ދަ ޑިމޮކްރެޓްސް އުފައްދަން ބާއްވާ ޖަލްސާ އަށް ހުއްދަ ދެއްވައިފި ކަމަށް އިލެކްޝަންސް ކޮމިޝަންސް އިން ހުއްދަދީފިއެވެ.
މިކަން ހާމަ ކުރައްވައި އީސީގެ ނައިބު ރައީސް އިސްމާއިލް ޙަބީބް ކުރައްވައިފައިވާ ޓްވީޓެއްގައެވެ.
""ދަ ޑިމޮކްރެޓްސް"ގެ ނަމުގައި ސިޔާސީ ޕާޓީއެއް އުފެއްދުމަށް، ޖަލްސާ ބޭއްވުމުގެ ހުއްދަ، އެ ޕާޓީ އުފެއްދުމުގެ ހުއްދަ އަށް އެދިވަޑައިގަތް، ހ. ސީވީޑް އަލްއުސްތާޛް ޙަސަން ލަތީފަށް، އިލެކްޝަންސް ކޮމިޝަނުން މިއަދު ދީފި" ހަބީބް ވިދާޅުވެފައިވެއެވެ.
ދަ ޑިމޮކްރެޓްސް އަކީ އެމްޑީޕީގެ ތެރޭގައި ތިބި ދުވަސްވީ މެމްބަރުންތަކެއް އެމްޑީޕީ ދޫކޮށް ގޮސް އުފެއްދުމަށް މަސައްކަތް ކުރަމުންދާ ޕާޓީއެކެވެ.
ޕާޓީ ރަޖިސްޓްރީކުރަން ބޭނުންވާ އަދަދަށް މެމްބަރުންގެ ފޯމު ހަމަކޮށް، ޑިމޮކްރެޓްސްއިން އީސީއަށް ހުށަހެޅީ މިދިޔަ މަހުގެ ކުރީކޮޅުގައެވެ.
ޕާޓީ ރަޖިސްޓަރ ކޮށްދީފައި ނުވާތީ ޖޫން 18 ވަނަ ދުވަހު އެޕާޓީގެ މެމްބަރުން ވަނީ އީސީއަށް ގޮސް ރަޖިސްޓްރީ ނުލިބެނިސް ނުނިކުންނާނެ ކަމަށްބުނެ އިހްތިޖާޖެއްވެސް ކޮށްފައެވެ.
އެހެންނަމަވެސް އެކަމާ ގުޅިގެން އީސީގެ ރައީސް ފުއާދު ތައުފީގު ޑިމޮކްރެޓްސްގެ މެމްބަރުންނަށް މައުލޫމާތު ދެއްވަމުން ވިދާޅުވީ، އޭރު ތިބީ އީސީގެ ހަތަރު މެމްބަރުން ކަމަށާއި ރަޖިސްޓްރީ ކޮށްދޭން އޭރު ވޯޓު ދިނީ ދެ މެމްބަރުން ކަމަށާއި އަނެއް ދެ މެމްބަރުން ވޯޓު ދިނީ ރަޖިސްޓްރީ ކޮށް ނުދިނުމަށް ކަމަށެވެ.
ރަޖިސްޓްރީ ކޮށް ނުދިނުމަށް ވޯޓުދިން މެމްބަރުން ސަބަބެއް ކަމުގައި ދެއްކީ، އަދި ބަލަންޖެހޭ ކަންތައްތައް ހުރުން ކަމަށް ފުއާދު ވިދާޅުވިއެވެ.
ޑިމޮކްރެޓްސް ރަޖިސްޓަރީ ކޮށް ނުދިނުމަށް ވޯޓު ދީފައިވަނީ އީސީގެ މެމްބަރު ޢަލީ ނަޝާޠުއާއި މުހައްމަދު ޢާސިފްއެވެ.
Advertisement
This content is created and paid for by advertisers and does not involve Voice Journalists
