ސާފްޗެމްޕިއަންޝިޕް ފުޓްބޯޅަ މުބާރާތުގެ ގުރޫޕް ބީގައި މިއަދު ހަވީރު ލުބުނާން އާއި ދިވެހިރާއްޖެ ވާދަކުރި މެޗު ކާމިޔާބުކޮށް ގުރޫޕްގެ އެއްވަނަ ޓީމުގެ ގޮތުގައި ލުބުނާން ސެމީފައިނަލުގެ ޖާގައެއް ކަށަވަރުކޮށްފިއެވެ.

ދެޓީމުގެ ފަރާތުން ވާދަކުރި ކުޅުމެއް ފެނިގެންދިޔަ މި މެޗު ލުބުނާނުން ކާމިޔާބުކުރީ 1-0 ގެ ނަތީޖާއަކުން ނެވެ. މިމެޗުގައި ލުބުނާނުން ކާމިޔާބުކުރި ހަމައެކަނި ލަނޑު ފުރަތަަމަ ހާފުގެ 23 ވަނަ މިނެޓުގައި ކާމިޔާބުކޮށްދިނީ ކެޕްޓަން މާތޫކްއެވެ. މިއީ ރާއްޖޭގެ ޕެނަލްޓީ އޭރިއާ ބޭރުން ލިބުނު ހިލޭ ޖެހުމަކުން އޭނާ ކާމިޔާބުކޮށްދިން ލަނޑެކެވެ.

މި މުބާރާތުގައި ރާއްޖެ ކުޅުނު ފުރަތަަމަ މެޗުގައި 2-0 ގެ ނަތީޖާއަކުން ބޫޓާން އަތުން މޮޅުވި ނަމަވެސް އެމެޗުގައި ދިވެހި ކުޅުންތެރިންގެ ފަރާތުން ފެނިގެންދިޔައީ ވަރަށް އާދައިގެ ކުޅުމެކެވެ. އަދި ދެވަނަ މެޗުގައި ބަންގްލަދޭޝް އާއި ވާދަކޮށް 3-1 ގެ ނަތީޖާއަކުން ދިވެހިޓީމު ބަލިވިއިރު މިއީ ފާއިތުވެދިޔަ 20 އަހަރުތެރޭގައި ސާފްޗެމްޕިއަންޝިޕް ބަންގްލަދޭޝަ އަތުން ދިވެހިޓީމު ބަލިވި ފުރަތަަމަ މެޗެވެ.

ނަމަވެސް ގުރޫޕްގެ ފަހު މެޗުގައި މިއަދު ލުބުނާން އާއި ދެކޮޅަށް ދިވެހި ޓީމު ނުކުތީ ތަފާތު ރޫހެއްގައެވެ. ކުރީ ދެ މެޗާއި ޚިލާފަށް މި މެޗުގައި ދިވެހި ޓީމުގެ ފަރާތުން ރޭވުންތެރިކަމާއެކު ރަގަޅު ގޭމެއް ކުޅުނުތަން ފެނިގެންދިޔައެވެ. މެޗުން ބަލިވިނަމަވެސް މިއަދު ދިވެހި ޓީމުގެ ކޮންމެ ކުޅުންތެރިއެއްގެ ފަރާތުން ފެނިގެންދިޔަ މަސައްކަތުގެ ރޭޓާއި ދަނޑުމަތީގައި ދެއްކި ހުނަރުވެރި ކުޅުމާއި މެދު ހަމަ ކޮންމެ ދިވެއްސަކުވެސް އުފާކުރާނެއެވެ. 

މިއަދުގެ މެޗުން ބަލިވުމުން މުބާރާތުގެ ސެމީއަށް ދިއުމުގެ ފުރުސަތު ރާއްޖެއަށް ވަނީ ވަރަށް ބޮޑަށް ހަނިވެފައެވެ. ކުޅުނު ތިން މެޗުގެ ތެރެއިން ދެ މެޗުން ބަލިވެ އެއް މެޗުން މޮޅުވެގެން ތިން ޕޮއިންޓް ރާއްޖެއަށް ލިބިފައިވާ އިރު ރާއްޖެ ސެމީއަށް ދިއުމުގެ ފުރުސަތު އޮތީ މިރޭ ބަންގްލަދޭޝްއާ ބޫޓާން ކުޅޭ މެޗުން 3-0 ގެ ތަފާތަކުން ބޫޓާން މޮޅުވެގެންނެވެ. މި މުބާރާތުގައި މިހާތަނަށް ކުޅުނު ދެ މެޗުން ވެސް ބަލިވެފައިވާ ބޫޓާންއާ ދެކޮޅަށް މިރޭ ނިކުންނަ ބަންގްލަދޭޝްއިން އެންމެ ފަހުން ކުޅުނު މެޗުގައި ވަނީ 3-1 ގެ ނަތީޖާއަކުން ރާއްޖެ ބަލިކޮށްފައެވެ.

މިއަދުގެ މޮޅާއެކު ލުބުނާނު ގްރޫޕް ސްޓޭޖް ނިންމާލީ ކުޅުނު ތިން މެޗުން ވެސް މޮޅުވެ ގްރޫޕްގެ އެއްވަނައިގައެވެ. އަދި ސެމީގައި އެޓީމުން ވާދަކުރަންޖެހެނީ ގުރޫޕް އޭގެ ދެވަނަ ޓީމުގެ ގޮތުގައި ސެމީފައިނަލްގެ ޖާގައެއް ހޯދި އިންޑިއާ އާއި ދެކޮޅަށެވެ.