ސްވިޑިންގައި ޤުރުއާން އަންދާލުމާއި ގުޅިގެން އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ ކުއްލި ބައްދަލުވުމަކަށް ގޮވާލައިފިއެވެ.

އޯއައިސީ އިން ގޮވާލައިފައިވަނީ މިފެށޭ ހަފްތާގައި ޖިއްދާގައި އެ ބައްދަލުވުން ބޭއްވުމަށެވެ.

މިބައްދަލު ކުރުމުގައި މަޝްވަރާ ކުރެވޭނީ ކީރިތި ޤުރުއާން އަންދާލައި ސްވިޑިން އިން ހިންގި ހައްދުފަހަނައަޅައިފައިވާ ނުބައި ޢަމަލު ހިންގުމުން އަޅާނެ ފިޔަވަޅަކާއި ދެމެދުގައި ކަމަށް އޯއައިސީގެ ތަރުޖަމާނެއް ޢަރަބް ނިއުސް އަށް ބުނެފައިވެއެވެ.

Advertisement

ޢިރާޤުން ސްވިޑިން އަށް ހިޖުރަ ކޮށް ސްވިޑިންގައި ދިރިއުޅެމުންދާ ސަލްވާން މޮމިކާ ނަމަކަށް ކިޔާ މީހަކު ވަނީ ސްޓޮކްހަމްގެ އެނެމް ބޮޑު މިސްކިތުގެ ކުރިމަތީގައި ކީރިތި ޤުރުއާން މުސްޙަފެއްގައި އަލިފާން ރޯކޮށްލައިފައެވެ.

މިކަމާއި ގުޅިގެން މެދުއިރުމަތީގެ ޤައުމުތަކުގައި އަންނަނީ ނުރުހުން ފާޅުކުރަމުންނެވެ. އެގޮތުން  ބައެއް ޤައުމުތަކުގެ ޚާރިޖީ ވުޒާރާތައް އަދި އެއްބައި ޤައުމުތަކުން ސްވިޑިން އަށް ކަނޑައަޅައިފައި ތިބޭ ސަފީރުން ވަނީ މި ޢަމަލު ކުށްވެރިކޮށްފައެވެ.

މިކަމާއި ގުޅިގެން އިއްޔެ ވަނީ އިރާޤް ގެ ބަޣްދާދުގައި ހުންނަ ސްވިޑިންގެ އެމްބަސީކައިރީ މުޒާހަރާ ކޮށްފައެވެ. އަދި ސްވިޑިން އާއި އޮންނަ ޑިޕްލޮމެޓިކް ގުޅުން ކަނޑާލުމަށް ގޮވާލައިފައިވެއެވެ.

މެދުއިރުމަތީގެ ޤައުމުތަކާއި ޚާއްސަ ކޮށް އިރާޤުގައި އެކަމާއި ގުޅިގެން އަޑު އުފުލަމުން ދާއިރު މިޢަމަލު ހިންގި މޮމިކާ ބުނެފައިވަނީ ކުރިއަށް 10 ދުވަސް ތެރޭގައި ސްޓޮކްހަމްގައި ހުންނަ ޢިރާޤްގެ އެމްބަސީ ކުރިމަތީގައި އޭނާ އަނެއްކާވެސް މުސްޙަފެއް އަންދާލާނެ ކަމަށާއި އަދި އެއާއި އެކު ޢިރާޤްގެ ދިދަވެސް އަންދާލާނެ ކަމަށް އޭނާ ވަނީ ބުނެފައެވެ.

އޭނާ ބުނެފައިވަނީ އޭނާގެ މިޢަމަލުގެ ސަބަބުން އެތައް ހާސް މަރުގެ އިންޒާރެއް އޭނާއަށް ލިބޭނެކަން މާކުރިންވެސް އެނގޭ ކަމަށެވެ. އަދި މިކަމަކީ ނަފްރަތު އުފައްދާ ޢަމަލެއްކަމަށް އޭނާ ނުދެކޭ ކަމަށް މޮމިކާ ވަނީ ބުނެފައެވެ.