ކުރިއަށް އޮތް އަޞްޙާ ޢީދާއި ދިމާކޮށް މާލެ ސިޓީ މިރޭ ދިއްލާލުމަށް ހަމަޖެހިފައިވާ ކަމަށް މާލެ ސިޓީ ކައުންސިލުން ހާމަކޮށްފިއެވެ.
އަދި އެކަން އިހްތިފާލް ކުރުމަށް ބާއްވާ ހަފްލާ މިރޭ އޮންނާނެ ކަމަށްވެސް އެކައުންސިލުން ވަނީ ބުނެފައެވެ.
ޢީދާއި ދިމާކޮށް މާލޭގެ ބޮޑުތަކުރުފާނު މަގާއި، މަޖީދީމަގު އަދި ސޯސަންމަގުގެ އިތުރުން ވިލިމާލެ ހިމެނޭހެން ބައެއް ބޮޑެތި މަގުތައް ޒީނަތްތެރި ކުރުމަށް ވަނީ ނިންމާފައި ވާކަމަށް މާލޭ ސިޓީ ކައުންސިލުން ވަނީ ބުނެފައެވެ.
އެގޮތުން މާލެ އާއި ވިލިމާލޭގައި ޖުމްލަ 22 ގިޑިގެ އާއެކު 2224 ބޮކި ހަރުކުރުމަށް މާލެ ސިޓީ ކައުންސިލުން ދަނީ މަސައްކަތްކުރަމުން ކަމަށް ޖޫން 23 ގައި އެކައުންސިލުން ބުނެފައިވެއެވެ.
އަޟްޙާ އީދަށް މާލޭ ސިޓީ ކައުންސިލުން މަގުތައް ޒީނަތްތެރިކޮށް ކުލަގަދަކޮށް ޢީދު ފާހަގަ ކުރުން ވެގެންދާނީ މާލެ ސިޓީ ކައުންސިލުން އިސްނަގައިގެން މިފަދައިން ހިންގާ ފުރަތަމަ ހަރަކާތަށް ކަމަށް މާލެ ސިޓީ ކައުންސިލުން ވަނީ ބުނެފައެވެ..
މާލެ ސިޓީ ކައުންސިލްގެ ހަތަރުވަނަ ދައުރުގެ ކައުންސިލުން ދަނީ މި 5 އަހަރަށް އެކުލަވާލާފައިވާ ސްޓްރެޓެޖިކް އެކްޝަން ޕްލޭން (ސެޕް) ތަންފީޒު ކުރުމަށް ގިނަ މަސައްކަތްތަކެއް ކުރަމުން ކަމަށް ވެސް މާލެ ސީޓީ ކައުންސިލުން ބުނެފައިވެއެވެ. އެގޮތުން މަގުތައް ޒީނަތްތެރި ކުރުންވެގެންދާނީ ސެޕްގައި ހިމެނޭ "ޗާލު މާލެސިޓީ" އަމާޒަށް ވާސިލްވުމަށް އިތުރުވެގެންދާ ބޮޅަކަށް ކަމަށް އެކައުންސިލުން ބުނެއެވެ.
ރަމަޟާން މަހާއި މުސްލިމުން ފާހަގަ ކުރާ ދެޢީދާއި ދިމާކޮށް މަގުތައް ދިއްލައި ޒީނަތްތެރި ކޮށް ހެދުމަކީ ޢަރަބި އިސްލާމީ ޤައުމު ތަކުގައި ކޮށްއުޅޭ ކަމެކެވެ.
Advertisement
This content is created and paid for by advertisers and does not involve Voice Journalists
