ދިވެހިރާއްޖެއިން ހައްޖުގެ އަޅުކަން އަދާކުރުމަށް ދިޔަ ހައްޖާޖީއަކު މިއަދުވެސް ނިޔާވެފައިވާ ކަމަށް އިސްލާމިކް މިނިސްޓްރީން ބުނެފިއެވެ. 

އިސްލާމިކު މިނިސްޓްރީން ބުނީ، ނިޔާވެފައި ވަނީ، މޯލްޑިވްސް ޙައްޖު ކޯޕަރޭޝަން ލިމިޓެޑްގެ ހަވާލުގައި މި އަހަރު ދިވެހިރާއްޖެއިން ޙައްޖަށް ދިޔަ ޙައްޖުވެރިޔަކު ކަމުގައިވާ ހއ.ކެލާ، ސީސާންގެ، ޢަލީ ގާސިމް (81) އެވެ. 

އޭނާ ނިޔާވެފައި ވަނީ މަދީނާގެ ހޮޓަލުގައި މިއަދު ހެނދުނުގެ ވަގުތެއްގައި ކަމުގައި ވެސް އެ މިނިސްޓްރީން މައުލޫމާތު ދެއެވެ.

Advertisement

މިއީ މިއަހަރު ނިޔާވި ހަތަރުވަނަ ދިވެހި ޙައްޖާޖީއެވެ.

އެގޮތުން ފުރަތަމަ ނިޔާވި ޙާޖީ ނިޔަވެފައި އޮއްވައި ފެނިފައިވަނީ ނޫރު ފަރުބަދަ ކައިރިންނެވެ. އެއީ އޭނާ ގެއްލިގެން ހޯދަމުންދާތާ 4ވަނަ އަށްވީ ދުވެހެވެ. ނޫރު ފަރުބަދަ ކައިރިން ނިޔާވެފައި އޮއްވައި ފެނުނީ އަލް ޙަރަމައިން ޙައްޖު ވަލް ޢުމްރާގެ ހަވާލުގައި ޙައްޖަށް ދިޔަ ރ މާކުރަތު  މުޙައްމަދު ނަސީމެވެ. އޭނާ ގެއްލުނީ މިނާގެ ދަތުރުގައި ހައްޖު މަހުގެ އަށް ވަނަ ދުވަހުގެ ރޭއެވެ.

ދެވަނަ މީހަކީ ދ. މާއެނބޫދޫ، ފިޔާތޮށިގެ، އަލީ ހަސަން (72) އެވެ. އަލީ ހަސަން އަކީވެސް ޙައްޖުކޯޕަރޭޝަންގެ ހަވާލުގައި ޙައްޖަށް ދިޔަ މީހެކެވެ. އޭނާ ނިޔާވީ މައްކާގެ ސަޢުދީ ޖާމަން ހޮސްޕިޓަލުގައި ފަރުވާދެމުން ދަނިކޮށެވެ.

ތިންވަނަ އަށް ނިޔާވީ ޙައްޖުކޯޕަރޭޝަންގެ ހަވާލުގައި ޙައްޖުވުމަށް ގޮސް މައްކާގައި ހުއްޓައި ނިޔާވި ނ. ހޮޅުދޫ އުމުރުން 70 އަހަރުގެ ޤާސިމް އިބްރާހިމް އެވެ. އޭނާ ނިޔާވީ ކުއްލި ގޮތަކަށް ކަމަށް ޙައްޖުކޯޕަރޭޝަނުން ހާމަކޮށްފައިވެއެވެ.