މިހާރު ކުރަމުންދާ ވިއްސާރައިގައި 11 ރަށަކުން ގެއްލުންތައް ރިޕޯޓު ކޮށްފައިވާކަމަށް ނޭޝަނަލް ޑިޒާސްޓާސް މެނޭޖްމަންޓުން ބުނެފިއެވެ.
އެންޑީއެމްގެ އަދާހަމަތައް ބުނާ ގޮތުން ރާއްޖެގެ ބޮޑު ބަޔަކަށް ވިއްސާރަކޮށް ބައެއް ރަށްރަށަށް އުދައިގެ އަސަރު ކޮށްފައިވާ ކަމަށެވެ.
އެގޮތުން ހދ ކުޅުދުއްފުށީ އެއަރޕޯޓު ސަރަހައްދަށް އުދައިގެ އަސަރު ވަރަށް ބޮޑަށް ކޮށްފައިވާ ކަމަށާއި، ށ ކޮމަންޑޫއަށް ބޯކޮށް ވާރޭވެހި ރަށުތެރޭގައި ފެންބޮޑުވެ ގެއަކަށް ގެއްލުން ލިބިފައިވެއެވެ.
މީގެ އިތުރުން ބ މާޅޮހުގައި ފެންބޮޑުވެ 3 ގެއަކަށް ގެއްލުން ލިބިފައިވާއިރު، ގިނަ ޢަދަދެއްގެ ގަސް ވެއްޓިގެން ރިޕޯޓުކޮށްފައިވާ ކަމަށް ބުނެފައިވެއެވެ. އަދި ޅ ނައިފަރުގައި ވާރޭވެހި ފެންބޮޑުވުމުގެ އިތުރުން ގަދަ ވައިގެ ސަބަބުން ގެއެއްގެ ފުރާޅު އެއްލާލައިފައިވެއެވެ.
ހއ އިހަވަންދޫ ގައި ގަދަ ވައިގެ ސަބަބުން ގެއެއްގެ ފުރާޅު އެއްލައިލައިފައިވާއިރު އެރަށުން އެހެން ގެއެއްގެ ފާރެއްގެ މައްޗަށް ގަހެއް ވަނީ ވެއްޓި ގެއްލުންވެފައެވެ. މީގެ އިތުރުން ކ މާފުށި، ކ ދިއްފުށި އަދި ކ ތުލުސްދޫގައި ވައިގަދަވެ ބައެއް ރުއްގަސް ވެއްޓުމުގެ ހާދިސާ ތައް ހިނގައިފައިވަ ކަމަށް އެންޑީއެމް އިން ބުނެފައިވެއެވެ.
މީގެ އިތުރުން ކ ހުރާގެ ގެއެއްގެ ފުރާޅެއްގެ ބައެއް އެއްލާލައިގެން ރިޕޯޓުކޮށްފައިވާ ކަމަށް ބުނެފައިވެއެވެ. ފ ފީއަލީގައި ވައިގަދަވުމުގެ ސަބަބުން ގެއެއްގެ ފުރާޅު އެއްލާލައި ގެއްލުން ލިބިފައިވާ ކަމަށާއި، އއ ފެރިދޫގައި މީހުން ދިރިއުޅޭ ގެއެއްގެ މައްޗަށް ބަނބުކެޔޮގަހެއް ވެއްޓި ބޮޑެތި ގެއްލުންތަކެއް ލިބިފައިވާކަމަށާއި، މި ހާދިސާގެ ސަބަބުން އެގޭގައި ދިރިއުޅޭ ފަރާތްތަކަށް އެރަށު ކައުންސިލުން ވަނީ ބޯހިޔާވަހިކަން ފޯރުކޮށްދީފައިވެއެވެ.
މިދުވަސްވަރަކީ ރާއްޖޭގެ މޫސުން ވަރަށް ބޮޑަށް ގޯސްވެފައިވާ ދުވަސްވަރެކެވެ. މެޓް އޮފީހުން ދަނީ ދޭތެރެދޭތެރެއިން ސަމާލު ނެރެމުންނެވެ.
Advertisement
This content is created and paid for by advertisers and does not involve Voice Journalists
