ޒުވާން މިޑްފީލްޑަރ އާރްދާ ގުލާ ހަ އަހަރު ދުވަހުގެ އެއްބަސްވުމެއްގެ ދަށުން ސްޕެއިންގެ ރެއާލް މެޑްރިޑާއި ބަދަލުވެއްޖެ އެވެ. މީޑިއާ ރިޕޯޓްތައް ބުނާގޮތުގައި ތުރުކީގެ ފެނަބާޗޭއަށް ކުޅެމުން އަންނަ އުމުރުން 18 އަހަރުގެ ގުލާ ރެއާލް މެޑްރިޑަށް ބަދަލުވީ 20 މިލިއަން ޔޫރޯ ޓްރާންސްފާ ފީއެއްގައެވެ.

ގުލާ ވަނީ ނިމިދިޔަ ސީޒަންގައި ފެނަބާޗޭގައި މޮޅު ކުޅުމެއް ދައްކައި އެ ޓީމަށް ހަތަރު ލަނޑު ޖަހައިދީ ހަތަރު ލަނޑު ޖަހުމަށް އެސިސްޓް ކޮށްދީފައެވެ.

މިހާތަނަށް އޭނާ ވަނީ ފެނަބާޗޭއަށް ކުޅެދިން 51 މެޗުގައި އެޓީމަށް ނުވަ ލަނޑު ކާމިޔާބުކޮށްދީ އިތުރު ބާރަ ލަނޑު ޖަހުމަށް އެހީތެރިވެ ދީފައެވެ. މީގެއިތުރުން ވެސް މިހާރު ތުރުކީގެ ގައުމީ ޓީމަށް ވެސް ކުޅެމުން އަންނަ ގުލާ އަކީ ތުރުކީ ގައުމީ ޓީމަށް އެންމެ ހަގު އުމުރުގައި ލަނޑު ޖެހި ކުޅުންތެރިޔާއެވެ.

މިހާރު ފެނަބާޗޭގެ 10 ނަމްބަރު ޖޯޒީގައި ކުޅެމުން އަންނަ ގުލާ، އެންމެ ފުރަތަމަ އެ ޓީމަށް މެޗެއް ކުޅެފައި ވަނީ އޭނާގެ އުމުރުން އެންމެ 16 އަހަރުގައެވެ. އަދި ފުރަތަމަ މެޗުގައި ވެސް އޭނާ ވަނީ ލަނޑު ޖަހަން އެސިސްޓް ކޮށްދީފައެވެ.

މީޑީއާ ރިޕޯޓްތައް ބުނާގޮތުން ގުލާ ހޯދުމަށް ޔޫރަޕުގެ ބޮޑެތި ގިނަ ކުލަބުތަކަކުން މަސައްކަތް ކުރިއެވެ. އޭގެތެރޭގައި ބާސެލޯނާ، އާސެނަލް، މެންޗެސްޓާ ޔުނައިޓެޑް، ނިއުކާސަލް ޕީއެސްޖީގެ އިތުރުން ބަޔާން މިއުނިކް ވެސް ހިމެނެއެވެ.

ރެއާލުން މި ޓްރާންސްފާ މާކެޓްގައި މިހާތަނަށް ފަސް ކުޅުންތެރިއެއްގެ ސޮއި ވަނީ ހޯދާފައެވެ. އެ ކުޅުންތެރިންގެ ތެރޭގައި ގުލާގެ އިތުރުން ބްރޫޝިއާ ޑޯޓްމަންޑަށް ކުޅެމުން އައި އިންގްލެންޑްގެ ޕްލޭމޭކަރ ޖޫޑް ބެލިންހަމް، ސްޕެއިންގެ ފޯވާޑް ހޯސެލޫ، އަދި ސްޕެއިންގެ ޑިފެންޑަރ ފެރާން ގާސިއާ އިތުރުން އޭސީ މިލާނުގެ ފޯވާޑް ބްރަހީމް ޑިއާޒް ހިމެނެއެވެ.