އައްޑޫ ސިޓީ ބިން ހިއްކުމުގެ މަޝްރޫޢުގެ ދަށުން ފެށި މަރަދޫފޭދޫ ބިން ހިއްކުމުގެ މަސައްކަތް ތިން ހަފްތާގެ ތެރޭގައި ނިންމައިލައިފިއެވެ.
އައްޑޫ ސިޓީގެ ބިންހިއްކުމުގެ މަޝްރޫޢުގެ މި ޖޫން މަހުގެ 3ވަނަ ދުވަހު ފައްޓަވައި ދެއްވީ ރައީސް އިބްރާހިމް މުޙައްމަދު ޞާލިހެވެ.
މަރަދޫ ފޭދޫ ބިން ހިއްކުމުގެ މަސައްކަތް ނިމުމުން މިހާރު މިވަނީ މަރަދޫ އަދި މަރަދޫ-ފޭދޫ ގެ ދެ އަވަށުގެ ބިމަށް 76 ހެކްޓަރުގެ ބިން ހިއްކާ އިތުރުވެފައެވެ.
މީގެއިތުރުން މަރަދޫފޭދޫ ފަޅު ތެރެއިން ޓޫރިޒަމްގެ ބޭނުމަށް 8.3 ހެކްޓަރުގެ ތިން ރަށާއި 3.3 ހެކްޓަރުގެ ދެ ރަށް ހިއްކަން ވަނީ ހަމަޖެހިފައެވެ.
އައްޑޫ ބިން ހިއްކުމުގެ މަޝްރޫއުގެ ދަށުން 11 ކިލޯމީޓަރު ސަރަހައްދެއްގައި ގޮނޑުދޮށް ހިމާޔަތް ކުރަން ހަމަޖެހިފައިވާއިރު، ހިތަދޫން 90 ހެކްޓަރުގެ ބިން ހިއްކަން ވަނީ ހަމަޖެހިފައެވެ.
މަރަދޫ އަދި މަރަދޫފޭދޫ ބިން ހިއްކާ ނިމުމާއެކު ހިތަދޫ ޒޯން ދޭއްގެ ބިން ހިއްކުމުގެ މަސައްކަތް މިހާރު ވަނީ ފަށާފައެވެ. މި ސަރަހައްދުން 40 ހެކްޓަރު ބިން ހިއްކަން ވަނީ ހަމަޖެހިފައެވެ.
އަދި މިއާއި އެކު ހުޅުމީދޫން 23.3 ހެކްޓަރުގެ ބިން ހިއްކައި އެ ރަށުގެ ފަޅު ތެރެއިން ޓޫރިޒަމްގެ ބޭނުމަށް ފަސް ހެކްޓަރުގެ ދެ ރަށް ހިއްކަން ވެސް ވަނީ ނިންމާފައެވެ.
އިންޑިއާގެ އެގްޒިމް ބޭންކްގެ 800 މިލިއަން ޑޮލަރުގެ ކްރެޑިޓް ލައިންގެ އެހީގައި އައްޑޫގައި ހިންގާ މި މަޝްރޫޢުގެ ދަށުން ޖުމްލަ 194.3 ހެކްޓަރުގެ ބިން ހިއްކާނެއެވެ.
Advertisement
This content is created and paid for by advertisers and does not involve Voice Journalists
