ދައުލަތުގެ ޚަރަދަށް ޒިންމާވުމުގެ ޤާނޫނު ތަޅުއަޅުވާފަ ސަރުކާރުން ޓީ-ބިލު ވިއްކަމުން ދިއުމަކީ ސަރުކާރުން ހިންގާ ބޮޑު ޖަރީމާއެއް ކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުޙައްމަދު ސައީދު ވިދާޅުވެއްޖެ އެވެ. 

ސައީދު މިފަދައިން ވިދާޅުވެފައި ވަނީ ސަރުކާރުގެ ހަރަދުތައް ފޫބެއްދުމަށް ތިން ބިލިއަން ރުފިޔާގެ ޓްރެޝަރީ ބިލު ވިއްކާފައިވާކަން ފިނޭންސް މިނިސްޓްރީން ހާމަކުރުމާއި ގުޅިގެން ކަންބޮޑުވުން ފާޅުކުރައްވާ ކުރެއްވި ޓްވީޓެއްގަ އެވެ. 

ފިނޭންސް މިނިސްޓްރީން ވިއްކާފައިވަނީ 28 ދުވަހުން އަނބުރާ ދެއްކުމަށް 948 މިލިއަން ރުފިޔާގެ ޓީބިލަކާއި 98 ދުވަހުން އަނބުރާ ދެއްކުމަށް 230 މިލިއަން ރުފިޔާގެ ޓީބިލެކެވެ.

މީގެ އިތުރުން 183 ދުވަހުން އަނބުރާ ދެއްކުމަށް 119 މިލިއަން ރުފިޔާގެ ޓީބިލަކާއި 364 ދުވަހުން އަނބުރާ ދެއްކުމަށް 1.76 ބިލިއަން ރުފިޔާގެ ޓީބިލެކެވެ. ޓީބިލުގެ އިންޓްރެސްޓް ރޭޓް އުޅެނީ 3.50 އިންސައްތަ އާއި 4.60 އިންސައްތައާ ދެމެދުގަ އެވެ.

ފިނޭންސް މިނިސްޓްރީގެ އެންމެ ފަހުގެ ތަފާސްހިސާބުތައް ދައްކާ ގޮތުން ޓީބިލާއި ބޮންޑަށް ސަރުކާރުން ދައްކަންޖެހޭ އަދަދު 73.6 ބިލިއަން ރުފިޔާއަށް އަރަ އެވެ.  

އެކަމަށް އަލިއަޅުވާލައްވާ ސައީދު ކުރެއްވި ޓްވީޓުގައި ވިދާޅުވީ ދައުލަތުން ޚަރަދަށް ޒިންމާ ނުވަނީ މިހާ ގިނަ އަދަދެއްގެ ޓީ ބިލު ވިއްކުމަށް ކަމަށެވެ. ރަހުނު ކުރަމުން ކުރަމުން ގޮސް މިހާރު "ނިކަމެތި ރައްޔިތުންގެ ޖީބުތައް" ވެސް ރަހުނު ކޮށްފައިވާކަމަށް ސައީދު ވިދާޅުވި އެވެ. 

އޭނާ ވިދާޅުވީ ޓީ-ބިލު އިޝޫ ކުރަން ޖެހުމުން، އަބަދުވެސް އަދި ހުރިހާ ސަރުކާރަކުން ވެސް އެކަން ކުރަމުން އަންނަ ކަމަށެވެ. 

އެހެން ނަމަވެސް ޚަރަދަށް ޒިންމާ ނުވުމުގެ ޤާނޫނުގައި ތަޅުއަޅުވާ ޓީ-ބިލު އިޝޫކުރަމުން ދިއުމަކީ ސަރުކާރުން ހިންގާ ބޮޑު ޖަރީމާއެއް ކަމަށާއި، މިފަދައިން ޖަރީމާތައް ހިންގަމުންދާއިރު، ސަރުކާރު ޖަވާބުދާރީ ކުރުވަން އޮތް ރައްޔިތުންގެ މަޖިލީހުގެ މާލިއްޔަތު ކޮމެޓީގެ ޗެއާ އިސްވެ ހުންނަވާ އުޅުއްވަނީ ރައީސް ޞާލިހުގެ ކެމްޕޭނުގައި ކަމަށް ސައީދު ވިދާޅުވި އެވެ. 

އެކަންކަން ފާހަގަކުރައްވާ ސައީދު ވަނީ މިހާ ހިސާބަށް ކަންކަން ބޮއްސުންލާފައިވާއިރު ރައްޔިތުން ދައްކަން ޖެހޭ ފައިސާ ނުދެއްކުމުން ކުށްވެރިވެދާނެ މޯރަލް އިޝޫއެއް އޮވެދާނެތޯ ވެސް ސުވާލު ކުރައްވާފަ އެވެ.