ވެސްޓްހަމް ޔުނައިޓެޑްގެ މިޑްފީލްޑަރު ޑެކްލާން ރައިސް ހޯދުމަށް އާސެނަލުން ރެކޯޑް އަގެއް ކަމަށްވާ 105 މިލިއަން ޕައުންޑާ ހުށަހަޅާފައިވާ ކަމަށް މީޑިއާ ރިޕޯޓްތައް ބުނެފިއެވެ.

ޗެލްސީގެ ޔޫތު ޓީމަށް 2006 އިން 2014 ވަނަ އަހަރާއި ހަމައަށް ކުޅުނު ރައިސް ވެސްޓްހަމް އަށް ބަދަލުވީ 2014 ވަނަ އަހަރުއެވެ. އަދި 2017 ވަނަ އަހަރުން ފެށިގެން އެޓީމުގެ ސީނިއާ ޓީމަށް ކުޅެމުން އަންނަ ރައިސް ވަނީ 2017,2018,2019 ވަނަ އަހަރު އެޓީމުގެ އެންމެ މޮޅު ޒުވާން ކުޅުންތެރިއާގެ އެވޯޑް ހޯދާފައެވެ. އަދި ޖެހިގެން އައި 2020,2021,2022 އަދި 2023 ވަނަ އަހަރުގެ އެކުލަބުގެ އަހަރުގެ މޮޅު ކުޅުންތެރިޔަކަށް ހޮވިފައިވަނީ ވެސް އުމުރުން 24 އަހަރުގެ މިޑްފީލްޑަރެވެ.

ފާއިތުވެދިޔަ ހަ އަހަރު ތެރޭގައި ވެސްޓްހަމް އަށް 204 މެޗު ކުޅެދީފައިވާ ރައިސް ވަނީ އެކުލަބަށް 10 ލަނޑު ކާމިޔާބުކޮށްދީފައެވެ. އަދި ނިމިދިޔަ ސީޒަނުގައި ޔުއެފާ ކޮންފަރެންސް ލީގު އެޓީމަށް ކާމިޔާބުކޮށްދިނުނުގައި މުހިންމު ދައުރެއް އަދާކޮށްދިން ރައިސް ހޯދުމަށް ޔޫރަޕްގެ ބޮޑެތި ގިނަ ޓީމުތަކަކުން އަންނަނީ މަސައްކަތް ކުރަމުންނެވެ.

އޭގެތެރޭގައި އާސެނަލްގެ އިތުރުން މެންޗެސްޓާ ޔުނައިޓެޑާއި ސިޓީގެ އިތުރުން ޗެލްސީ އަދި ބަޔާން މިއުނިކް ފާހަގަކޮށްލެވެއެވެ. މީގެތެރެއިން މެންޗެސްޓާ ސިޓީ އިން މިހާރުވެސް ވަނީ 90 މިލިއަން ޕައުންޑުގެ ހުށަހެޅުމެއް ވެސްޓްހަމް އަށް ހުށަހަޅާފައެވެ.

ނަމަވެސް ވެސްޓްހަމް އިން ވަނީ ސިޓީގެ އެ ހުށަހެޅުމަށް ނޫނެކޭ ބުނެފައެވެ. އަދި އެކުލަބުން ރައިސް ވިއްކާލުމަށް އެއްބަސްވާނެ އެންމެ ކުޑަ އަގަކީ 100 މިލިއަން ކަނަށް ބުނެފައިވާއިރު، އާސެނަލް އިން މިހާރު ހުށަހަޅާފައިވާ އަގަކީ އެއަށްވުރެ ބޮޑު އަގެކެވެ. 

މީޑިއާ ރިޕޯޓްތައް ބުނާގޮތުގައި ވެސްޓްހަމް އިން މިހާރު އިންތިޒާރު ކުރަމުން އަންނަނީ މެންޗެސްޓާ ސިޓީ އިން އިތުރު ބިޑެއް ހުށަހަޅާފައެވެ.