އިޓަލީގެ އިންޓީރިއާ މިނިސްޓަރު މަޓިއޯ ޕިއަންޓެޑޯސީ އާއި ކުޅިވަރާ ބެހޭ ވަޒީރު އަންދްރެއާ އަބޮޑީ ވަނީ މިދިޔަ އަންގާރަ ދުވަހު އިޓާލިއަން ފުޓްބޯޅައިގައި ޔަހޫދީންނާއި ދެކޮޅު ވިސްނުން ތައް ހުއްޓާލުމަށް އެއްބަސްވުމެއް އެކުލަވާލައިފައެވެ.

ސެމިޓިޒަމްއާ ދެކޮޅަށް ކުރާ މަސައްކަތުގެ ނެޝަނަލް ކޯޑިނޭޓަރު ޖިއުސެއްޕެ ޕެކޮރާރޯ އާއި އެފްއައިޖީސީގެ ރައީސް ގެބްރިއެލް ގްރެވިނާއާ އެކު 13 އުސޫލެއް ގާއިމުކޮށްފައިވާއިރު އޭގެ ތެރޭގައި އެއްވެސް ކުޅުންތެރިއެއް 88 ނަންބަރު ބޭނުންކުރުން މަނާކުރުން ހިމެނެ އެވެ.

ސަބަބަކީ އެމީހުން ގަބޫލުކުރާގޮތުގައި، 88 ނަންބަރު ބޭނުންކުރަނީ އެޑޮލްފް ހިޓްލަރަށް ނިސްބަތްކޮށެވެ. އަދި އެއީ ޔަހޫދީންނާއި ދެކޮޅު ވިސްނުމެކެވެ. މި ދެ އަށަކީ އެމީހުންގެ ޑިކްޝަނަރީގައި އެޗް އަކުރުގެ ދަރަޖައާ ގުޅުވައިގެން ބޭނުންކުރާ ދެ ނަމްބަރެވެ. އެހެންކަމުން 88 އަކީ "ހެއިލް ހިޓްލަރ" މި ލަފުޒުގެ އިނީޝިއަލްތައް ކަމުގައިވާ އެޗްއެޗް އެވެ. މީގެ އިތުރުން މިނިސްޓަރު ޕިއަންޓެޑޯސީ ވަނީ "ނާޒިޒަމްގެ މަތިން ހަނދާންކޮށްދޭނެ ނިޝާންތަށް ސަޕޯޓަރުން ބޭނުންކުރުމަކީ ވެސް މަނާކަމެއް" ކަން ހާމަކުރައްވާފައެވެ.

Advertisement

އެހެންކަމުން ސެރިއޭގައި މިހާރުވެސް 88 ނަންބަރު ބޭނުންކުރަމުންދާ މާރިއޯ ޕަސަލިޗް އާއި ޓޮމަސް ރިންކޮން ފަދަ ކުޅުންތެރިންނަށް ކުރިއަށް އޮތް ސީޒަނުގައި ޖެހޭނީ އެނޫން އެހެން ނަންބަރެއް ބޭނުންކުރާށެވެ.

އިޓަލީގައި މީގެ ކުރިން ވެސް ޔަހޫދީންގެ ދިފާއުގައި ގިނަ ހަރަކާތްތަކެއް ހިނގާފައިވާއިރު ލާޒިއޯ އާއި ވެރޯނާ ފަދަ ކުލަބުތަކުން ވަނީ މި ހަރަކާތްތަކުގައި އިސްދައުރެއް އަދާކޮށްފައެވެ.

ނަމަވެސް އިޓަލީގެ ލީގަކީ ނަސްލީ ތަފާތުކުރުންތައް ޔޫރަޕްގައި އެންމެ ބޮޑު އެއް ލީގެވެ. ހާއްސަކޮށް އެގައުމުގައި ކުޅޭ ކަޅު ނަސްލުގެ ކުޅުންތެރިންނާ ދިމާކޮށް ފުރައްސާރަ ކުރުމަކީ ޔޫރަޕުގެ އެހެން ގައުމުތަކެކޭ އެއްފަދައިން އިޓަލީ ގައިވެސް ވަރަށް އާދައިގެ ކަމެކެވެ. އެގޮތުން އިޓަލީގެ ގައުމީ ޓީމުގައި ހިމެނުނު ކަޅު ނަސްލުގެ ކުޅުންތެރިއެއް ކަމަށްވާ މާރިއޯ ބަލޮޓެލީ ގައުމީ ޓީމަށް ކުޅުނުއިރު ވެސް އެގައުމުގެ ސަޕޯޓަރުންގެ ފަރާތުން އެކި ފަހަރުމަތިން ނަސްލީ ގޮތުން ފުރައްސާރަކޮށްއުޅުނެވެ.