ދަ ދިމޮކްރެޓްސްގެ އިންތިޚާބީ މަޝްވަރާ ތަކުގައި ކުރީގެ ރައީސް މުޙައްމަދު ނަޝީދު ބައިވެރިވެވަޑައިގެންފިއެވެ.
ބޮޑުފެންވަޅުގޭގައި ކުރިއަށްގެންދާ މި މަޝްވަރާތަކުގައި ރައީސް ނަޝީދު ބައިވެރިވެ ވަޑައިގަންނަވާ ކަން އެޕާޓީއިން ހާމަ ކޮށްފައިވަނީ އިއްޔެއެވެ. ރައީސް ނަޝީދު ވަނީ ދަ ޑިމޮކްރެޓްސްއިން އެ ޕާޓީ އުފެއްދުމަށް ބޭއްވި ޖަލްސާގައިވެސް ބައިވެރިވެ ވަޑައިގެނެފައެވެ.
އެރޭގެ ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެބޭފުޅާ އެޕާޓީއާއި ގުޅިވަޑައި ގަންނަވާނެކަމީ ޝައްކެއް އޮތް ކަމެއް ނޫން ކަމަށެވެ. އަދި ވިދާޅުވީ އެއީ އެމްޑީޕީގެ 80 ޕަސެންޓް ނިސްބަތްވާނެ ޕާޓީ ކަމަށާއި، އެމްޑީޕީން ވަކިވެވަޑައިގެން އާ ޕާޓީއެއް އުފައްދަވަން ޖެހުނީ އުންމީދުތައް ގެއްލުމުން ކަމަށް ވިދާޅުވި އެވެ.
އެގޮތުން ވިދާޅުވީ ޝަރުޢީ ނިޒާމަށް ކުރި އުންމީދު ފެނަށް ވެ މިނިވަން މުއައްސަސާތަކަށް ކުރި އުންމީދު ނެތި ހިނގައްޖެ ކަމަށެވެ. އަދި ދައުލަތުގެ މާލިއްޔަތު ފުރިހަމަ ގޮތުގައި ބަަލަހައްޓާނެ ކަމުގެ އުންމީދު މުޅީން ފަނޑުވެ ދިޔައިރު އުމްރާނީ މަަސައްކަތް ހިންގުމުގެ ހަމައެކަނި ބޭނުމަކީ މީހަކަށް ކޮންޓްރެކްޓެއް ދިނުމަށް ވެއްޖެ ކަމަށެވެ.
ދަ ދިމޮކްރެޓްސް އާއި ރައީސް ނަޝީދު ގުޅިވަޑައިގަންނާނެ ކަމަށް ވިދާޅުވެފައި އޮތަސް އަދި އެމަނިކުފާނު އެޕާޓީއަށް ސޮއި ކުރައްވާފައެއް ނުވެއެވެ.
ދަ ޑިމޮކްރެޓްސް އަކީ އެމްޑީޕީގެ ތެރެއިން އުފެދިގެން އައި ފިކުރެއްގެ ދިރުން ފެކްޝަނުން އުފެއްދި ޕާޓީއެކެވެ. އެޕާޓީގައި ހިމެނޭ ގިނަ އިސްމެމްބަރުންނަކީ އެމްޑީޕީގައި ވަރަށް ދުވަސްވީ ބޭފުޅުންކަން ފާހަގަ ކޮށްލެވެއެވެ.
ދަ ޑިމޮކްރެޓްސްގެ ފަރާތުން ބުނެފައިވަނީ އެޕާޓީ އިން ރިޔާސީ އިންތިޚާބަށް ކެނޑިޑޭޓަކު ނެރޭނެކަމަށެވެ.
Advertisement
This content is created and paid for by advertisers and does not involve Voice Journalists
