މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މި ވެރިކަމުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ގެންދަވަނީ ދައުލަތުގެ މާލިއްޔާއަށް ޚިޔާނާތްތެރިވާ މީހުން ހިމާޔަތްކުރުމަށް މަސައްކަތް ކުރަމުން ކަމަށް މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެ އެވެ.
ނަޝީދު މިފަދައިން ވިދާޅުވެފައި ވަނީ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ގެ ޚިޔާނާތުގެ މައްސަލައެއް ބަލަމުންދާ ކަމަށް ފުލުހުން ބުނެފައިވާ ދަނޑިވަޅެއްގަ އެވެ.
ނަޝީދު ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގައި، ދައުލަތުގެ ފައިސާއަށް ޚިޔާނާތްތެރިވާ މީހުން ހިމާޔަތްކޮށް، އެފަދަ މައްސަލަތަކުގައި ފުލުހުންނާއި، ޕްރޮސެކިއުޓާ ޖެނެރަލް ގެ އޮފީހާއި، ކޯޓުތަކަށް ނުފޫޒު ފޯރުވާކަން ފާހަގަކުރެވޭ ކަމަށެވެ.
މިހާރު ފެންމަތިވެފައިވާ އާރުޑީސީގެ މައްސަލައިގައި ސަރުކާރުން އަމަލުކުރަމުންދާ ގޮތުން ވެސް ދައުލަތުގެ މާލިއްޔާއަށް ޚިޔާނާތްތެރިވާ ފަރާތްތައް ހިމާޔަތްކުރުމަށް ސަރުކާރުން މަސައްކަތް ކުރަމުންދާކަން ހާމަވެގެންދާ ކަމަށް ނަޝީދު ވިދާޅުވި އެވެ.
އެކަން ފާހަގަކުރައްވާ ނަޝީދު ވިދާޅުވީ އެމްޑީޕީގެ ވެރިކަމެއްގައި މިފަދަ ކަންކަން ފެނިގެން ދިއުމަކީ ވަރަށް ލަދުވެތިކަމެއް ކަމަށެވެ.
އެމަނިކުފާނު އެފަދައިން ވިދާޅުވެފައިވަނީ ރައީސް ޞާލިހަކީ ވައްކަމާއި ކޮރަޕްޝަނަށް ދެއްވާނީ "ޒީރޯ ޓޮލަރެންސް" ކަމަށް ވިދާޅުވަމުން އަންނަ ފަރާތެކެވެ.
"ދައުލަތުގެ ފައިސާ އަށް ޚިޔާނާތްތެރިވާ މީހުން ހިމާޔަތްކޮށް، އެފަދަ މައްސަލަތަކުގައި އެމްޕީއެސް، ޕީޖީ އަދި ކޯޓުތަކަށް ނުފޫޒު ފޯރުވާ އޮއްބާލަން ރައީސް ޞާލިހުގެ މި ދައުރުގައި ވަރަށް ފާހަގަވޭ. މިހާރު ފެންމަތިވެފައިވާ އާރުޑީސީގެ ޚިޔާނާތުގެ މައްސަލައަކީ ވެސް މިފަދަ އާންމު ކަމެއް. މިއީ އެމްޑީޕީގެ ވެރިކަމެއްގައި ލަދުވެތިކަމެއް"
މަޖިލީހުގެ ރައީސް ނަޝީދު
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އާ ގުޅުންހުރި މައްސަލައެއް ބަލަމުންދާ ކަމަށް ފުލުހުން ވަނީ ބުނެފައެވެ.
ފުލުހުން މިގޮތަށް ބުނެފައިވަނީ އާރުޑީސީގެ ބޭންކް އެކައުންޓުން ކުންފުނީގެ އިސް ފަރާތްތަކަށް 13 މިލިއަން ރުފިޔާ ޖަމާކުރި ކަމުގެ މައްސަލައެއް ބަލަމުންދޭތޯ އެ އިދާރާގެ މީޑިއާ ގްރޫޕެއްގައި ނޫސްވެރިއަކު ސުވާލުކުރުމުންނެވެ.
ފުލުހުން ބުނީ އާރުޑީސީއާ ގުޅުންހުރި މައްސަލައެއް ތަހުގީގު ކުރާ ކަމަށެވެ. ނަމަވެސް އިތުރު ތަފްސީލެއް ނުދެއެވެ.
ރާއްްޖޭގެ ބައެއް މީޑިއާތަކުން ވަނީ އާރުޑީސީގެ ސިއެފްއޯގެ އެކައުންޓަށް 13 މިލިއަން ރުފިޔާ ޖަމާކޮށްފައިވާ ކަމަށް ރިޕޯޓްކޮށްފައެވެ. އަދި މިކަމުގައި އާރުޑީސީގެ މެނޭޖިންގ ޑިރެކްޓަރު މޫސާ އަލީ މަނިކު (މޫކޭ) ވެސް ހިމެނޭކަމަށް ބައެއް މީޑިއާތަކުން ވަނީ ރިޕޯޓް ކޮށްފައެވެ.
އެހެން ނަމަވެސް މިކަމާއި ގުޅޭގޮތުން ފުލުހުން އިތުރު ތަފްސީލެއް ހާމަކޮށްފައި ނުވާތީ ގިނަ ބައެއްގެ ފާޑުކިޔުން ވަނީ ފުލުހުންނަށް އަމާޒުވެފަ އެވެ.
Advertisement
This content is created and paid for by advertisers and does not involve Voice Journalists
