8-0 ގެ ނަތީޖާއަކުން މޮޅުވި މެޗަށްފަހު ފައިތުވެދިޔަ 37 އަހަރު ތެރޭގައި މިދެޓީމު ވާދަކުރި 12 މެޗުގެ ތެރެއިިން އެޓީމަށް ރާއްޖެ ކޮޅަށް ތިން ލަނޑު ކާމިޔާބުކުރެވުނު ފުރަތަަމަ ފަހަރެވެ. އަދި މި 12 މެޗުގެ ތެރެއިިން 6 މެޗުން ދިވެހި ޓީމު މޮޅުވެފައިވާއިރު ތިން މެޗު ނިމިފައިވަނީ އެއްވަރުވެގެންނެވެ. އަދި ބަންގްލަދޭޝަށް ރާއްޖެ ވަކިކުރެވިފައިވަނީ ތިން މެޗުންނެވެ. އޭގެ ތެރޭގައި 2003 ވަނަ އަހަރުގެ މުބާރާތުގެ ފައިނަލުގައި ޕެނަލްޓީ ޖަހައިގެން އެޓީމު މޮޅުވި މެޗުވެސް ހިމެނެއެވެ.

Advertisement

މި މުބާރާތުގައި މިހާތަނަށް ކުޅެވުނު ދެމެޗުގައިވެސް ރާއްޖޭގެ ޓީމުގެ ފަރާތުން ފެނިގެންދިޔަ ދަށް ކުޅުމަށް ގިނަބައެއްގެ ފަރާތުން ފާޑުކިޔުން އަމާޒުވެފައިވާއިރު، ފުރަތަަމަ މެޗުގައި ބޫޓާން އާއި ދެކޮޅަށް ކުޅުނު ކުޅުން ދިފާއުކޮށް މެޗަށްފަހު އޮތް ނޫސްވެރިންގެ ބައްދަލުވުމުގައި ކޯޗު ވާހަކަދައްކާފައެވެ. ނަމަވެސް މިއަދުގެ މެޗަށް ފަހު އޮތް ނޫސްވެރިންގެ ރާއްޖޭގެ ކޯޗު ވަނީ ބޮއިކޮޓް ކޮށްފައެވެ.