ބޯހިޔާވަހިކަމަށް އެންމެ ބޭނުންވެފައިވާ މީހުންނަށް ޚާއްސަކޮށްގެން ސަރުކާރުން ހިލޭ ބަހާ ގޯއްޗަށް އިންޑިއާގެ ރަށްވެއްސެއްވެސް ޝަރުތު ހަމަވާތީ ލިސްޓުގައި ހިމަނައިފި އެވެ. 

ބޯހިޔާވަހިކަމުގެ ހައްޤު ކަށަވަރުކޮށްދިނުމަށް މަސައްކަތް ކުރާ އާންމުންގެ އެކުވެރި ގުޅުން ޖަމުއިއްޔާގެ ރައީސް މިދުއަމް ސައިދު ކުރެއްވި ޓްވީޓެއްގައި ވިދާޅުވެފައިވަނީ މާލޭ މީހުންނަށް ހިލޭ ބެހި ގޯއްޗަށް ޝަރުތުހަމަވާ އިންޑިއާގެ ރަށްވެއްސަކީ ހަބީބް ރަހުމާނު މުޙައްމަދު ހަނީފު ނަމަކަށް ކިޔާ މީހެއް ކަމަށެވެ. 

އެމީހާއަކީ މާލޭ މީހަކާއި އިނދެގެން އުޅޭ މީހެއްކަމާއި، އެމީހާގެ ނަން ގޯތި ލިސްޓުގައި ޝަރުތު ހަމަވާ މީހުންގެ ތެރޭގައި އޮންނަން ޖެހޭ އެއްވެސް ސަބަބެއް ނެތްކަމަށް މިދުއަމް ވަނީ ވިދާޅުވެފަ އެވެ. 

މާލޭ މީހުންނަށް ބަހާ ގޯސްޗަށް ހަމަވާ ލިސްޓުގައި އިންޑިއާ މީހެއް ޝަރުތު ހަމަވާކަމަށް ހިމަނާފައި

މައުލޫމާތު ލިބޭގިތުގައި ގޯތި ލިބޭކަމަށް ޝަރުތު ހަމަވާ މީހުންގެ ލިސްޓުގައި ހިމަނާފައި އޮތް އިންޑިއާ މީހާއަކީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވަރަށް ބޮޑު ސަޕޯޓަރެކެވެ. 

އޭނާ ރައީސް ޞާލިހާއެކު ނަގާފައިވާ ބައެއް ފޮޓޯތައް ވެސް މިހާރު ވަނީ އާންމުވެފަ އެވެ. ބިންވެރިޔާ ޕްރޮގްރާމުގެ ދަށުން ސަރުކާރުން ބެހި ގޯތިތައް ރައީސް ޞާލިހުގެ އަރިސް ބޭފުޅުންނާއި، ބޮޑެތި މަހުޖަނުންނަށް ދީފައިވާކަން ފާހަގަކޮށް ސަރުކާރަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. 

އެގޮތުން ގޯތި ލިބުނު ފަރާތްތަކުގެ ތެރޭގައި އައްޑޫ މީދޫ ދާއިރާގެ މެމްބަރު ރޮޒައިނާ އާދަމްގެ ދެކަނބަލުންނާއި، އެމްއެމްޕީއާރުސީގެ ޚިޔާނާތުގެ ކުށް ސާބިތުވެފައިވާ ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުވެސް ހިމެނެއެވެ. 

ގޯތި ލިސްޓު އެކުލަވާލުމުގައި ކޮރަޕްޝަންގެ އެއްވެސް އަމަލެއް ނުހިމެނޭނެ ކަމުގެ ޔަގީންކަން ޕްލޭނިން މިނިސްޓަރު މުޙައްމަދު އަސްލަމް ދެއްވި ނަމަވެސް، ލިސްޓަށް ބަލާއިރު އެއީ ވަކި ފަރާތުން އަންގައިގެން ތައްޔާރުކޮށްފައިވާ، ލިސްޓެއްކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުން ނެވެ.