ރައްޔިތުންގެ މަޖިލީހުގެ ރައީސް އަދި އެމްޑީޕީގެ ކުރީގެ ރައީސް މުހައްމަދު ނަޝީދަށް ވަފާތެރި މެންބަރުން އުފައްދާފައިވާ ޕާޓީ، ދަ ޑިމޮކްރެޓްސް އުފެއްދުމަށް ބާއްވާ ޖަލްސާއަށް އެމަނިކުފާނު ވަޑައިގަންނަވާނެ ކަމަށް ވިދާޅުވެއްޖެއެވެ. 

ދަ ޑިމޮކްރެޓްސް އުފެއްދުމަށް ބާއްވަންޖެހޭ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަން (އީސީ)ން މިއަދު ވަނީ ދީފައެވެ.

މި ޖަލްސާއަކީ ޕާޓީގެ އަސާސީ ޤަވާއިދާއި ޕާޓީގެ އުސޫލުތައް އެކުލަވައިލާ ފާސްކުރުމަށް ބާއްވާ ޖަލްސާއެކެވެ. އެޖަލްސާއަށް ފަހުގައި ޕާޓީ ރަޖިސްޓަރީކުރެވި ރަސްމީ ސިފައެއްގައި ޕާޓީއެއްގެ ގޮތުގައި ހަރަކާތްތެރިވެވޭނެއެވެ.

ޑިމޮކްރެޓްސް އުފެއްދުމަށް ބާއްވަން ޖެހޭ އެ ޖަލްސާ މި މަހު 5 ވަނަ ދުވަހުގެ ރޭ 8:30 ޣިޔާސުއްދީން ސްކޫލުގައި ބޭއްވުމަށް ހަމަޖެހިފައިވާއިރު، އެ ޖަލްސާގައި ބައިވެރިވެ ވަޑައިގަންނަވާނެ ކަމަށް ރައީސް ނަޝީދު މިއަދު ކުރެއްްވި ޓުވީޓެއްގައި ވަނީ ވިދާޅުވެފަ އެވެ. 

ރައީސް ނަޝީދު، ޑިމޮކްރެޓްސް އުފައްދާ ޖަލްސާގައި ބައިވެރިވެ ވަޑައިގަންނަވާނެ ކަމުގެ އިޝާރާތެއް، އެ ޕާޓީ ރެޖިސްޓްރީ ކުރުމަށް ހުށަހެޅި، ހެންވޭރު ހުޅަނގު ދާއިރާގެ މެމްބަރު ހަސަން ލަތީފުވެސް ވަނީ ދެއްވާފައެވެ. އެގޮތުން، ރައީސް ނަޝީދު އެމްޑީޕީން ވަކިވެވަޑައިގެންނެވުމަށްފަހުގައި، ހަސަން ލަތީފު މީޑިއާ ތަކަށް މައުލޫމާތު ދެއްވަމުން ވަނީ ޑިމޮކްރެޓްސް އިން އެންމެ އަވަހަށް ބާއްވާ ޖަލްސާ އެއްގައި ނަޝީދު ބައިވެރިވެ ވަޑައިގަންނަވާނެ ކަމަށް ވިދާޅުވެފައެވެ.

ދަ ޑިމޮކްރެޓްސް އުފެއްދުމުގެ ހުއްދަ ދިންތާ ހަފުތާއެއްހައި ދުވަސްތެރޭގައި ޕާޓީ އުފެއްދުމުގެ ހުއްދަ ދިނުމަށް ބޭނުންވާ 3،000 މެންބަރުންގެ ސޮއި އެ ޕާޓީން ހަމަކޮށް އިލެކްޝަންސް ކޮމިޝަނަށް ހުށަހެޅި ނަމަވެސް އެ ފޯމުތަކުގެ ސައްހަކަން ކަށަވަރުކުރުމަށްފަހު، ފޯމު ޕްރޮސެސްކޮށް ނިންމައި އިލެކްޝަންސް ކޮމިޝަނުން ދޭންޖެހޭ ހުއްދަ ދީފައި މިވަނީ، އެކަމާއި ލަސްވެގެން އެ ޕާޓީން ނުރުހުން ފާޅުކޮށް، މައްސަލަ ސްޕްރީމް ކޯޓާއި ހަމައަށް ލާފައި ވަނިކޮށެވެ.