ޒަމާންވީ އާއިލީ ބާރާއި ކަސްތޮޅުން އެމްޑީޕީ މިނިވަން ވެއްޖެ ކަމަށް އައްޑޫ ސިޓީގެ މޭޔަރ އަލީ ނިޒާރު ވިދާޅުވެއްޖެއެވެ.

އަލީ ނިޒާރު މިހެން ވިދާޅުވީ އެމްޑީޕީ އަށް 18 އަހަރު ފުރުން ފާހަގަ ކޮށް ޕާޓީގެ މެމްބަރުންނަށް ތަހުނިޔާ ދަންނަވައި ކުރެއްވެވި ޓްވީޓެއްގައެވެ.

"ޒަމާންވީ އާއިލީ ބާރާއި ކަސްތޮޅުގެ ސަގާފަތުން މިނިވަންވެފައިވާ ފުރަތަމަ ސިޔާސީ ފިކުރަކަށް އެމް.ޑީ.ޕީ ހަދާލެވިފައި ވުމާއި އެކު ، ޕާޓީގެ މުސްތަގްބަލް ފެންނަނީ ކުރިއަށްވުރެ އުޖާލާކޮށް" ނިޒާރު ވިދާޅުވެފައިވެއެވެ.

Advertisement

ނިޒާރު މިހެން ވިދާޅުވެފައިވާއިރު އެމްޑީޕީ އުފެއްދި ހިސާބުން އެމްޑީޕީ އަށް އެތައް މަސައްކަތެއް ކޮށްދީފައިވާ ދުވަސްވީ މެމްބަރުންތަކެއް ވަނީ އެމްޑީޕީ އިން ވަކިވެގެން ގޮސްފައެވެ.

އޭގެ ތެރޭގައި އެމްޑީޕީގެ ރައީސްގެ މަގާމުގައި ހުންނެވި މުޙައްމަދު ނަޝީދާއި، އެމްޕީ އީވާ އަބްދުالله އާއި، އެމްޕީ އިލްޔާސް ލަބީބް، އެމްޕީ ހަސަން ލަތީފް އަދި އެމްޕީ ހަސަން އަފީފް ފަދަ ބޭފުޅުން ހިމެނެއެވެ.

އެބޭފުޅުން އެމްޑީޕީ ދޫކުރައްވާ މިހާރު މަސައްކަތް ކުރައްވަމުން ގެންދަވަނީ މުޅިން އައު ޕާޓީއެއް އުފެއްދެވުމަށެވެ. އެގޮތުން ދަ ޑިމޮކްރެޓްސްގެ ނަމުގައި އުފައްދާ މި ޕާޓީ އުފެއްދުމަށް ބާއްވަން ޖެހޭ ޖަލްސާ ބޭއްވުމުގެ ހުއްދަ ދިނުމަށް ނިންމައިފައިވާ ކަމަށް އީސީގެ ނައިބުރައީސް އިސްމާއިލް ޙަބީބް އިއްޔެ ވަނީ ވިދާޅުވެފައެވެ.