މިއަހަރުގެ ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބުގައި ނުކުޅެދުންތެރިކަން ހުންނަ ފަރާތްތަކުގެ ތެރެއިން ފުރޮޅުލީ ގޮނޑިގައި ވޯޓްލާން ދާ ފަރާތްތަކަށް ފަސޭހަ އިންތިޒާމްތަކެއް ހަމަޖައްސަވާނެކަމަށް އިލެކްޝަންސް ކޮމިޝަނުން ބުނެފި އެވެ. 

އީސީން މިފަދައިން ހާމަކޮށްފައިވަނީ އެ ކޮމިޝަނުން މިއަދު ބޭއްވި ރިޔާސީ އިންތިހާބަށް ޤައުމީ ލަފާދޭ ކޮމެޓީގެ ބައްދަލުވުމުގައި ހިއުމަން ރައިޓްސް ކޮމިޝަނުން ފާހަގަކުރެއްވި ކަންބޮޑުވުމާއި ގުޅިގެން ނެވެ. 

އެ ބައްދަލުވުމުގައި ހިއުމަން ރައިޓްސް ކޮމިޝަނުގެ ރައީސް މަރިޔަމް މުނާ ވިދާޅުވީ ވޯޓްލާ މަރުކަޒުތަކުގައި ހުންނަ ވޯޓިންގ ބޫތުތައް ހުންނަގޮތުން ވީލް ޗެއަރގައި އެތަނަށްދާ މީހުންނަށް ވޯޓްލުމަށް ދަތިތައް ކުރިމަތިވާ ކަމަށާއި، އެކަމުގެ ސަބަބުން އެހެން މީހުންގެ އެހީތެރިކަން ހޯދަންޖެހި، ވޯޓްގެ މިނިވަންކަން ގެއްލޭ ހިސާބަށް ދާކަން ފާހަގަކުރެވިފައިވާ ކަމަށެވެ. އަދި ވޯޓު ކަރުދާސްކޮޅު ފޮއްޓަށް ލުމުގައި ވެސް އެފަދަ ފަރާތްތަކަށް ބޮޑެތި ދަތިތައް ހުރިކަން އެޗްއާރުސީއެމުން ވަނީ ބުނެފަ އެވެ. 

Advertisement

އެ ކަންބޮޑުވުމާއި ގުޅޭގޮތުން އީސީގެ ނައިބު ރައީސް އިސްމާއިލް ހަބީބު ވިދާޅުވީ ނުކުޅެދުންތެރިކަން ހުންނަ މީޙުންގެ ތެރެއިން ވީލް ޗެއަރގައި ވޯޓްލާން ދާ ފަރާތްތަކަށް ފަސޭހަ އިންތިޒާމްތަކެއް ހަމަޖެއްސުމަށް މިހާރުވެސް އީސީން މަޝްވަރާތައް ކުރަމުންދާ ކަމަށެވެ. އަދި އެފަދަ ފަރާތްތަކަށް ކުރިމަތިވާ ދަތިތަކަށް ޙައްލު ހޯއްދަވާދެއްވާނެކަމަށް ހަބީބު ވިދާޅުވި އެވެ. 

ފުރޮޅުލީ ގޮނޑީގައި ވޯޓުލުމަށް ދިޔަ ފަރާތަކަށް އެހީތެރިވަނީ

ނުކުޅެދުންތެރިކަން ހުންނަ މީހުންގެ ތެރެއިން ވީލް ޗެއަރގައި ވޯޓްލާން ދާ މީހުންނަށް ފަސޭހަ އިންތިޒާމްތަކެއް ހަމަޖެއްސުމަށް ނިންމުމުގެ އިތުރުން، މިފަހަރުގެ ރިޔާސީ އިންތިހާބުގައި ލޯފަން މީހުންނަށް އަމިއްލައަށް ވޯޓްލެވޭނެ އިންތިޒާމް ވެސް ވަނީ ހަމަޖައްސާދެއްވާފަ އެވެ. 

އެގޮތުން ލޯފަން މީހުން ވޯޓްލާން ބޭނުންކުރާނީ ބްރެއިލް އަކުރުތޯ ނުވަތަ ވިޔަ އަކުރުތޯއާ މެދު ކޮމިޝަނުގައި މަޝްވަރާކުރަމުންދާ ކަމަށާއި، އެކަމުގައި ވަރަށް އަވަހަށް ގޮތެއް ނިންމާނެކަމަށް ވެސް އީސީން ވަނީ ބުނެފައެވެ. 

މިއަހަރުގައި ބާއްވާ ރިޔާސީ އިންތިޚާބަކީ ދެފުށް ފެންނާނެހެން ބާއްވާ މިނިވަން އިންތިޚާބަކަށް ހެދުމަށް އިލެކްޝަންސް ކޮމިޝަނުން ގިނަ މަސައްކަތްތަކެއް ކުރަމުންދާކަމަށް އީސީން ވަނީ ބުނެފައެވެ.