އައްޑު އަތޮޅު މީދޫގައި ހިންގި މާރާމާރީއެއްގައި ޒަޚަމްވި ޒުވާނާގެ ހާލު ސީރިއެސްވެ އިތުރު ފަރުވާ ހޯދުމަށް މާލެ ގަނައުމުގެ މަސައްކަތް ފަށައިފި އެވެ. 

ސ. މީދޫގައި ތޫނު އެއްޗަކުން ހަމަލާދީ މީހަކު ޒަޚަމްކޮށްލާފައިވަނީ މި މަހުގެ 24 ގައެވެ. 

ޒަޚަމްވި މީހާގެ އާއިލާއިން "ވޮއިސް" އަށް މައުލޫމާތު ދިން ގޮތުގައި އެމީހާ އައްޑޫ މީދޫއަށް ދިޔައީ ޗުއްޓީ ހޭދަކޮށްލުމަށް މި މަހުގެ 20 ވަނަ ދުވަހުގައެވެ. އަދި އޭނާއަށް ހަމަލާދިނުމުގެ ކުރިން ބަޔަކު އިންޒާރުދިންކަމަށް ވެސް އާއިލާއިން ކިޔައިދިނެވެ. 

Advertisement

އެފަހުން އެ މީހާއަށް ހަމަލާދީފައިވާއިރު، ތޫނު އެއްޗަކުން ހަމަލާދިނުމުގެ ސަބަބުން ފުއްޕާމެޔަށް ވަރަށް ބޮޑަށް ގެއްލުންވެފައިވާކަމަށް އާއިލާއިން ވަނީ ބުނެފައެވެ. 

ލިބުނު އަނިޔާތަކުގެ ސަބަބުން އެމީހާގެ ފުއްޕާމެޔާއި އެތެރެހައްޓަށް ބޮޑެތި އަނިޔާތަކެއް ލިބިގެން ގޮސްފައިވާއިރު، "އިންޓާނަލް ބްލީޑް" ވެފައިވާކަން ވެސް އާއިލާއިން ފާހަގަކުރެއްވި އެވެ. އަދި ނޭވާލާން ވެސް އުނދަގޫވާކަމަށް އާއިލާއިން ބުނެއެވެ. 

މީދޫ މާރާމާރީގައި ޒަޚަމްވި ޒުވާނާއަށް ފަރުވާދިނުމަށް އެންމެ ފުރަތަމަ ގެންގޮސްފައިވަނީ ގެންގޮސްފައިވަނީ މީދޫ ސިއްޙީ މަރުކަޒަށެވެ. އެހެން ނަމަވެސް، އެފަހުން އޭނާ އަށް ފަރުވާދިނުމަށް އައްޑޫ އިކުއިޓޭރިއަލް ހޮސްޕިޓަލަށް ވަނީ ގެންގޮސްފަ އެވެ. 

ހޮސްޕިޓަލަށް ގެންގޮސް ފަރުވާދެމުން ދިޔަ ނަމަވެސް ހާލު އިތުރަށް ސީރިއެސްވަމުން އަންނާތީ މާލެ ގެނައުމުގެ މަސައްކަތް މިހާރު ދަނީ ކުރަމުންނެވެ.