ސާފްޗެމްޕިއަންޝިޕް ފުޓްބޯޅަ މުބާރާތުގެ ތާރީޚްގައި ފުރަތަމަ ފަހަރަށް ސެމީ ފައިނަލުގެ ޖާގައެއް ނުލިބި މުބާރަތުގެ ގްރޫޕް ސްޓޭޖުން ދިވެހި ރާއްޖެ ކަޓައިފި އެވެ.

1997 ވަނަ އަހަރު ސާފްޗެމްޕިއަންޝިޕްގައި ދިވެހި ޓީމު ވާދަކުރަން ފެށިފަހުން އެންމެ ފަހުން ބޭއްވުނު 11 މުބާރާތުގެ ތެރެއިން ފަސް މުބާރާތުގެ ފައިނަލުގައި ދިވެހިޓީމު ކުޅުނު އިރު،2008 އަދި 2018 ވަނަ އަހަރު ދިވެހިޓީމު ވަނީ މުބާރާތުގެ ޗެމްޕިއަންކަން ހޯދާފައެވެ. އަދި 1999 އަދި 2021 ވަނަ އަހަރުގެ މުބާރާތުގެ ތިންވަނަ ދިވެހިޓީމު ހޯދިއިރު އަނެއް ހަތަރު މުބާރާތުގެ ސެމީގައި ދިވެހިޓީމު ކުޅެފައި ވެއެވެ.

މިއަހަރުގެ ސާފް ޗެމްޕިއަންޝިޕްއަކީ މުޅިން އަލަށް ސަރަހައްދުން ބޭރުގެ ދެޓީމަށް ދައުވަތުދީގެން ބޭއްވުނު ފުރަތަމަ މުބާރާތެވެ. އެގޮތުން މިއަހަރުގެ މުބާރާތުގައި ކުވައިތުގެ އިތުރުން ލުބުނާން ވާދަކުރަމުންދާއިރު، ގުރޫޕް އޭގެ އެއްވަނަ ހޯދީ ކުވައިތުން ނެވެ. ދެވަނަ އިންޑިޔާ ހޯދިއިރު، އެގްރޫޕުގެ ތިންވަނަ ލިބުނީ ނޭޕާލަށެވެ. އަދި ގުރޫޕް އޭގައި ކުޅުނު ތިން މެޗުން ވެސް ބަލިވެ ގްރޫޕްގެ ފުލަށް ދިޔައީ ޕާކިސްތާނެވެ.

ރާއްޖެ ހިމެނޭ ގްރޫޕް ބީގެ އެއްވަނަ ހޯދީ ކުޅުނު ތިން މެޗުން ވެސް މޮޅުވި ލުބުނާން އެވެ. ދެވަނަ ބަންގްލަދޭޝަ އިން ހޯދިއިރު، އެޓީމުވަނި މިގުރޫޕްގައި ރާއްޖޭގެ އިތުރުން ބޫޓާން ވެސް ބަލިކޮށްފައެވެ. މި ގުރޫޕްގެ ތިންވަނަ ރާއްޖެއަށް ލިބުނު އިރު ދިވެހި ޓީމަށް މޮޅެއް ހޯދުނީ ބޫޓާން އަތުން އެކަންޏެވެ. ގުރޫޕްގެ ފުރަތަަމަ ދެމެޗުގައި ވަރަށް އާދައިގެ ކުޅުމެއް ދިވެހިޓީމުގެ ފަރާތުން ފެނިގެންދިޔަ ނަމަވެސް ފަހު މެޗުގައި ލުބުނާން އާއި ދެކޮޅަށް ދިވެހި ޓީމުންވަނީ ވާދަވެރި ކުޅުމެއް ދައްކައިދީފައެވެ.

މުބާރާތުގެ ސެމީ ފައިނަލުގައި އިންޑިއާ ވާދަކުރަންޖެހެނީ ގްރޫޕް ބީގެ އެއްވަނަ ލުބުނާން އާއި ދެކޮޅަށެވެ. އަދި ބަންގްލަދޭޝް ވާދަކުރަންޖެހެނީ ގްރޫޕް އޭގެ އެއްވަނަ ކުވައިތާއި ދެކޮޅަށެވެ.