އިންޖީނު ހުއްޓުނު ދޯންނަކަށް މޯލްޑިވްސް ނޭޝަނަލް ޑިފެންސް ފޯސްގެ ކޯސްޓް ގާޑުން އެހީތެރިކަން ފޯރު ކޮށްދީފިއެވެ.

ނ އަތޮޅުން ފުރައިގެން މާލެ ދަތުރު ކުރަމުން ދިޔަ މި ދޯނީގެ އިންޖީނު ހުއްޓިފައިވަނީ ތެޔޮ ހުސްވެގެން ކަމަށް އެމްއެންޑީއެފުން ބުނެފައިވެއެވެ. އަދި ރޭ 21:00 ހާއިރު އެކަމުގެ ރިޕޯޓު އެމްއެންޑީއެފަށް ލިބުނު ކަމަށް ވެސް ބުނެފައިވެއެވެ. ހާދިސާގެ ރިޕޯޓު ލިބުމާއި އެކު  އެ ދޯންޏަށް އެހީތެރިކަން ފޯރުކޮށްދިނުމަށް އެމްއެންޑީއެފް ކޯސްޓްގާޑް ނޫރައްދީން އެ ސަރަހައްދަށް ދިޔަ ކަމަށް އެމްއެންޑީއެފުން ބުނެފައިވެއެވެ.

ޖުމްލަ 32 މީހުންނާއެކު ދަތުރުކުރަމުން ދިޔަ އެ ދޯނި އޮތް ސަރަހައްދަށް، ކޯސްޓްގާޑް ނޫރައްދީން ދެވުމުން، އެ ދޯނީގައި ތިބި 12 ކުޑަކުދިންނާއި، ހަތް އަންހެނުންނާއި، ތިން ފިރިހެނުން ކޯސްޓްގާޑް ނޫރައްދީންއަށް ނަގައި، ރޭ 10:45 ހާއިރު އެމީހުން ވަނީ ހުޅުމާލެއަށް ގެންގޮސްފައިވާ ކަމަށް އެމްއެންޑީއެފުން ހާމަކޮށްފައިވެއެވެ. އަދި ބާކީ 10 މީހުން ވަނީ ދޯނީގައި މަޑުކޮށްފައި ވާއިރު މި ދޯނިން ދަތުރުކުރި އެންމެންގެ ހާލު ވެސް ރަނގަޅު ކަމަށް އެމްއެންޑީއެފުން ބުނެއެވެ.