މާލޭ ރަށްވެހިންގެ ތެރެއިން ގޯތި ލިބޭމީހުންނާއި އެކު ޖޮއިންޓް އެޕްލިކޭޝަން ފޯމު ހުށައެޅުމަށް ފުރުސަތު ހުޅުވާލައިފިއެވެ.

މިކަމާއި ގުޅިގެން ހައުސިންގ މިނިސްޓަރީ އިން ބުނެފައިވަނީ ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ހިލޭ ބަންޑާރަގޯތި ދޫކުރުމަށްޓަކައި ހިންގާ ބިންވެރިޔާ ސްކީމުގެ ދަށުން މާލެ ސަރަހައްދުން ގޯއްޗަށް އެދި ހުށަހަޅާފައިވާ މީހުންގެ ވަގުތީ ލިސްޓްގައި ހިމެނޭ "ޝަރުތު ހަމަވެ ޖޮއިންޓްވެގެން ގޯތި ލިބުމުގެ ފުރުސަތު އޮތް" މީހުން އެ ލިސްޓްގައި ހިމެނޭ "ގޯތި ލިބޭ" މީހުންނާއެކު ޖޮއިންޓްވުމުގެ ފުރުސަތު ހުޅުވާލުމަށް ނިންމާފައިވާ ކަމަށެވެ.

އެހެން ކަމުން ވަގުތީ ލިސްޓްގައި ހިމެނޭ "ޝަރުތު ހަމަވެ ޖޮއިންޓްވެގެން ގޯތި ލިބުމުގެ ފުރުސަތު އޮތް" މީހުންގެ ތެރެއިން ބިންވެރިޔާ ސްކީމުގެ ދަށުން މާލެ ސަރަހައްދުން ބަންޑާރަގޯތި ދޫކުރުމުގެ އުސޫލުގައި ބަޔާންކޮށްފައިވާ މީހުން "ގޯތި ލިބޭ" ފޯމުގެ ލީޑިން އެޕްލިކަންޓަށް ރިކުއެސްޓް ފޮނުވުމުގެ ފުރުސަތު 15 ޖުލައިގެ 23:59 ނިޔަލަށް ހަމަޖެހިފައި ވާނެ ކަމަށްވެސް އެމިނިސްޓްރީ އިން ވަނީ ބުނެފައެވެ.

މިގޮތުން ޖޮއިންޓް އެޕްލިކޭޝަނެއްގެ ގޮތުގައި ބަލައިގަނެވޭނީ ޖޮއިންޓްވާން އެދޭ ފަރާތްތަކުން ފޮނުވާ ރިކްއެސްޓް ސުންގަޑި ހަމަވުމުގެކުރިން "ގޯތި ލިބޭ" ފޯމުގެ ލީޑިން އެޕްލިކަންޓް އެ ރިކުއެސްޓް ގަބޫލުކުރުމުން ކަމަށް ވެސް ބުންޏެވެ.

ޖޮއިންޓް ވުމަށް ހުޅުވާލެވިފައިވާ ފަރާތްތަކުގެ ތެރޭގައި ޖޮއިންޓް ވާނެ މީހަކު ނެތް ފަރާތްތަކުން ކަންކުރަންޖެހޭ ގޮތް އޮޅުން ފިލުވުމަށް "ވޮއިސް" އިން ކުރި ސުވާލަށް ޖަވާބު ދެއްވަމުން ހައުސިންގް މިނިސްޓްރީ އިން ބުނެފައިވަނީ އެފަރާތްތަކަކީވެސް ޝަރުތުހަމަވާ ފަރާތްތައް ކަމަށާއި، އެގޮތުން އެފަދަ ފަރާތްތައް ސިންގަލް އެޕްލިކަންޓުންގެ ގޮތުގައި ރޭންކު ކުރެވޭނެ ކަމަށެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލޭގެ ރަށްވެހީންނަށް ގޯތި ދިނުމަށް ހިންގާ "ބިންވެރިޔާ" ސްކީމްގެ ދަށުން ފުރަތަމަ ބުުރުގައި ދޫކުރާ 5،000 ގޯތި ލިބޭ މީހުންގެ ވަގުތީ ލިސްޓް މިހާރު އޮތީ ގެޒެޓްކޮށްފައެވެ.

މިހާރު ދިނުމަށް ހަމަޖެހިފައިވާ 5،000 ގޯތި ލިބޭ މީހުންގެ ނަން ހިމެނޭ ވަގުތީ ލިސްޓްގައި ހިމެނޭ މީހުންގެ އަދަދަކީ 10،314 މީހުންނެވެ. ޝަރުތު ހަމަވެ އެހެން ނަމަވެސް 9،544 މީހަކަށް މިވަގުތު ގޯތި ނުލިބޭނެ އެވެ.

އެ ނިންމުން އެހެން އޮއްވާ ފުރަތަމަ ބުރުގައި ދޫކުރާ ގޯތީގެ އަދަދު މިހާރު އިތުރު ކުރައްވާފައިވާ ކަމަށް ރައީސް ޞާލިހް މިހާރު ވަނީ އިއުލާނު ކުރައްވާފައެވެ.