މިއަހަރު މުޅިން އަލަށް އޮފީސް/ކުންފުނިތަކަށް އަމާޒުކޮށްގެން ބޭއްވުނު އާބަންކޯ ބައިބަލާ ޗެމްޕިއަންޝިޕް 2023ގެ ޗެމްޕިއަންކަން އާބަންކޯގެ ޓީމުން ހޯދައިފި އެވެ. 

މި މުބާރާތަށް ވަރުގަދަ ޓީމަކާއެކު ބައިވެރިވި އާބަންކޯ ޗެމްޕިއަންކަން ހޯދީ ރޭ ކުޅުނު ފައިނަލް މެޗުގައި ވާދަވެރި ކުޅުމަކަށްފަހު ގަދަހިފުމުގައި އެމްޕީއެލްގެ މަށްޗަށް ކުރި ހޯދައިގެންނެވެ. މެޗުގެ ފުރަތަމަ ގޭމުގައި ބޭރުން ކުޅެ 8-6 ގެ ނަތީޖާއަކުން އެމްޕީއެލް ކާމިޔާބު ކުރި ނަމަވެސް، ދެވަނަ  ގޭމު އާބަންކޯ އިން ބޭރުން އަރައި  ކާމިޔާބުކުރީ 8-7 ގެ ނަތީޖާއަކުން ނެވެ.

ގަދަހިފުމުގައި ފުރަތަމަ އާބަންކޯގެ ހަސަން މާހިރު (ހަންޓޭ) ވަނީ ބޭރުން އެރި އެމްޕީއެލްގެ އަސްލަމް ވަހީދު، ވަގުތު ހަމަވަންދެން އެތެރޭގައި ހިފަހައްޓާލައިފަ އެވެ. ދެވަނަ ހިފުމުގައި އެތެރޭން ކުޅުނު އެމްޕީއެލްގެ އަބްދުﷲ ނިޝާއު (އަބޯ) އަށް، ބޭރުން އެރި އާބަންކޯގެ ރިލްވާން ފަރުހަތު (އިލޫ) ހިފަހައްޓައެއް ނުލެވުނެވެ.

ހުޅުމާލޭ ބައިބަލާ ރިންގުގައި މިދިޔަ އަންގާރަ ދުވަހުގެ ރޭ ފެށި މި މުބާރާތުގައި ޖުމްލަ ނުވަ ޓީމެއް ވާދަ ކުރި އެވެ. މުބާރާތް ކުރިއަށް ގެންދިޔައީ ނުވަ ޓީމު ދެ ގުރޫޕަކަށް ބަހާލައިގެން ކޮންމެ ގުރޫޕަކުން ވެސް އެންމެ ރަނގަޅު ދެ ޓީމު ވަނީ ސެމީ ފައިނަލަށް ހޮވޭގޮތަށެވެ.

މުބާރާތުގެ އެންމެ މޮޅު ފަސް ކުޅުންތެރިން 

މުބާރާތުގެ އެންމެ މޮޅު ފަސް ކުޅުންތެރިންނަކީ އާބަންކޯގެ ރިލްވާން ފަރުހަތު (އިލޫ) އާއި ފައިނަލް މެޗުގެ މޮޅު ކުޅުންތެރިޔަކަށް ހޮވުނު އިބްރާހިމް ސަމީން (ޝަންމި)ގެ އިތުރުން، އެމްޕީއެލްގެ އަހުމަދު މުހައްމަދު (އަންމަޑޭ) އާއި އާރުއާރުސީގެ އަހުމަދު ފިރާޒް މޫސާ (ހާންޑޯ) އިތުރުން އާބަންކޯގެ ހަސަން މާހިރު (ހަންޓޭ) އެވެ.

މުބާރާތުގެ ތިންވަނަ ހޮވި މެޗުގައި ރޭ ބައްދަލުކުރީ ރޯޑް ރެކްރިއޭޝަން ކްލަބް (އާރުއާރުސީ) އާއި އެސްޓީއޯ އެވެ. އެމެޗު ވެސް އެއް ގޭމު އެއް ގޭމުން އެއްވަރު ނަތީއްޖާނެރުމަށް ވަނީ ގަދަހިފުމަކަށް ދާންޖެހިފައެވެ.

ފުރަތަމަ ހިފުން އެސްޓީއޯ ގެންދިޔައިރު ދެވަނަ ހިފުން ގެންދިޔައީ އާރުއާރުސީ އެވެ. ފަހު ހިފުމުގައި އެސްޓީއޯގެ ފަރަހު ޝާމް އަށް ބޭރުން ކުޅުނު އާރުއާރުސީގެ މުހައްމަދު ލުފަޝާން (ޕަފް) ނުހިފެހެއްޓި، އާރުއާރުސީ އިން ވަނީ މުބާރާތުގެ ތިންވަނަ ހޯދައިފަ އެވެ.

މުބާރާތުގެ ފެއާޕްލޭ ޓީމަކަށް ހޮވުނީ އެސްޓީއޯ ޓީމެވެ. އަދި މުބާރާތުގެ މިސްޓަ ބައިބަލާގެ މަގާމު ލިބުނީ އާބަންކޯ ޓީމުގެ ހަސަން މާހިރު (ހަންޓޭ) އަށެވެ.