މިނިވަން ދުވަހުގެ މުނާސަބަތުގައި ފޮޓޯ ނެގުމުގެ މުބާތާތެއް ބޭއްވުމަށް ދާޚިލީ ވުޒާރާއިން ނިންމައިފިއެވެ.

އެވުޒާރާއިން ވަނީ މިހާރު އެމުބާރާތުގައި ބައިވެރިވުމުގެ ފުރުސަތު ހުޅުވާލައިފައެވެ.

އެވުޒާރާއިން ބުނެފައިވަނީ މިއަހަރުގެ މިނިވަން ދުވަސް މުޅިރާއްޖޭގައި ކުލަގަދަކޮށް ފާހަގަކުރުމަށް ހިންގާ ހަރަކާތްތަކުގެ ތެރޭގައި ހިމަނައިގެން ފޮޓޯ ނެގުމުގެ މުބާރާތެއް ބާއްވަން ނިންމައި ބައިވެރިވުމުގެ ފުރުޞަތު ހުޅުވާލައިފިކަމަށެވެ.

 އެވުޒާރާއިން ބުނެފައިވަނީ މުބާރާތުގައި ބައިވެރިކުރާ ފޮޓޯތައް ހުންނަންވާނީ "މިނިވަން އުފާ" ތީމް އަށް ކަމަށާއި، މުބާރާތް ހުޅުވާލައިފައިވަނީ 18 އަހަރުން މަތީގެ ކޮންމެ ދިވެއްސަކަށްވެސް ބައިވެރިވެވޭ ގޮތައްކަމަށެވެ.

މުބާރާތުގައި ބައިވެރިކުރާ ފޮޓޯތައް ހުންނަންވާނީ ޤަވާއިދުގައި ކަނޑައަޅާފައިވާ މައިގަނޑު ހަތަރު ދާއިރާއެއްގެ ތެރޭގައި ކަމަށާއި އެއީ ދިވެހިރާއްޖޭގެ ޤުދުރަތީ ރީތިކަން، ދިވެހިރާއްޖޭގެ ތާރީޚު، ދިވެހިންގެ އާދަކާދައާއި ސަޤާފަތް، އަދި ދިވެހި މުޖުތަމައުގެ މިނިވަންކަމާއި އުފާފާގަތިކަން ކަމަށް ދާޚިލީ ވުޒާރާއިން ބުނެފައިވެއެވެ.

 މުބާރާތުގައި ބައިވެރިވުމުގެ ފުރުޞަތު އަންނަ ޖުލައި މަހުގެ 15 ވަނަ ދުވަހުގެ ނިޔަލަށް ވަނީ ހުޅުވާލާފައި ކަމަށާއި، ބައިވެރިކުރާ ފޮޓޯތައް ހުށަހަޅާނީ އެކަމަށްޓަކައި ޚާއްޞަކޮށްފައިވާ ވެބްސައިޓް މެދުވެރިކޮށް ކަމަށް އެ ވުޒާރާއިން ބުނެފައިވެއެވެ.

މުބާރާތުގެ ޤަވާއިދާއި އެހެން މުހިއްމު މައުލޫމާތުތައް ވެބްސައިޓު  https://upamv.org/competitions/ ން ހުންނާނެ ކަމަށް ވެސް އެ ވުޒާރާއިން ބުނެފައިވެއެވެ.

މުބާރާތުގައި ބައިވެރިވާ ކޮންމެ މީހަކަށްވެސް ތިން ފޮޓޯ ހުށަހެޅުމުގެ ފުރުސަތު އޮންނާނެ ކަމަށާއި، މުބާރާތުގެ އެއްވަނައަށް ހޮވޭ ފޮޓޯ ހުށަހަޅާ ފަރާތަކަށް 15,000 ރުފިޔާ ދިނުމަށް ވަނީ ހަމަޖެހިފައި ކަމަށާއި މުބާރާތް ކުރިއަށް ގެންދަނީ މިމިނިސްޓްރީއާއި ޔުނައިޓެޑް ފޮޓޯގްރާފަރސް އެސޯސިއޭޝަން ގުޅިގެން ކަމަށް އެ ވުޒާރާއިން ބުނެފައިވެއެވެ.