ރާއްޖޭގެ ފުޓުބޯޅައިގެ ޙާލަތު ރަނގަޅު ކުރުމަށް ހިންގަން ފަށައިފައިވާ "ސޭވް އެފްއޭއެމް" ލީޑް ކުރެއްވުމަށް ކުރީގެ މަޝްހޫރު ކުޅުންތެރިޔާ އަދި ޤައުމީ ޓީމުގެ ކުރީގެ މެނޭޖަރ އިބްރާހިމް އާމިރު (ސަލްސާ) ނުކުންނަވައިފިއެވެ.

އެންމެ ފަހުން ބޭއްވުނު ސާފް ޗެމްޕިއަން ޝިޕްގައި ރާއްޖެއިން ކުރިމަތިލާން ޖެހުނު ބޮޑު ނާކާމިޔާބާއި ގުޅިގެން ރާއްޖޭގެ ފުޓުބޯޅައިގެ ހާލަތު ރަނގަޅު ކުރަން ޖެހޭ ކަމަށްބުނެ ސޯޝަލް މީޑިއާ ޕްލެޓްފޯމް ތަކުގައި އެއަޑު ވަރަށް ބޮޑަށް ގަދަވެގެން ދިޔުމާއި އެކު އުފެދުނު "ސޭވް އެފްއޭއެމް" ކެމްޕޭނުގެ ފުރަތަމަ ބައްދަލުވުން ރޭގައި ވަނީ ބޭއްވިފައެވެ.

މި ބައްދަލުވުން ލީޑް ކޮށްދެއްވަފައިވަނީ ކުރީގެ ކުޅުންތެރިޔާ ސަލްސާ  އާމިރެވެ.

Advertisement

މި ބައްދަލުވުން ބާއްވާފައިވަނީ ޝީ ބިލްޑިންގ ގެ ސެމިނަރ ރޫމްގައެވެ. މި ބައްދަލުވުން ވޮއިސް ގެ ފޭސްބުކް ޕޭޖުން ވަގުތުން ގެނެސްދީފައިވެސްވެއެވެ.

މި ބައްދަލުވުން ލީޑް ކުރައްވައި ވާހަކަ ދައްކަވަމުން އާމިރު ވިދާޅުވެފައިވަނީ އެބޭފުޅާއަކީ ވިކޭނެ ބޭފުޅެއް ނޫންކަމަށް ޔަޤީން ކަން އަރުވާކަމަށެވެ.

އާމިރު މިހެން ވިދާޅުވީ ބައްދަލުވުމުގައި އާންމު ބައިވެރިންނަށް ހުޅުވާލި ފުރުސަތުގައި، ނިއު ރޭޑިއަންޓް ސްޕޯޓްސް ކްލަބްގެ ކުރީގެ ޑައިރެކްޓާ އޮފް ފުޓްބޯލް އަންވަރު އަލީ 2019 އަހަރު "ފުޓްބޯލް ފްރެންޑްސް" ކިޔާ ވައިބާ ގުރޫޕެއްގައި ފުޓްބޯޅަ ބަދަލުކުރަން ޖެހޭކަން ފާހަގަކޮށް ވާހަކަ ދެއްކި ބައެއް މީހުންނަށް އެފްއޭއެމުން ހުށަހެޅި މަގާމުތަކާ އެކު އޭރު ދެއްކި ވާހަކަތައް ހިނދިގެން ދިޔަ ކަމަށް ވިދާޅުވެ، "ސޭވް އެފްއޭއެމް" ގެ ނަމުގައި ފެށި ހަރަކާތަށް އެހެން ވާން ބޭނުން ނުވާ ކަމަށް އަންވަރު ވިދާޅުވުމުން ނެވެ. 

ރޭގެ ބައްދަލުވުމުގައި ވަނީ އެ ކެމްޕޭން ކުރިއަށް ގެންދާނެ ގޮތާ ބެހޭގޮތުން މަޝްވަރާ ދިނުމަށް ސްޓިއަރިން ކޮމިޓީއެއް ވެސް އެކުލަވާލާފަ އެވެ.

ރޭގެ ބައްދަލުވުމުގައި ކުރީގެ ކުޅުންތެރިންނާއި ފުޓްބޯޅައިގެ ކުރީގެ ބައެއް ހިންގުންތެރިން ބައިވެރިވެވަޑައިގަތެވެ.

އެގޮތުން ކުރީގެ ޤައުމީ ކެޕްޓަން އަންދަރުސަވާ އިބްރާހިމް ރަޝީދު (އަންދަރޭ) އާއި ޤައުމީ ޓީމުގެ ކުރީގެ ޑިފެންޑަރު އޭދަފުށީގެ އަބްދުލް ވާހިދާއި ސާފް ޗެމްޕިއަންޝިޕް 2008 ގެ މުބާރާތް ރާއްޖެ އަށް ކާމިޔާބުކޮށް ދިނުމުގައި މުހިންމު ހިއްސާއެއްވި ޑިފެންޑަރު ސޮބާހް މުހައްމަދު އިބްރާހިމް ބައިވެރިވެ ވަޑައިގަތެވެ.