ރޯޑް ޑިވަލޮޕްމެންޓް ކޯޕަރޭޝަން (އާރްޑީސީ) އިން ވައްކަން ކުރި ކަމަށް ދެކެވޭ ވަހަކަ އެކުންފުނިން ދޮގު ކޮށްފިއެވެ.
އެކުންފުނީގެ އެކައުންޓުުން 13 މިލިއަން ރުފިޔާ ކުންފުނީގެ ސީއެފްއޯގެ އެކައުންޓަށް ޖަމާވި ކަމަށް ބުނެ ބައެެއް މީޑިއާތަކުން އިއްޔެ ވަނީ ރިޕޯޓު ކޮށްފައެވެ. ނަމަވެސް ރޭގެ ވަގުތެއްގައި އެކުންފުނިން ވަނީ އެކަން ދޮގުކޮށް ބަޔާނެއް ނެރެފައެވެ
އެބަޔާނުގައި ބުނެފައިވަނީ ކުންފުނީގެ އެކައުންޓުުން 13 މިލިއަން ރުފިޔާ ކުންފުނީގެ ސީއެފްއޯ ޔާސިރު ހަސަންގެ އަމިއްލަ އެކައުންޓަށް ޖަމާކޮށްފައިވާ ކަމަށް ބުނެ އެ މައްސަލަ ފުލުހުން ބަލަމުންދާ ކަމަށް މީޑިއާތަކުން ގެނެސްދިނަސް އެފަދަ މުއާމަލާތެއް އެއްވެސް އިރަކު ކުންފުނީގެ އެކައުންޓުން ހިނގާފައި ނުވާނެ ކަމަށެވެ.
އަދި އާރްޑީސީ އަކީ ޤަވާއިދުން އޮޑިޓް ކުރެވޭ ކުންފުންޏެއް ކަމަށާއި މިހާރުވެސް އޮޑިޓަރ ޖެނެރަލްގެ އޮފީހުން ހާއްސަ އޮޑިޓެއް ކުރަމުން ގެންދާ ކަމަށް ބުނެފައިވެއެވެ. ކުންފުނީގެ ފައިނޭޝަލް ޕޮލިސީއާ ހިލާފަށް އެއްވެސް ފައިސާގެ މުއާމަލާތެއް ނުވަތަ އެފަދަ މައްސަލައެއް ވެސް ފާހަގަ ވެފައި ނެތް ކަމަށް ވެސް އެބަޔާނުގައި ބުނެފައިވެއެވެ.
މީގެއިތުރުން އެ ނޫސްބަޔާނުގައި ބުނެފައިވަނީ އާރުޑީސީ އާއި ގުޅުންހުރި ފައިސާގެ އެއްވެސް މައްސަލައެއް ތަހުގީގު ކުރަމުންދާކަން ނުވަތަ ތަހުގީގު ކުރަން ބޭނުންވާކަން މޯލްޑިވްސް މަނިޓަރީ އޮތޯރިޓީ [އެމްއެމްއޭ] އާއި ދިވެހި ފުލުހުންގެ ހިދުމަތުން އެކުންފުންޏަށް އަންގާފައި ނުވާކަމަށްވެސް އެކުންފުނީގެ ބަޔާނުގައި ބުނެފައިވެއެވެ.
އާރުޑީސީން ކުންފުނީގެ ހަރަދުތަކާއި ފައިސާގެ މުއާމަލާތްތައް ކުރަމުން ދަނީ ރާއްޖޭގައި ހެދިފައިވާ މާލީ ގާނޫނުތަކާއި ގަވާއިދުތަކާއި ކުންފުނީގައި ހެދިފައިވާ ޕޮލިސީތަކާއި އެއްގޮތަށް ކަމަށާ އެހެން ކަމުން ފައިސާއަށް ހިޔާނާތްތެރިވުމާއި ބޮޑެތި އަދަދުތަކުން ވައްކަންކޮށް އެއްވެސް މުވައްޒިފެއްގެ އަމިއްލަ އެކައުންޓަކަށް ނުވަތަ އެކައުންޓްތަކަކަށް ކުންފުނީގެ މައި އެކައުންޓުން ފައިސާ ފޮނުވޭނެ އެއްވެސް މަގެއް ނޯންނާނެ ކަމުގެ ޔަގީންކަން އެކުންފުނިން ދީފައިވެއެވެ.
މިމައްސަލައިގައި ފުލުހުންގެ ފަރާތުން މައުލޫމާތު ހޯދުމަށް ކުރި މަސައްކަތުގައި ކާމިޔާބެއް ލިބިފައެއް ނުވެއެވެ.
Advertisement
This content is created and paid for by advertisers and does not involve Voice Journalists
