މެންޗެސްޓަރ ޔުނައިޓެޑުގެ ސްޕޭން ގޯލްކީޕަރު ޑޭވިޑް ޑެހެއާ 12 އަހަރަށް ފަހު ޔުނައިޓެޑު ދޫކޮށްލަން ނިންމައި އެކަން އިއުލާންކޮށްފި އެވެ.

މިއަހަރުގެ ޖޫން މަހުގެ ނިޔަލަށް ޑެހެއާ މެންޗެސްޓަރ ޔުނައިޓެޑާއެކު ހަދާފައިވާ އެއްބަސްވުންގެ މުއްދަތު ހަމަވެފައިވާއިރު، އުމުރުން 32 އަހަރުގެ ކީޕަރު މިވަގުތު ހުރީ ފްރޭ އެޖެންޓެއްގެ ގޮތުގައެވެ. އޭނާ ބުނީ މީ ކެރިއަރުގައި އައު ޗެލެންޖަކާ ކުރިމަތިލާން އެންމެ ރަނގަޅު ވަގުތު ކަމަށެވެ.

މެންޗެސްޓާ ޔުނައިޓެޑުގައި 12 އަހަރު ހޭދަކުރިއިރު، ޑެހެއާ ވަނީ އެޓީމަށް 545 މެޗު ކުޅެދީފައެވެ. އަދި އޭނާ ވަނީ އޭގެތެރެއިން  190 މެޗުގައި ބައިކޮޅަށް ލަނޑެއް ވަނަ ނުދީ، ޔުނައިޓެޑުގެ ތާރީޚްގައި އެންމެ ގިނަ ކްލީންޝީޓް ހޯދައިދިން ކީއްޕަރުގެ ޝަރަފްހޯދާފައެވެ.

2011 ވަނަ އަހަރު ޑެހެއާ ޔުނައިޓެޑަށް ބަދަލުވީ އެތުލެޓިކޯ މެޑްރިޑުން 18.9 ޕައުންޑަށެވެ. ޔުނައިޓެޑް ދޫކޮށްލާކަން ޑެހެއާ އިއުލާނު ކޮށްފައިވާއިރު، ޔުނައިޓެޑުން އަންނަނީ އިންޓަ މިލާންގެ ކީޕަރު އަންޑްރޭ އޮނާނާ ހޯދުމަށް މަސައްކަތްކުރަމުންނެވެ.

ޑެހެއާގެ ވަދާއީ މެސެޖުގައި އޭނާ ބުނެފައިވަނީ ފާގަސަން އޭނާ ގެނައިފަހުން ގިނަ ކާމިޔާބީތަކެއް ލިބުނުކަމަށެވެ. އަދި ކޮންމެ މެޗަކަށް އޭނާ މެންޗެސްޓަރ ޔުނައިޓެޑުގެ ޖާޒީ ލަނީ ވަރަށް ފަޚުރުވެރިކަމާއެކު ކަމަށެވެ.

ސައުދީ ޕްރޯ ލީގުގެ ބައެއް ކުލަބުތަކުން ހޯދުމަށް މަސައްކަތްކުރާ ޑެހެއާ ވަނީ މެންޗެސްޓަރ ޔުނައިޓެޑާއެކު ޕްރިމިއަރ ލީގު، އެފްއޭ ކަޕު، ޔުރޮޕާ ލީގު އަދި ލީގު ކަޕު ދެފަހަރު ކާމިޔާބުކޮށްފައެވެ. އޭނާ ވަނީ މެންޗެސްޓަރ ޔުނައިޓެޑުގެ މޮޅު ކުޅުންތެރިޔާގެ އެވޯޑް ހަތަރު ފަހަރު، އަދި ނިމުނު ސީޒަން ހިމެނޭހެން ޕްރިމިއަރ ލީގުގެ މޮޅު ކީޕަރުގެ އެވޯޑް ދެ ފަހަރު ހޯދާފައެވެ. ނިމުނު ސީޒަނުގައި އޭނާ ވަނީ ލީގުގެ 17 މެޗުގައި ބައިކޮޅަށް ލަނޑެއް ވަނަ ނުދީ ހިފަހައްޓާފައެވެ.

ހޮނިހިރު ދުވަހު ޑެހެއާ މެންޗެސްޓަރ ޔުނައިޓެޑް ދޫކޮށްލާކަން އިއުލާނު ކޮށްފައިވީނަމަވެސް، އޭނާ ދެން ގުޅޭނީ ކޮން ޓީމަކަށްކަން އަދި ހާމަކޮށްފައެއް ނުވެއެވެ.