މި ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބު، އެމްޑީޕީގެ ކެންޑިޑޭޓް، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެއްބުރުން ކާމިޔާބު ކުރައްވާނެ ކަމަށާ، އެކަން ކުރައްވާނީ ހައްޖާޖީންގެ މަތިވެރި ދުޢާ ތަކާއި އެކުގައި ކަމަށް ސަރުކާރު ހިންގާ ކޯލިޝަންގައި ހިމެނޭ އަދާލަތު ޕާޓީގެ ރައީސް އިމްރާން އަބްދުالله ވިދާޅުވެއްޖެއެވެ. 

ޢިމްރާން މިއަދު ކުރެއްވި ޓްވީޓެއްގައި ވިދާޅުވީ، މިއަދަކީ ހައްޖާޖީން، ހައްޖުގެ މަތިވެރި އަޅުކަން ފަށައިގަންނަ ދުވަސް ކަމަށެވެ.

މިއާއެކު ހައްޖުގެ އަޅުކަމާއި، ރިޔާސީ އިންތިހާބާއި ގުޅުވާލަމުން އިމްރާން ވިދާޅުވީ، މި އަހަރުގެ ރިޔާސީ އިންތިހާބު، އަދާލަތު ޕާޓީން ތާއީދުކުރާ ކެންޑިޑޭޓް، ރައީސް ޞާލިހު، ކާމިޔާބު ކުރައްވާނީ، ހައްޖަށް ވަޑައިގެން ތިއްބެވި އެންމެހާ އަޚުންނާއި އުޚުތުންގެ މަތިވެރި ދުޢާ ތަކާއިވެސް އެކުގައި ކަމަށެވެ. 

Advertisement

"މި އަހަރުގެ އިންތިޚާބު އަޅުގަނޑުމެން އެއްބުރުން ކާމިޔާބު ކުރާނީ، އިރާދަކުރެއްވިޔާ، ހައްޖަށް ވަޑައިގެންވާ، އަޅުގަނޑުމެންގެ ލޮބުވެތި އަޚުންނާއި އުޚުތުންގެ މަތިވެރި ދުޢާ ތަކާއި އެކުގައެވެ." އިމްރާން ވިދާޅުވިއެވެ. 

ރިޔާސީ އިންތިހާބު ބޭއްވުމަށް ގާތް ގަނޑަކަށް ދެމަސް ދުވަހަށް ވެފައިވާއިރު، އެ އިންތިހާބު ރައީސް ޞާލިހު ކާމިޔާބު ކުރައްވާނެ ކަމަށް މިއަހަރުގެ އިންތިހާބުގައި ވެސް އެމްޑީޕީއާއި އެކު ކޯލިޝަން ހަދާފައިވާ އަދާލަތު ޕާޓީން އަންނަނީ ބުނަމުންނެވެ. 

އެގޮތުން، އެ ޕާޓީއާއި ކޯލިޝަން ހަދާފައިވާ އެމްޑީއޭ އާއި، އަދާލަތު ޕާޓީއާއި، އެމްޑީޕީއަށް އޮތް ތާއީދަށް ބައްލަވައި ހިސާބު ޖެއްސެވުމަށްފަހު އިމްރާން ވަނީ، %51 އަށްވުރެ ގިނަ ވޯޓާއި އެކު އިންތިހާބު އެއްބުރުން ކާމިޔާބު ކުރައްވާނީ ރައީސް ޞާލިހް ކަމަށް ވިދާޅުވެފައެވެ. 

އެހެން ނަމަވެސް، ރައީސް ޞާލިހުގެ ވެރިކަން ނިމުމަކަށް ގެނައުމަށް، އިދިކޮޅު، ޕީޕީއެމް/ޕީއެންސީ ކޯލިޝަނާއި، ރައީސް ނަޝީދުގެ ދަ ޑިމޮކްރެޓްސް އާއި، ޖުމްހޫރީ ޕާޓީގެ އިތުރުން އެމްއެންޕީން ވެސް ވަނީ އެކުގައި މަސައްކަތް ކުރުމަށް ނިންމާފައެވެ.