21 އަހަރުން ދަށުގެ ޔޫރޯ ފުޓްބޯޅަ މުބާރާތުގެ ސެމީ ފައިނަލުގެ ދެވަނަ މެޗުގައި 5-1 ގެ ނަތީޖާއަކުން  ޔުކްރެއިން ބަލިކޮށް ފައިނަލްގެ ދެވަނަ ޖާގަ ސްޕެއިނުން ހޯދައިފި އެވެ.

މިރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ޔުކްރެއިން އިންނެވެ. މިލަނޑު ފުރަތަމަ ހާފުގެ 13 ވަނަ މިނެޓުގައި ކާމިޔާބުކޮށްދިނީ މިޑްފީލްޑަރު އާޓެމް ބޮންޑަރެންކޯ އެވެ. މިއީ އެޓީމުގެ ޗެލްސީ ފޯވާޑް މިޚައިލް މޮޑްރިކް ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ސްޕެއިން އިން މެޗުގެ ނަތީޖާ އެއްވަރުކުރީ ފުރަތަމަ ހާފުގެ 17 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ފޯވާޑް އަބެލް ރުއިޒް އެވެ. އަދި ފުރަތަަމަ ހާފުގެ 24 ވަނަ މިނެޓުގައި އޮއިހާން ސަންސެޓް ވަނީ ލަނޑެއް ކާމިޔާބުކޮށް މި މެޗުގައި އެޓީމަށް ފުރަތަމަ ފަހަރަށް ލީޑު ހޯދައިދީފައެވެ. މި ލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

Advertisement

ދެވަނަ ހާފުގައި ސްޕެއިން އިން އިތުރު ތިން ލަނޑު ކާމިޔާބުކުރިއިރު އެޓީމުގެ ތިންވަނަ ލަނޑު ދެވަނަ ހާފުގެ 54 ވަނަ މިނެޓުގައި ކާމިޔާބުކޮށްދިނީ ރެއާލް މެޑްރިޑްގެ މިޑްފީލްޑަރު އެންޓޯނިއޯ ބްލެންކޯއެވެ.

މި މެޗުގައި ސްޕެއިން އިން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 68 ވަނަ މިނެޓުގައި ކާމިޔާބުކޮށްދިނީ އޮސަސޫނާގެ މިޑްފީލްޑަރު އެމާރ އޮރޯޒް އެވެ. އަދި އެޓީމުގެ ފަސްވަނަ ލަނޑު 78 ވަނަ މިނެޓުގައި ކާމިޔާބުކޮށްދިނީ ސާޖިއޯ ގޯމޭޒް އެވެ. މި ލަނޑާއެކު މެޗުގެ ކުޅުން ނިމިގެންދިޔައީ 5-1 ގެ ނަތީޖާއަކުން ސްޕެއިން ކުރީގައި އޮވެގެންނެވެ.

މުބާރާތުގެ ފައިނަލްގައި ސްޕެއިން ނުކުންނާނީ އިންގްލެންޑާއި ދެކޮޅަށެވެ. ފައިނަލް މެޗު ކުޅުމަށް ހަމަޖެހިފައިވަނީ މި މަހުގެ 8 ވަނަ ދުވަހުގެ ރޭ 21:00 ގައެވެ.