ރާއްޖޭގައި ފުޅާ ދާއިރާއެއްގައި ފަންނީ ހުނަރުވެރިކަމާއި މަސައްކަތްތެރިކަމުގެ ތަމްރީނު ފޯރުކޮށްދެމުން އަންނަ، މޯލްޑިވްސް އިންސްޓިޓިއުޓް އޮފް ޓެކޮނޮލޮޖީ (އެމް.އައި.ޓީ) ކޮލެޖެއްގެ ގޮތުގައި މިނިސްޓްރީ އޮފް ހަޔަރ އެޑިޔުކޭޝަނުގައި މިއަދު ރަޖިސްޓަރީކޮށްފިއެވެ.

އެ މަރުކަޒަށް ކޮލެޖެއްގެ ދަރަޖަ ދީ، މަރުކަޒުގެ ރަޖިސްޓަރީ ހަވާލުކުރީ، މިނިސްޓްރީ އޮފް ހަޔަރ އެޑިޔުކޭޝަންގެ ނޫރު މާލަމުގައި މިއަދު މެންދުރުފަހު ބޭއްވި ރަސްމިއްޔާތެއްގައެވެ.

އެ ރަސްމިއްޔާތުގައި މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހީމް ޙަސަނާއި މިނިސްޓްރީގެ އިސްވެރިންނާއި އެމް.އައި.ޓީގެ ވެރިން ބައިވެރިވެ ވަޑައިގަތެވެ.

އެމް.އައި.ޓީގެ ރަޖިސްޓަރީ، އެ ކޮލެޖާ މިނިސްޓަރ ހަވާލުކޮށްދެއްވިއިރު ކޮލެޖްގެ ފަރާތުން ރަޖިސްޓަރީއާ ހަވާލުވެ ވަޑައިގަންފައިވަނީ ކޮލެޖްގެ ޑިރެކްޓަރ އޮފް ޕްރޮގްރާމްސް އާދަމް ޙަލީމެވެ.

މިކަމާއި ގުޅިގެން ހަޔަރ އެޑިއުކޭޝަން މިނިސްޓްރީއިން ނެރުނު ބަޔާނުގައި ބުނެފައިވަނީ ރަސްމިއްޔާތުގައި ވާހަކަފުޅު ދައްކަވަމުން ހަޔަރ އެޑިޔުކޭޝަން މިނިސްޓަރ ވަނީ ރާއްޖޭގެ ފަންނީ ހުނަރުވެރިކަމާއި މަސައްކަތްތެރިކަމުގެ ދާއިރާ ތަރައްޤީކޮށް ކުރިއެރުވުމަކީ މި ސަރުކާރުގެ މުހިންމު އަމާޒެއް ކަމަށް ފާހަގަކުރައްވާ މިފަދަ ތަމްރީނުދޭ މަރުކަޒުތައް ޕީ.ޕީ.ޕީގެ ދަށުން ރާއްޖޭގެ އެކި ސަރަހައްދުތަކުގައި ގާއިމުކުރުމަށްޓަކައި މިނިސްޓްރީން މަސައްކަތްތަކެއް ކުރަމުންދާ ކަމަށް ވިދާޅުވެފައި ކަމަށެވެ.

މިއާއިއެކު ރާއްޖޭގެ ފަންނީ ހުނަރުވެރިކަމާއި މަސައްކަތްތެރިކަމުގެ ދާއިރާ ފުޅާކޮށް ތަރައްޤީކުރުމުގައި ޕްރައިވެޓް ސެކްޓަރގެ ދައުރު ވަރަށް މުހިންމު ކަމުގައި ވެސް މިނިސްޓަރ ފާހަގަކުރެއްވިއެވެ.

އެގޮތުން ޕްރައިވެޓް ސެކްޓަރއިން ވޮކޭޝަނަލް ކޮލެޖެއް ގާއިމުވެގެން އައުމަކީ، މީހުން ބިނާކުރުމަށްޓަކައި ސަރުކާރުން ކުރަމުންދާ މަސައްކަތަށް އިތުރު ފަހިކަމެއް ލިބިގެންދާނެ ކަމެއް ކަމަށް މިނިސްޓަރ ވިދާޅުވިއެވެ.

މީގެ އިތުރުން މިނިސްޓަރ ވަނީ ރާއްޖޭގައި ގާއިމުކުރެވުނު ފަންނީ ހުނަރުވެރިކަމާއި މަސައްކަތްތެރިކަމުގެ ދާއިރާގެ ފުރަތަމަ ޕްރައިވެޓް ކޮލެޖްކަމުގައި އެމް.އައި.ޓީ ވެގެން ދިއުމުން ޚާއްޞަ މަރުޙަބާއެއް މިނިސްޓްރީގެ ފަރާތުން ދަންނަވާފައެވެ.

އަދި މި ދާއިރާގައި އެމް.އައި.ޓީގެ ހިއްސާ އިތުރަށް ފުޅާވެ، އެ ދާއިރާއިން ކުރިއަށްދާން ބޭނުންވާ ދިވެހީންނަށް އިތުރު ގިނަ ފުރުސަތުތަކެއް ފަހިވެގެން ދާނެކަމަށް އުއްމީދުކުރައްވާ ކަމުގައި ވެސް މިނިސްޓަރ ވިދާޅުވިއެވެ.

އެމް.އައި.ޓީ ރާއްޖޭގެ ކޮލެޖްތަކުގެ ލިސްޓަށް އެރުމުން މިހާރު ރާއްޖޭގައި ހުރި ކޮލެޖްތަކުގެ އަދަދަކީ 11 އެވެ. އެއީ، ޕްރައިވެޓް 9 ކޮލެޖާއި ސަރުކާރުގެ 2 ކޮލެޖެވެ.