އަނެއްކާވެސް ދިވެހި ޙައްޖާޖީއަކު ނިޔާވެއްޖެއެވެ.

ޙައްޖުކޯޕަރޭޝަންގެ ހަވާލުގައި ޙައްޖުވުމަށް ގޮސް މައްކާގައި ހުއްޓައި ނިޔާވެފައިވަނީ ނ. ހޮޅުދޫ އުމުރުން 70 އަހަރުގެ ޤާސިމް އިބްރާހިމް އެވެ. އޭނާ ނިޔާވީ ކުއްލި ގޮތަކަށް ކަމަށް ޙައްޖުކޯޕަރޭޝަނުން ހާމަކޮށްފައިވެއެވެ.

މިއީ މިއަހަރު ނިޔާވި ތިންވަނަ ދިވެހި ޙައްޖާޖީއެވެ.

Advertisement

އެގޮތުން ފުރަތަމަ ނިޔާވި ޙާޖީ ނިޔަވެފައި އޮއްވައި ފެނިފައިވަނީ ނޫރު ފަރުބަދަ ކައިރިންނެވެ. އެއީ އޭނާ ގެއްލިގެން ހޯދަމުންދާތާ 4ވަނަ އަށްވީ ދުވެހެވެ. ނޫރު ފަރުބަދަ ކައިރިން ނިޔާވެފައި އޮއްވައި ފެނުނީ އަލް ޙަރަމައިން ޙައްޖު ވަލް ޢުމްރާގެ ހަވާލުގައި ޙައްޖަށް ދިޔަ ރ މާކުރަތު  މުޙައްމަދު ނަސީމެވެ. އޭނާ ގެއްލުނީ މިނާގެ ދަތުރުގައި ހައްޖު މަހުގެ އަށް ވަނަ ދުވަހުގެ ރޭއެވެ.

ދެވަނަ މީހަކީ ދ. މާއެނބޫދޫ، ފިޔާތޮށިގެ، އަލީ ހަސަން (72) އެވެ. އަލީ ހަސަން އަކީވެސް ޙައްޖުކޯޕަރޭޝަންގެ ހަވާލުގައި ޙައްޖަށް ދިޔަ މީހެކެވެ. އޭނާ ނިޔާވީ މައްކާގެ ސަޢުދީ ޖާމަން ހޮސްޕިޓަލުގައި ފަރުވާދެމުން ދަނިކޮށެވެ.

މިއަހަރު ރާއްޖެއިންް 1140 ޙައްޖާޖީއަކު ވަނީ ޙައްޖުވުމަށް ސަޢުދީއަށް ގޮސްފައެވެ. އެއީ އަމިއްލަ 3 ޖަމާޢަތަކާއި ޙައްޖުކޯޕަރޭޝަންގެ ހަވާލުގައި ދިޔަ މީހުންނެވެ. މިއަހަރު ދިވެހި ޙައްޖާޖީންގެ ކަންކަން ބަލަހައްޓަވަން އަމީރުލް ޙައްޖެއްގެ ގޮތުގައި ރައީސް އިބްރާހިމް މުޙައްމަދު ޞާލިޙް ކަނޑައެޅުއްވީ ނައިބު ރައީސް ފައިސަލް ނަސީމެވެ.