ސާފު ރީތި ފޭރާންލުމަކީ މުހިންމު ކަމެއް ނަމަވެސް އެފޭރާމުގެ ސަބަބުން އޭނާ ކަންދެއްކުމާއި، ބޮޑާކަމުގެ ޝިކާރައަކަށް ވެގެންނެއް ނުވާނެ ކަމަށް ޚުތުބާގައި ބުނެފިއެވެ. 

''އިސްލާމްދީނަކީ ސާފުތާހިރުކަމުގެ ދީން'' މިމައުޟޫއަށް އަމާޒުކޮށް އިއްވި ޚުތުބާގައި ބުނީ އިސްލާމްދީނަކީ އާލަމްތަކަށް ރަހުމަތެއް ގޮތުގައި الله ބާވައިލައްވާފައިވާ މާތް ދީން ކަމަށާއި، އެ ދީނުގައި ވަރަށް މަތިވެރި އަސާސްތަކުގެ ތެރޭގައި، އިންސާނާގެ މުޅި ދިރިއުޅުމުގެ ހުރިހާ ކަމަކަށް ބޭނުންވާނެ ހަމަތަކާއި އުސޫލުތައް ލައްވާފައިވާ ކަމަށެވެ.

އެގޮތުން، އޭގެ ތެރެއިން އެންމެ ފާހަގަކޮށްލެވޭ މަތިވެރި އެއްސިފައަކީ ސާފުތާހިރުކަން ކަމަށް ޚުތުބާގައި ބުނެފައިވެއެވެ.

''ކީރިތި ރަސޫލާގެ ސުންނަތުގައި ސާފުތާހިރުކަމަށް ވަރަށް ބޮޑަށް ބާރު އަޅުއްވާފައިވެއެވެ. ކީރިތި ރަސޫލާ ހަދީސް ކުރައްވާފައިވެއެވެ. މާނައީ: ''ސާފުތާހިރު ކަމަކީ އީމާންކަމުގެ ދެބައިކުޅަ އެއްބައެވެ.'' އަދިވެސް ރަސޫލާ ހަދީސް ކުރައްވާފައިވެއެވެ. މާނައީ'' ތިޔަބައިމީހުން މިހަށިގަނޑުތައް ސާފުތާހިރު ކުރާށެވެ! މާތްالله ތިޔަބައިމީހުން ތާހިރު ކުރައްވާނެތެވެ.'' ޚުތުބާގައި ބުނެފައިވެއެވެ. 

ޚުތުބާގައި ބުނީ އިންސާނާ ސާފުތާހިރު ވުމަށްޓަކައި ސާފު ރީތި ފޭރާންލުމަކީ މުހިންމު ކަމެއް ކަމަށެވެ. ނަމަވެސް އެފޭރާމުގެ ސަބަބުން އޭނާ ކަންދެއްކުމާއި، ބޮޑާކަމުގެ ޝިކާރައަކަށް ވެގެންނެއް ނުވާނެ ކަމަށް ޚުތުބާގައި ބުނެފައިވެއެވެ.

"ރަސޫލާ ޞައްލައްالله ޢަލައިހި ވަސައްލަމް ގެ ހަދީޘް ބަސްފުޅެއްގެ މާނައިގައިވެއެވެ. އެމީހެއްގެ ހިތުގައި ބޮޑާކަމުގެ ޒައްރެއްގެ މިންވަރުވެސް ވާ މީހާ ސުވަރުގެ ނުވަންނާނެއެވެ." މީހަކު ދެންނެވިއެވެ. ހަމަކަވަރުންވެސް ރިވެތި ފޭރާން ލުމަށް މީހުން ބޭނުންވާނެއެވެ. ފަހެ، ކީރިތި ރަސޫލާ ޙަދީތް ކުރެއްވެވިއެވެ. "ހަމަކަށަވަރުން މާތް الله އީ ރިވެތިކަމުގެ ސިފަ ލިބިވޮޑިގެންވާ ރަސްކަލާނގެއެވެ. ރިވެތިކަމުގެ ސިފަ ދެކެ الله ލޯބިވެ ވޮޑިގެންވެއެވެ. ބޮޑާކަމަކީ ހައްގަށް އިންކާރު ކުރުމާއި މީސްތަކުން ނިކަމެތިކުރުމެވެ." މިބަސްފުޅުން ދޭހަވަނީ، ބޮޑާ ކަމާއި ކަންދެއްކުމެއް ނެތި، ރީތި ސާފުތާހިރު ފޭރާން ލުމަކީ، އިސްލާމް ދީނުގައި ހުއްދަކަމެއް ކަމަށެވެ. އަދި ރީތިކަމަކީ، މާތް الله ލޯބިވެ ވޮޑިގެންވާ ކަމެއް ކަމެވެ." ޚުތުބާގައި ބުނެފައިވެއެވެ.

މީގެ އިތުރުން އަޅުކަމަކީ އިންސާނާއަށް ރޫހާނީ ސާފުތާހިރުކަމެއް ގެނެސްދޭ ކަމެއްކަން ފާހަގަކޮށް ޚުތުބާގައި ބުނީ ތިމާގެ ހަށިގަނޑާއި ފޭރާމާއި ދިރިއުޅޭ ވެށީގެ ސާފުތާހިރުކަމަކީ އަޅުކަން ގަބޫލުވުމާއި މާތްالله ގެ ރުއްސެވުމާއި އެކިއެކި ބަލިމަޑުކަމުން ރައްކާތެރިވުމުގެ ވަސީލަތެއް ކަމަށެވެ.