މި އަހަރުގެ ރިޔާސީ އިންތިޚާބުގައި ވޯޓު ލުމުގެ ހައްގު ލިބިގައިވާ މީހުންގެ ލިސްޓަކީ ގެޒެޓުގައި ޝާއިއުކޮށް އެންމެންނަށް ފެންނާނެހެން އޮންނާނެ ލިސްޓެއް ކަމަށާއި، ލިސްޓު ގަޑުބަޑު ކުރުމުގެ ފުރުސަތު ނޯންނާނެކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެއްޖެ އެވެ.
ހަބީބު މިފަދައިން ވިދާޅުވެފައިވަނީ މިއަހަރުގެ ސެޕްޓެމްބަރު މަހުގެ 9 ވަނަ ދުވަހުގައި ބޭއްވުމަށް ނިންމާފައިވާ ރިޔާސީ އިންތިޚާބުގައި ވޯޓުލުމުގެ ހައްޤު ލިބޭ ފަރާތްތަކުގެ ލިސްޓު (ވޯޓާސް ލިސްޓު) ގަޑުބަޑުކޮށް، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ފަހިވާގޮތަށް ލިސްޓު އެކުލަވާލާނެކަމަށް ތުހުމަތުކޮށް ބައެއް ފަރާތްތަކުން ޓްވީޓާގައި ފާޅުކުރަމުންދާ ޚިޔާލުތަކަށް ރައްދެދެއްވަމުން ނެވެ.
އެގޮތުން ހަބީބު ކުރެއްވި ޓްވީޓެއްގައި ވިދާޅުވީ ވޯޓުލާ މީހުންގެ ލިސްޓަކީ ސިއްރުން ގެންގުޅޭ އެއްޗެއް ނޫން ކަމަށެވެ.
އިންތިހާބާ ބެހޭ އާންމު ގާނޫނާއި، ރިޔާސީ އިންތިހާބުގެ ގާނޫނުގައި ވަރަށް ސާފުކޮށް ލިސްޓް ގެޒެޓުކޮށް ޕާޓީތަކަށް ލިސްޓް ފޮނުވައި، ހުރިހާ ރަށެއްގައި ލިސްޓް އާންމުކޮށް ޝަކުވާއަށް ހުޅުވާލައި، ޝަކުވާއާ ގުޅިގެން އަންނަ ބަދަލު ވެސް އިލެކްޝަންސް ކޮމިޝަނުން ގެޒެޓް ކުރަންޖެހޭ ކަމަށް ބަޔާންކޮށްފައިވާ ކަމަށާއި، އަދި އެކޮމިޝަންގެ ނިންމުމާ މެދު ހިތްހަމަނުޖެހޭ ނަމަ، ހައިކޯޓަށް މައްސަލަ ހުށަހެޅުމުގެ ފުރުސަތު ވެސް އޮންނާނެކަމަށް ހަބީބު ވިދާޅުވި އެވެ.
އެކަންކަން ފާހަގަކުރައްވާ ހަބީބު ވިދާޅުވީ އިންތިހާބުގައި ވޯޓުލާ ދުވަހު ބޭނުންކުރާނީ ގެޒެޓުކޮށް އަދި ކެންޑިޑޭޓުން ސޮއިކޮށް ފައިނަލް ކޮށްފައިވާ ލިސްޓު ކަމަށެވެ.
އެ ނޫން އެހެން ލިސްޓެއް ބޭނުން ނުކުރާނެ ކަމަށާއި، ލިސްޓު ގަޑުބަޑު ކުރުމުގެ ފުރުސަތުވެސް ނޯންނާނެކަމަށް އޭނާ ވިދާޅުވި އެވެ.
"ވޯޓުލާ ދުވަހު މިހާރު ގެޒެޓު ކޮށް ޢާންމުކޮށް ކެންޑިޑޭޓުން ސޮއިކޮށް ފައިނަލަށް ކުރެވޭ ލިސްޓު ނޫން ލިސްޓެއް ނޯންނާނެ. ކެރިގެން ޔަޤީންކަމާއެކީގައި މިދަންނަވަނީ ތިޔަހީފުޅު ކުރައްވާ ޒާތުގެ ކަމެއް ހިނގާކަށް އެއްވެސް ފުރުސަތެއް ނެތް"
އީސީގެ ނައިބު ރައީސް ހަބީބު
ރިޔަސީ އިންތިޚާބު ބޯމަތިވެފައިވާއިރު، ގިނަ ސިޔާސީ ޕާޓީތަކުން ވަނީ އިލެކްޝަން ކޮމިޝަނަށް އިތުބާރު ނުކުރާކަމަށް ބުނެފައެވެ.
އިލެކްޝަން ކޮމިޝަނަށް ސަރުކާރުން އިންތިހާއަށް ނުފޫޒު ފޯރުވަމުންދާ ކަމަށާއި، މިހާރު ހާލަތު އޮތް ގޮތުން މިނިވަން އިންސާފުވެރި ރިޔާސީ އިންތިޚާބެއް ބޭއްވިދާނެ ކަމާއި މެދު ވެސް ޔަގީންކަމެއް ނެތްކަމަށް ގިނަ ސިޔާސީ ޕާޓީތަކުން ވަނީ ބުނެފައެވެ.
އެހެން ނަމަވެސް އީސީން ބުނަމުންދަނީ އެ ކޮމިޝަނުން މަސައްކަތް ކުރަމުންދަނީ މިނިވަން މުސްތަގިއްލު ތަނެއްގެ ގޮތުގައި ކަމަށެވެ. އަދި ރިޔާސީ އިންތިޚާބު މިނިވަން އިންސާފުވެރި އިންތިޚާބަށް ހެދުމަށް ކުރެވެން އޮތް ހުރިހާ މަސައްކަތެއް އެ ކޮމިޝަނުން ކުރަމުން ގެންދާނެ ކަމަށެވެ.
Advertisement
This content is created and paid for by advertisers and does not involve Voice Journalists
