އޭސީ މިލާނަށް ކުޅެމުން އައި އިޓަލީގެ ޒުވާން މިޑްފީލްޑަރު ސަންދްރޯ ޓޮނާލީ، އިނގިރޭސި ޕްރިމިއަރ ލީގުގެ ނިއުކާސަލް ޔުނައިޓެޑަށް ސޮއިކޮށްފިއެވެ.

މީޑިއާ ރިޕޯޓްތައް ބުނާ ގޮތުގައި ޓޮނާލީ ނިއުކާސަލް ޔުނައިޓެޑާއެކު ސޮއިކުރީ ފަސް އަހަރުގެ އެއްބަސްވުމެއްގައެވެ. އުމުރުން 23 އަހަރުގެ ޓޮނާލީ އަކީ އަންނަ ސީޒަންގައި ޗެމްޕިއަންސް ލީގުގައި ވާދަކުރުމަށް ތައްޔާރުވަމުން އަންނަ ނިއުކާސަލް ޔުނައިޓެޑް އިން ގެނައި ފުރަތަމަ ކުޅުންތެރިޔާއަށެވެ. ރިޕޯރޓްތައް ބުނާގޮތުން ޓޮނާލީ ނިއުކާސަލް ޔުނައިޓެޑް ބަދަލުވެފައި ވަނީ އިޓަލީގެ އެންމެ އަގުބޮޑު ކުޅުންތެރިޔާގެ ގޮތުގައި 55 މިލިއަން ޔޫރޯގެ ޓްރާންސްފާ ފީއެއްގައެވެ.

2021 ވަނަ އަހަރު ފަސް އަހަރު ދުވަހުގެ އެއްބަސްވުމެއްގެ ދަށުން އޭސީ މިލާނާއި ގުޅުނު ޓޮނާލީ ވަނީ އެޓީމާއެކު ލީގު ޗެމްޕިއަންކަން ހޯދުމުގެ އިތުރުން އެޓީމަށް ކުޅެދިން 130 މެޗުގައި 7 ލަނޑު ކާމިޔާބުކޮށްފައެވެ. މީގެއިތުރުން މިދިޔަ ސީޒަންގައި އޭސީ މިލާން ޗެމްޕިއަންސް ލީގު ސެމީފައިނަލަށް ގެންގޮސްދިނުމުގައި ވެސް ޓޮނާލީ ވަނީ  މުހިއްމު ދައުރެއް އަދާކޮށްދީފައެވެ.

މީގެ އިތުރުން މިހާރު ޖޯޖިޔާގައި ކުރިއަށްދާ 21 އަހަރުން ދަށުގެ ޔޫރޯ ފުޓްބޯޅަ މުބާރާތުގައި ވާދަކުރި އިޓަލީގެ 21 އަހަރުން ދަށުގެ ޓީމުގައި ވެސް ޓޮނާލީ އަކީ މުހިންމު ކުޅުންތެރިއެކެވެ.

ނިއުކާސަލްއަށް ސޮއިކުރުމަށްފަހު އިގިރޭސި މީޑިއާއަށް ދިން އިންޓަވިއުއެއްގައި ޒުވާން މިޑްފީލްޑަރު ބުނެފައިވަނީ އޭނާއަށް ކުރި އިތުބާރުގެ ބަދަލު ދަނޑުމަތިން ދޭން ބޭނުންވާ ކަމަށެވެ.