ސްޕެއިންގެ ތަޖުރިބާކާރު މިޑްފިލްޑަރު ސެސް ފެބްރިގާސް ކުޅުން ހުއްޓާލިކަން އިއުލާނުކޮށްފައިވާއިރު، ކުރިއަށް އޮތް ސީޒަނުގައި އިޓާލިއަން ލީގުގެ ދެވަނަ ޑިވިޝަނުގެ ކުލަބެއްކަމަށްވާ ކޯމޯގެ ކޯޗުކަމާއި ހަވާލުވެފައިވަކަމަށް މީޑިއާ ރިޕޯޓްތައް ބުނެފިއެވެ.

ފަބްރިގާސްގެ ފުޓްބޯޅަ ކެރިއަރުގައި އޭނާ ވަނީ އާސެނަލް، ބާސެލޯނާ، ޗެލްސީ، މޮނާކޯގެ އިތުރުން ކޯމޯ އަށް ޖުމްލަ 738 މެޗު ކުޅެދީފައެވެ. އަދި އޭގެ ކާމިޔާބު ކެރިއަރުގައި ކުލަބާއި ގައުމީ ޓީމު ހިމެނޭ ގޮތަށް 15 ތަށި ކާމިޔާބުކޮށްފައިވާއިރު، އޭގެތެރޭގައި ގާތްގަނޑަކަށް 20 އަހަރުގެ ތެރޭގައި ސްޕެއިންގެ ފުރަތަމަ ވޯލްޑް ކަޕް ކާމިޔާބުކުރި ޓީމުގައި މުހިންމު ދައުރެއް އަދާކޮށްދީފައިވެއެވެ.

2003 ވަނަ އަހަރުގެ އޮކްޓޫބަރު މަހު އާސެނަލްއަށް ސީނިއަރ ޓީމަށް ކުޅެންފެށި ފެބްރިގާސް ވެގެން ދިޔައީ އުމުރުން 16 އަހަރާއި 177 ދުވަހުގައި އާސެނަލްގެ ފުރަތަމަ އެގާރައިގައި ކުޅުނު އެންމެ ޒުވާން ކުޅުންތެރިޔާއަށެވެ. އަދި އާސެނަލްގައި ހޭދަކުރި 8 އަހަރު ތެރޭގައި  އޭނާ ވަނީ އެކުލަބަށް 303 މެޗު ކުޅެދީ، އެޓީމާއި އެކު އެފްއޭ ކަޕް ކާމިޔާބުކޮށް ޗެމްޕިއަންސް ލީގުގެ ރަނަރަޕްކަން ހޯދި ޓީމުގައި ހިމެނިފައެވެ.

Advertisement

2011 ވަނަ އަހަރު އާސެނަލް ދޫކޮށް ބާސެލޯނާ އަށް ބަދަލުވުމަށްފަހު، އޭނާ ވަނީ އެކުލަބާއި އެކު ލަލީގާގެ އިތުރުން ކޮޕާ ޑެލްރޭ ޗެންޕިއަންކަން ހޯދާފައެވެ. އަދި 2014 ވަނަ އަހަރު ޗެލްސީއަށް ބަދަލުވުމަށްފަހު އެކުލަބުގައި ހޭދަކުރި ފަސް އަހަރުތެރޭގައި އޭނާ ވަނީ ޕްރެމިއާ ލީގު ޗެމްޕިއަންކަން ދެފަހަރު އަދި އެފްއޭ ކަޕާއި ލީގު ކަޕް ވެސް ކާމިޔާބުކޮށްފައެވެ.

ސްޕެއިންގެ  ގައުމީ ޓީމަށް 110 މެޗު ކުޅެދީފައިވާ ފެބްރިގާސް ވަނީ ގައުމީ ޓީމާއެކު ޔޫރޯ 2008 އަދި 2012 ގެ ޗެމްޕިއަންކަން ހޯދުމުގެ އިތުރުން 2010 ވަނަ އަހަރުގެ ވޯލްޑްކަޕް ފުޓްބޯޅަ މުބާރާތުގެ ޗެމްޕިއަންކަން ހޯދާފައެވެ. އަދި ވޯލްޑް ކަޕް ފައިނަލުގައި އިނިއެސްޓާ ކާމިޔާބުކުރި ލަނޑުޖެހުމަށް ފުރުސަތު ތަނަވަސްކޮށްދިނީ ވެސް ފެބްރިގާސް އެވެ.

މިހާރު ފެބްރިގާސް މަސައްކަތް ކުރަމުން އަންނަނީ ކޯމޯގެ ޔޫތު ޓީމާއި އެކުގައެވެ. އަދި ކުރިއަށް އޮތް ސީޒަނުގައި ކޯމޯގެ ސީނިއަރ ޓީމާއި ހަވާލުވެފައިވާއިރު، ދާދިފަހުން އިޓަލީގެ ދެވަނަ ޑިވިޝަންގައި އަންނަ ސީޒަނުގައި ކުޅޭ ސަމްޕްޑޯރިއާގެ ކޯޗަށް ޔުވެންޓަސްގެ ކުރީގެ ކޯޗު އަންދްރޭ ޕިރްލޯ ވަނީ ހަމަޖައްސާފައެވެ.