އިގިރޭސި ޕްރެމިއާ ލީގުގެ ލިވަޕޫލަށް ކުޅެމުންދިޔަ ބްރެޒިލްގެ ފޯވާޑް ރޮބާޓޯ ފިރްމީނޯ އެޓީމު ދޫކޮށް ސައުދީ ޕްރޮފެޝަނަލް ލީގުގެ އަލް އަހްލީއަށް ބަދަލުވުމަށް އެއްބަސްވެފައިވާކަމަށް މީޑިއާ ރިޕޯޓްތައް ބުނެފިއެވެ.
2015 ވަނަ އަހަރު ޖަރުމަނުގެ ހޮފެންހައިމް އިން 29 މިލިއަން ޔޫރޯގެ ޓްރާންސްފާ ފީއެއްގައި ލިވަޕޫލަށް ބަދަލުވި ފޯވާޑް ލިވަޕޫލް އާއިއެކު ހަދާފައިވާ އެއްބަސްވުން މިދިޔަ ސީޒަނުގެ ނިޔަލަށް ވަނީ ހަމަވެފައެވެ. އަދި މިއާއެކު ޔޫރަޕުގެ ބައެއް ބޮޑެތި ޓީމުތަކުން ދިޔައީ އޭނާ ސޮއި ހޯދުމަށް މަސައްކަތް ކުރަމުންނެވެ. އޭގެތެރޭގައި ސްޕެއިންގެ އެންމެ ވާދަވެރި ދެ ކުލަބު ކަމަށްވާ ރެއާލް މެޑްރިޑާއި ބާސެލޯނާ ވެސް ހިމެނެއެވެ.
ފިރްމީނޯ ވަނީ ލިވަޕޫލްގައި ހޭދަކުރި 8 އަހަރުތެރޭގައި އެޓީމަށް 256 މެޗު ކުޅެދީ 82 ލަނޑު ކާމިޔާބުކޮށްދީފައެވެ. މީގެ އިތުރުން އޭނާ ވަނީ ލިވަޕޫލާއި އެކު ޕްރެމިއާ ލީގު، އެފްއޭ ކަޕް، ލީގު ކަޕް، ޔުއެފާ ސުޕަ ކަޕް، ޔުއެފާ ޗެމްޕިއަންސްލީގުގެ އިތުރުން ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.
މީޑިއާ ރިޕޯޓްތައް ބުނާ ގޮތުގައި އުމުރުން 31 އަހަރުގެ ފިރްމީނޯ އަލް އަހްލީއަށް ބަދަލުވާން އެއްބަސްވެފައިވަނީ ފްރީ ޓްރާންސްފާއެއްގައެވެ.
Advertisement
This content is created and paid for by advertisers and does not involve Voice Journalists
