މިދިޔަ މެއި މަހު ޑޮލަރުގެ އާމްދަނީ އެންމެ ގިނައިން ލިބުނީ ޓީޖީއެސްޓީ އިން ކަމަށް މީރާގެ ތަފާސް ހިސާބުތަކުން ދައްކައިފިއެވެ.

މީރާގެ ތަފާސް ހިސާބުތަކުން ދައްކާގޮތުން ޑޮލަރުގެ އާމްދަނީ އެންމެ ގިނަ ދާއިރާއަކީ ޓީޖީއެސްޓީ ގެ ދާއިރާއެވެ. އެގޮތުން ޓީޖީއެސްޓީގެ ގޮތުގައި 296 މިލިއަން ޑޮލަރު ލިބިފައިވެއެވެ. ޓޫރިޒަމް ބިމު ކުލީގެ ގޮތުގައި ލިބިފައިވަނީ 34 މިލިއަން ޑޮލަރެވެ. ގްރީން ޓެކްސް ގެ ގޮތުގައި 31 މިލިއަން ޑޮލަރު ލިބިފައިވެއެވެ.

އަދި އެއަރޕޯޓު ޑިވޮލޮޕްމެންޓް ފީގެ ގޮތުގައި 30 މިލިއަން ޑޮލަރު ލިބިފައިވެއެވެ.

މި އަހަރުގެ މިހާތަނަށް ބަލާއިރު ޑޮލަރުން އެންމެ ގިނައިން އާމްދަނީ ލިބިފައިވަނީ ޚިދުމަތުގެ އަގުން ނަގާ ޓެކްސް (ޖީއެސްޓީ) ގެ ގޮތުގަ އެވެ. މި ބައިގައި ހިމެނޭ ޓޫރިޒަމް ޖީއެސްޓީއަށް މި އަހަރު 296 މިލިއަން ޑޮލަރު ލިބިފައިވެ އެވެ. ނަމަވެސް މިދިޔަ އަހަރު މި އަދަދުހުރީ 234 މިލިއަން ޑޮލަރުގަ އެވެ.

މި އަހަރުގެ މިހާތަނަށް ޓެކުހުގެ އާމްދަނީގެ ގޮތުގައި ޑޮލަރުން ލިބިފައިވަނީ 372 މިލިއަން ޑޮލަރެވެ. މިދިޔަ އަހަރު ލިބިފައިވަނީ 291 މިލިއަން ޑޮލަރެވެ. އަދި ޓެކްސް ނޫން އާންދަނީގެ ގޮތުގައި ފީ ހިމެނޭހެން 66 މިލިއަން ޑޮލަރު މި އަހަރު ލިބުނުއިރު މިދިޔަ އަހަރު މި އަދަދު ހުރީ 87 މިލިއަން ޑޮލަރުގަ އެވެ.

މީރާގެ މެއި މަހުގެ ތަފާސް ހިސާބުތަކުން ދައްކާ ގޮތުން މިދިޔަ މަހުގެ ނިޔަލަށް ޑޮލަރުން ލިބިފައިވަނީ 439 މިލިއަން ޑޮލަރެވެ. ނަމަވެސް މިދިޔަ އަހަރު މި އަދަދުހުރީ 378 މިލިއަން ޑޮލަރުގަ އެވެ. މިއީ އަހަރުން އަހަރަށް ބަލާނަމަ 60 މިލިއަން ޑޮލަރުގެ އިތުރުވުމެކެވެ.

މިއަހަރުގެ މިހާތަނަށް އެންމެ ގިނައިން ޑޮލަރުގެ އާމްދަނީ ލިބިފައިވަނީ ޖެނުއަރީ މަހުއެވެ. އެއީ 112 މިލއަން ޑޮލަރެވެ.