މާލެ މީހުންނަށް ހިލޭ ގޯތި ދިނުމަށް އިއުލާނުކުރި ލިސްޓުގައިވާ ފަރާތްތަކަށް ގޯތި ދޫކުރުމަށް ގުޅިފަޅު ހިއްކުމަށް 1.7 ބިލިއަން ރުފިޔާގެ ލޯނެއް ނަގައިގެން ފަޅުގެ ދެވަނަ ފިޔަވަހި ހިއްކުމުގެ މަސައްކަތް މިއަދު ފަށައިފިއެވެ.

މި މަސައްކަތް ފައްޓަވައިދެއްވީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.

ގުޅިފަޅު ހިއްކުމަށް ސަރުކާރުންވަނީ ޔޫރަޕުގެ ތިން ބޭންކަކުން ޖުމްލަ 101،787،500 (ސަތޭކަ އެއް މިލިއަން ހަތްލައްކަ އަށްޑިހަ ހަތްހާސް ފަސްސަތޭކަ) ޔޫރޯގެ ލޯނެއް ނަގާފައެވެ. އެއީ ޖުމްލަ 1.7 ބިލިއަން ރުފިޔާގެ ލޯނެކެވެ. 

ގުޅިފަޅު ބިންހިއްކުމުގެ މަޝްރޫޢަކީ، ބޮސްކާލިސް ވެސްޓްމިންސްޓަރ ކޮންޓްރެކްޓިންގ ލިމިޓެޑާ ހަވާލުކުރައްވައިގެން ސަރުކާރުން ކުރިޔަށް ގެންދަވާ މަޝްރޫޢުއެކެވެ. މިމަޝްރޫޢުގެ ދަށުން ޖުމުލަ 150 ހެކްޓަރުގެ ބިން ހިއްކާނެއެވެ. މިބިމުގެ ތެރޭގައި ސަރުކާރުގެ ބިންވެރިޔާ ޕްރޮގްރާމްގެ ދަށުން ގޯތި ދޫކުރާ ބިމާއި، މާލޭ ވިޔަފާރި ބަނދަރު، ގުޅިފަޅަށް ބަދަލުކުރުމަށް ބޭނުންވާ ބިން ހިމެނެއެވެ.

މާލޭ ރައްޔިތުންނަށް ގޯތި ދޫކުރުމަށް ގުޅިފަޅު ހިއްކައިގެން އެތަނުން، މަދުވެގެން 2000 ގޯތި ދޫކުރުމަށް ސަރުކާރުން ވަނީ ނިންމާފައެވެ. 

ގުޅީފަޅުގެ އިތުރުން، ގިރާވަރުފަޅު ހިއްކުމުގެ މަސައްކަތް މިހާރުވެސް ހިނގަމުންދާއިރު، މިހާރު އެފަޅުން 20 ހެކްޓަރުގެ ބިން ހިއްކިފައިވާ ކަމަށާއި، ސަރުކާރުން ނިންމާފައި ވަނީ ގިރާވަރުފަޅުންވެސް މަދުވެގެން 2000 ގޯތި ދޫކުރުމަށް ކަމުގައި ރައީސުލްޖުމްހޫރިއްޔާ މިއަދު ވަނީ ވިދާޅުވިއެވެ. އަދި ހުޅުމާލެއިން 2200 ގޯތި ދޫކުރާއިރު، މިބުރުގައި ޖުމުލަ 6200 ގޯތި ދޫކުރުމަށް ވަނީ ނިންމާފައި ކަމުގައި ރައީސުލްޖުމްހޫރިއްޔާ ވިދާޅުވިއެވެ.