މޯލްޑިވްސް ރިފޯމް މޫވްމަންޓް (އެމް.އާރް.އެމް) ގެ ސްލޮޓްގައި ހަޔަރ އެޑިއުކޭޝަން މިނިސްޓަރގެ މަގާމުގައި ހުންނަވާ ޑރ. އިބްރާހިމް ހަސަން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ކެމްޕޭނުގައި ބައިވެރިވެ ވަޑައިގެންފިއެވެ.
ކުރިއަށް އޮތް ރިޔާސީ އިންތިޚާބަށް ކެންޕެއިން ކުރުމަށް ރައީސް ސާލިހާއި އެމަނިކުފާނަށް ތާއިދު ކުރައްވާ ކެބިނެޓް މެމްބަރުންތަކެއް ވަނީ މިއަދު ށ. އަތޮޅަށް ވަޑައިގެންފައެވެ.
އެގޮތުން މި ބޭފުޅުންގެ ތެރޭގައި ޢަދާލަތު ޕާޓީގެ ރައީސް އަދި ދާޚިލީ ވަޒީރު ޢިމްރާން ޢަބްދުﷲ، ޙާރިޖީ ވަޒީރު ޢަބްދުﷲ ޝާހިދު، ޑިޕެންސް މިނިސްޓަރ މާރިޔާ ދީދީ ގެ އިތުރުން ހަޔަރ އެޑިއުކޭޝަން މިނިސްޓަރ ޑރ. އިބްރާހިމް ހަސަން ހިމެނި ވަޑައިގަންނަވައެވެ.
މިނިސްޓަރ ހަސަން ރައީސް ޞާލިހުގެ އަރިހުގައި ވަޑައިގެންފައިވަނީ އެމްއާރްއެމްގައި 3000 މެމްބަރުން ހަމަ ނުވާ ކަމަށް އިލެކްޝަންސް ކޮމިޝަން (އީސީ) އިން ނިންމައި ޕާޓީ އުވާލުމަށް ކަނޑައެޅުމުން މަޝްރަހު ހޫނު ވެފައިވާ ވަގުތެއްގައެވެ.
އެގޮތުން އެމްއާރްއެމް އިން ވަނީ މި މައްސަލަ ސިވިލް ކޯޓަށް ހުށަހަޅާ އެ ކޯޓުން ނެރުނު ވަގުތީ އަމުރެއްގެ ދަށުން އީސީގެ މި ނިންމުމަށް އަމަލު ކުރުން ހުއްޓުވާފައެވެ.
މިއާއިއެކު ސަރުކާރުގެ ކޯލިޝަންގެ ބައިވެރިއަކަށް އެމްއާރްއެމް ވީ ނަމަވެސް އެ ޕާޓީއިން އަންނީ ސަރުކާރާއި ދެކޮޅު ހަރަކާތްތަކުގައި ބައިވެރިވަމުންނެވެ.
Advertisement
This content is created and paid for by advertisers and does not involve Voice Journalists
