ބައިނަލްއަގުވާމީ ޔޯގާ ދުވަސް ފާހަގަކުރުމަށް ކުޑަ ކުދިންނަށް ޚާއްސަކޮށްގެން ވެސް ޔޯގާ ހެދުމުގެ ހަރަކާތެއް ބާއްވާފައިވާކަން ހާމަވެއްޖެއެވެ. 

މިކަން ހާމަކޮށް، ރާއްޖޭގައި ހުންނަ، އިންޑިއަން ކަލްޗަރަލް ސެންޓަރު، އައިސީސީ އިން މީސްމީޑިއާގައި ކޮށްފައިވާ ޕޯސްޓެއްގައި ބުނީ، ކުޑަކުދިންނަށް ޚާއްސަކޮށްގެން ބޭއްވި މި ޔޯގާ ސެޝަން ބާއްވާފައި ވަނީ ޖޫން 19، 2023 ގައި އައިސީސީގެ ސެންޓަރުގައި ކަމަށެވެ.

ސިއްރިއްޔާތުގައި ކުރިއަށް ގެންދިޔަ މި ހަރަކާތް ބޭއްވި ކަންވެސް އިއުލާން ކޮށްފައި މިވަނީ އޭގެ އެތައް ދުވަހެއް ފަހުން އިއްޔެގެ ވަގުތެއްގައެވެ. 

ޔޯގާ އަކީ އިސްލާމް ދީނުގައި ހުއްދަ ނޫން، ޣައިރު ދީން ތަކުގެ އަޅުކަމެއް ކަމަށް ދީނީ ޢިލްވެރިން ތަކުރާރުކޮށް އަންނަނީ ބުނަމުންނެވެ. އެގޮތުން ފާއިތުވި އަހަރު، އެދުވަސް ފާހަގަކުރާކަން އިއުލާން ކުރުމާއި އެކު އެކަމާއި ދެކޮޅަށް ގިނަ އިލްމްވެރިންނާއި ދީނަށް ލޯބިކުރާ މީހުން އަޑު އުފުލާފައިވާއިރު، ގަލޮޅު ދަނޑުގައި ކުރިއަށް ގެންދިޔަ އެ ހަރަކާތް، ފުލުހުންގެ ސެކިޔުރިޓީ ފަޅާލާފައި ވަދެ ވަނީ ހުއްޓުވާފައެވެ. 

އެކަމާއި ގުޅިގެން ހިނގައިދިޔަ އެ ހަމަނުޖެހުންތަކަށްފަހު، މި އަހަރު ބައިނަލްއަގުވާމީ ޔޯގާ ދުވަސް ފާހަގަކުރުމަށް ޔޯގާ ހަރަކާތް ބާއްވާފައިވަނީ ސިއްރިއްޔާތުގައި އިންޑިިއާ އެންބަސީ ހުންނަ ސަރަހައްދު ބަންދުކޮށްގެންނެވެ. 

އެ ހަރަކާތް ބޭއްވިކަން އަންގައި އިންޑިއާ ހައި ކޮމިޝަނުން ޓުވީޓު ކުރީ އެކަން ނިމުނު ފަހުންނެވެ. އެ ޓުވީޓުގައި ބުނެފައިވަނީ ބައިނަލްއަގްވާނީ 9 ވަނަ ޔޯގާ ދުވަސް ފާހަގަކޮށްފައިވަނީ ސަރުކާރުގެ މަންދޫބުންތަކާއި، ޑިޕްލޮމަޓިކް ކޯޕުންނާއި ޔޯގާއަށް ޝައުގުވެރިވާ ބައިވެރިންނާއި އެކުގައި ކަމަށެވެ.

އެ ދުވަސް ފާހަގަކޮށްފައިވަނީ ވަރުގަދަ ސަލާމަތީ ފިޔަވަޅުތަކާއިއެކު އެމްބަސީ ހުންނަ ގޯޅި ދެކޮޅުގައި ގިނަ އަދަދެއްގެ ފުލުހުން ބައިތިއްބައިގެންނެވެ.