ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން އިދިކޮޅު ރިޔާސީ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭގޮތުން މިއަދު ކްރިމިނަލް ކޯޓުގައި ތާވަލުކުރި ޝަރީއަތުގެ އަޑުއެހުން ކެންސަލްކޮށްފި އެވެ.

މިއަދުގެ އަޑުއެހުންވެސް ކެންސަލްކޮށްފައިވަނީ މައްސަލައިގައި ދައުވާ ލިބޭ އަހުމަދު ކްރިކް ރިޒާ ބަލިވެ އުޅޭތީ އެވެ.

މިމައްސަލަ އީދު ޗުއްޓީގެ ކުރިން ތާވަލް ކުރި ތިން ދުވަހު ވެސް ކުރިއަށް ނުގެންދެވި، ވަނީ ކެންސަލް ކޮށްފައެވެ. 

މި މައްސަލައިގެ ގިނަ އަޑުއެހުންތަކެއް މި މަހު ވަނީ ތާވަލް ކޮށްފަ އެވެ. އެގޮތުން، އަންގާރަ ދުވަހާއި ބުރާސްފަތި ދުވަހުގެ އިތުރުން މިމަހުގެ 9، 11 އަދި 13 ވަނަ ދުވަހަށް ވެސް މިމައްސަލައިގެ ޝަރީއަތުގެ އަޑުއެހުންތައް ތާވަލުކޮށްފައި އެބައޮތެވެ.

މިމައްސަލައިގައި ރައީސް ޔާމީންގެ އިތުރުން ދައުވާ ކޮށްފައިވަނީ އަހުމަދު ކްރިކް ރިޟާގެ މައްޗަށާއި، ސަން ކޮންސްޓްރަކްޝަން އެންޑް އިންޖިނިއަރިން ޕްރައިވެޓް ލިމިޓެޑާއި ސަން އިންވެސްޓްމަންޓް ޕްރައިވެޓް ލިމިޓެޑަށެވެ. 

ފުއްގިރި މައްސަލައިގައި ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އަދި ރިޝްވަތު ގަބޫލު ކުރުމުގެ ދައުވާއެވެ. ރިޒާގެ މައްޗަށް ކުރަނީ މަނީ ލޯންޑަރިންގެ ދައުވާ އަދި ރިޝްވަތު ހިފުމުގައި މެދުވެރިއަކަށް ވުމުގެ ދައުވާއެވެ. ސަންގެ ދެ ކުންފުނީގެ މައްޗަށް މަނީ ލޯންޑަރިންގެ ދައުވާ އުފުލާފައިވެއެވެ.