19 ވަނަ ރައްޔިތުންގެ މަޖިލީސް ހާ ޚުދުމުހުތާރުކޮށް މަޖިލީސް ހިންގި އެއްވެސް ދައުރެއް ދެކިވަޑައިނުގަންނަވާ ކަމަށް ރައްޔިތުންގެ މަޖިލީހުގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެ އެވެ.
ބިގޭ މިފަދައިން ވިދާޅުވެފައިވަނީ ދައުރުން ބޭރުން މިއަދު ޖަލްސާއެއް ބާއްވާ ޖަލްސާ ފެށިތާ 3 މިނެޓްތެރޭ ޖަލްސާ ނިންމާލާފައިވާއިރު، މަޖިލީހަށް ހުށައެޅިފައިވާ މުހިންމު މަސައްކަތްތައް ވެސް ކުރިއަށް ނުގެންދެވި މަޖިލީސް ހުއްޓިފައިވާތީ އެމްޑީޕީގެ ޕާލަމެންޓްރީ ގުރޫޕުގެ ކަންބޮޑުވުންތައް ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.
ބިގޭ ވިދާޅުވީ މަޖިލީހުގެ މަސައްކަތްތައް ހުއްޓާނުލާ ކުރިއަށް ގެންދެވޭނެ ގޮތްތައް އެމްޑީޕީގެ ޕީޖީން ހޯދާ، އެފަދައިން މަސައްކަތް ކުރަމުންދާ ކަމަށެވެ. އެގޮތުން މަޖިލީހުގެ ހިންގުމުގެ ގަވައިދުތަކަށް ވެސް އިސްލާހުތަކެއް ހުށައަޅާ، ކޮމެޓީތައް އެކުލަވާލުމަށް ވެސް ބާރުއަޅުއްވަމުންދާކަން އޭނާ ފާހަގަކުރެއްވި އެވެ.
އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ)
"އަޅުގަނޑަށް މަޖިލީހުގައި ހޭދަކުރެވުނު ދެތިން ދައުރެއްގައި އަޅުގަނޑަށް ވެސް މަޖިލީހުގައި މަސައްކަތް ކުރެވިއްޖެ. އެގޮތަށް ކުރެވުނު އިރު މިހާތަނަށް މިހާ ޚުދުމުހުތާރުކޮށް މަޖިލީސްގަ ޖަލްސާތައް ޤަވައިދަށް އެއްވެސް ހުރުމަތްތެރިކޮށް ހިތުމެއް ނެތި ގެންދާ މަންޒަރެއް މިހާތަނަށް އަޅުގަނޑަށް ފެނިފައެއް ނެތް"
އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ)
ބިގޭ އިތުރަށް ވިދާޅުވީ ނަޝީދު ރިޔާސަތުގައި އިންނަވައިގެން ރައްޔިތުން މަޖިލީސް މެމްބަރުންނަށް ހަވާލުކޮށްފައިވާ ޒިންމާތަކަށް ވަރަށް ބޮޑަށް ހުރަސްއަަޅުއްވަމުން ގެންދަވާ ކަމަށެވެ.
އެހެން ނަމަވެސް، އެފަދައިން ޚުދުމުހުތާރު ކަމާއެކު މަޖިލީސް ހިންގެވުމަށް ފުރުސަތު ދީގެން އެމްޑީޕީ ޕާލަމެންޓްރީ ގުރޫޕު ބަލަން ނުތިއްބަވާނެ ކަމަށާއި، މަޖިލީސް ހިންގުން ކުރިއަށް ގެންދިއުމަށް ކުރެވެން އޮތް ހުރިހާ މަސައްކަތެއް ކޮށް، ފުރޮޅަން ޖެހުނު ކޮންމެ ގާކޮޅެއް ފުރޮޅައިގެން ނަމަވެސް މަޖިލީސް ހިންގުމުގެ މަސައްކަތް ކުރައްވާނެކަމަށް ބިގޭ ވިދާޅުވި އެވެ.
Advertisement
This content is created and paid for by advertisers and does not involve Voice Journalists
