ރައީސް އަބްދުﷲ ޔާމީން އަބްދުލްގައްޔޫމުގެ މައްޗަށް ރ ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ އުފުލާފައިވާ ދައުވާތަކާއި ގުޅިގެން މިއަދު ކްރިމިނަލް ކޯޓުގައި ތާވަލުކުރި ޝަރީއަތުގެ އަޑުއެހުން ވެސް ކެންސަލް ކޮށްލައިފި އެވެ.
މިއީ މިފަދައިން ފުއްގިރި މައްސަލައިގެ ޝަރީއަތުގެ އަޑުއެހުން ތާވަލުކުރުމަށް ފަހު ޖެހިޖެހިގެން ކެންސަލްކުރި 5 ވަނަ ފަހަރެވެ.
މިއަދުގެ އަޑުއެހުން ކެންސަލްކޮށްފައި ވަނީ ފުއްގިރި މައްސަލައިގައި ރައީސް ޔާމީންގެ އިތުރުން ދައުވާ އުފުލާފައިވާ އަހުމަދު ކުރިކް ރިޒާ އާލާސްކަންފުޅާއި އުޅުއްވާތީ، ކޯޓަށް ވަޑައިނުގެންނެވޭނެކަން އެންގެވުމާއި ގުޅިގެންނެވެ. ކްރިކް ރިޒާގެ ފަރާތުން ވަނީ ކޯޓަށް މެޑިކަލް ޑޮކިއުމަންޓުތަކެއް ވެސް ހުށައަޅާފަ އެވެ.
ގާތް ގާތުގައި މި މައްސަލައިގެ އަޑުއެހުންތައް ތާވަލުކޮށްފައި ވީ ނަމަވެސް މިހާތަނަށް ޖުލައި މަހަށް ތާވަލުކުރި އެއްވެސް އަޑުއެހުމެއް ބޭއްވިފައެއް ނުވެ އެވެ.
ފުއްގިރި މައްސަލައިގައި މިހާރު ކުރިއަށް ދަނީ ދައުލަތުގެ ފަރާތުން ހުށައަޅާފައިވާ ހެކިންގެ ހެކިބަސް ނެގުމުގެ މަރުހަލާއެވެ.
އެގޮތުން އެ މައްސަލައިގައި އަހުމަދު އަދީބާއި އަބްދުﷲ ޒިޔަތު ހިމެނޭހެން ހަ ފަރާތެއްގެ ހެކިބަސް ވަނީ ނަގާފައެވެ. އަދި ވެސް ދައުލަތުން ހުށައަޅާފައިވާ ހެކިވެރިންގެ ހެކިބަސް ނަގާ ނުނިމެ އެވެ.
ފުއްގިރި މުއާމަލާތާއި ގުޅިގެން ރައީސް ޔާމިނުގެ މައްޗަށް ދެ ދައުވާއެއް ވަނީ އުފުލާފައެވެ. އެއީ ރިޝްވަތު ޤަބޫލުކުރިކަމުގެ ކުށުގެ ދައުވާއާއި މަނީލޯންޑާކުރި ކަމުގެ ކުށުގެ ދައުވާ އެވެ.
ރައީސް ޔާމިނު ވަނީ އެ ދެ ދައުވާއަށް ވެސް އިންކާރު ކުރައްވާފަ އެވެ. އަދި ވިދާޅުވެފައިވަނީ އެއީ އެމަނިކުފާނުގެ އަދާވާތްތެރިން ހެކިންނަށް ބޭނުންކޮށްގެން އެމަނިކުފާނާއި ދެކޮޅަށް އުފައްދާފައިވާ ދައުވާތަކެއް ކަމަށެވެ.
އޭގެ އިތުރުން ރައީސް ޔާމިނުގެ ފަރާތްޕުޅުން ވަނީ ފުއްގިރި މައްސަލައިގެ އަޑުއެހުންތައް ލަސްވެގެން ދިޔަ ނަމަވެސް އެމަނިކުފާނުގެ ފަރާތްޕުޅުން މިހާރު ހައިކޯޓަށް ހުށައަޅާފައިވާ އާރަށު ހުކުމުގެ އިސްތިއުނާފު މައްސަލަ އަވަސްކޮށްދެއްވުމަށް އެދިވަޑައިގެންފަ އެވެ.
އެ މައްސަލައިގެ އަޑުއެހުންތައް ވެސް މިހާރު ވަނީ ގާތްގަނޑަކަށް ނިމުމަކާއި ހަމަޔަށް ގޮސްފައެވެ.
އެގޮތުން ރައީސް ޔާމިނުގެ ފަރާތްޕުޅުން އިސްތިއުނާފީ ނުކުތާތައް ހުށައަޅާ ދައުލަތުން ވަނީ އެ ނުކުތާތަކަށް ޖަވާބުވެސް ދީފައެވެ. ދެން އޮންނާނީ މައްސަލައިގައި ދެ ފަރާތުން ފާހަގަކުރަން ހުރި އިތުރުކަންކަން ފާހަގަކުރުމަށްފަހު ހުކުމް ކުރުމެވެ.
Advertisement
This content is created and paid for by advertisers and does not involve Voice Journalists
