މިދިޔަ މަހު 28 ވަނަ ދުވަހުގެ ރޭ ފަތިހު ހިނގި އެކްސިޑެންޓެއްގައި އަނިޔާވި އަލީ ހަފީޒު އެކްސިޑެންޓްވީ އޭނާގެ ސަބަބުން ކަމަށް ސައިކަލު ދުއްވި ޒުވާނާ ބުނެފިއެވެ.

ސައިކަލު ދުއްވި ޒުވާނާ ޝަމްޢާން ޢަބްދުއްޝުކޫރް ގެ ފަރާތުން އޭނާގެ ވަކީލު ބުނެފައިވަނީ އެ ހާދިސާ ހިނގާފައި ވަނީ ހަފީޒު ކަފިހި ހުރަސްމަތިން ހުރަސް ކުރަނިކޮށް ނޫން ކަމަށެވެ.

އަދި އެ އެކްސިޑެންޓު ހިނގީ ޝަމްޢާން ސައިކަލުގައި ދަނިކޮށް ހަފީޒު މަގު ހުރަސް ކުރުމުން، ސައިކަލު އަންނަތަން ފެނިގެން ހާސްވެގެން ސައިކަލާ ދިމާލަށް ދުއްވައިގަނެ، ސައިކަލުގައި ޖެހިގެން ކަމަށް ވެސް އޭނާގެ ވަކީލު އިތުރަށް ބުނެފައިވެއެވެ.

އެހެންނަމަވެސް ކޯޓުން ބުނެފައިވަނީ ގާނޫނީ މާއްދާތަކަށް ބަލާއިރު އެ ތުހުމަތުތަކާއި ހާދިސާ އާ ނުގުޅުވޭ ކަމަށެވެ.

ޝަމްޢާންގެ އަތުގައި ސައިކަލު ދުއްވުމުގެ ލައިސަންސް ނެތް ކަމާއި ބާރު ސްޕީޑްގައި ސައިކަލު ދުއްވިކަމަށް އޭނާ އެއްބަސްވާ ކަމަށް މުއްދަތު މަޖިލީހުގައި ފުލުހުން ފާހަގަކުރިއެވެ. ޝަމްޢާންގެ ކުށުގެ ރެކޯޑު ހުރިކަންވެސް ފުލުހުން ވަނީ ފާހަގަކޮށްފައެވެ.

ހަފީޒަށް ބޮޑެތި އަނިޔާތަކެއްވި މި އެކްސިޑެންޓުގެ މައްސަލައިގައި ހައްޔަރު ކުރި ޢުމުރުން 22 އަހަރުގެ ޝަމްޢާން އަށް ކޯޓުން 15 ދުވަސް ޖަހައިފައިވާއިރު ކޯޓުން ބުނެފައިވަނީ ޝަމްޢާންގެ މައްޗަށް ތުހުމަތު ކޮށްފައިވާ ކުށް ކުރިކަމަށް ތުހުމަތު ކުރެވޭ މިންވަރުގެ ހެކި ގަރީނާ ހުށަހަޅާފައިކަމަށެވެ.

އެގޮތުންއޭނާ  ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާ ވެދާނެ ކަމަށް ފެންނަށް ކަމަށް ވެސް ބުނެފައިވެއެވެ. ކޯޓުން ބުނެފައިވަނީ ޝަމްޢާން ހައްޔަރު ކޮށްފައި ވަނީ އިޖުރާއަތުތަކާ އެއްގޮތަށް ކަމަށެވެ. އަދި އެ ހާދިސާ ހިނގިކަމާމެދު އަދި މިކަމުގެ ސަބަބުން މީހަކަށް އަނިޔާ ލިބިފައިވާކަމާމެދު އޭނާގެ ފަރާތުން އިންކާރު ނުކުރާކަމަށް ވަކީލުން ވަނީ ފާހަގަ ކޮށްފައެވެ.

އެކްސިޑެންޓްގައި އަނިޔާވި ހަފީޒު މިހާރު ވަނީ އިތުރު ފަރުވާއަށް އިންޑިޔާގެ ކޮޗިންއަށް ގެންގޮސްފައެވެ. އޭނާގެ ޙާލު ދެރަކަމުން އޭނާ އިންޑިޔާއަށް ގެންގޮސްފައިވަނީ ކޮމާޝަލް ފްލައިޓެއްގައެވެ. އިންޑިޔާއަށް ފުރުމާއި ހަމައަށްވެސް ހަފީޒު އޮތީ އޭޑީކޭގެ އައިސީޔޫގައެވެ.