ސާފް ޗެމްޕިއަންޝިޕްގައި ރާއްޖެ އަށް ކުރިމަތިވި ނާކާމިޔާބާ އެކު ރާއްޖޭގެ ފުޓްބޯޅަ ބަދަލު ކުރަން ޖެހޭ ކަމަށް ގޮވާލައި ސޯޝަލް މީޑިއާ އާއި ވައިބާ ގުރޫޕްތަކުގައި ކަންބޮޑުވުން ފާޅުކުރުމުގެ ތެރެއިން އުފަން ކުރި "ސޭވް އެފްއޭއެމް" ކެމްޕޭނުގެ ފުރަތަމަ ބައްދަލުވުން ރޭ ބާއްވައިފި އެވެ.

ވޮއިސް އިން ލައިވްކުރި މި އިވެންޓުގައި ރާއްޖޭގެ ފުޓްބޯޅަ އާއިލާގެ ދުވަސްވީ ގިނަ މޫނުތަކެއް ފެނިގެންދިޔަ އެވެ. އޭގެތެރޭގައި ކުރީގެ ކުޅުންތެރިންނާއި ކޯޗުންގެ އިތުރުން ކުޅިވަރުގެ ނޫސްވެރިން މިބައްދަލުވުމުގައި ބައިވެރިވި އިރު އެންމެ ބޮޑަށް ފާހަގަވެގެންދިޔައީ ފުރަތަަމަ ޑިވިޝަނުގެ އެއްވެސް ޓީމަކުން މި ހަރަކާތުގައި ބައިވެރިވެފައި ނުވާކަމެވެ.

ރޭގެ ބައްދަލުވުމުގެ ބައިވެރިން އެބޭފުޅުންގެ ޝުއޫރުތައް ފާޅުކުރަމުން އެންމެ ބޮޑަށް ފާހަގަކުރީ ވެސް އެކަންތަކެވެ. ދިވެހި ފުޓްބޯޅައިގެ ހާލަތު މިހާބޮޑަށް ދަށަށް ގޮސްފައިވާއިރު ފުރަތަަމަ ޑިވިޝަނުގެ ޓީމުތަކުން މިހާލަތު ބަދަލުކުރުމަށް މަސައްކަތް ނުކުރާކަމަށްބުނެ ބައެއް ބައިވެރިން ވާނީ ފުރަތަމަ ޑިވިޝަންގެ ޓީމުތަކުގެ ވެރިންނަށް ވަރަށް ބޮޑަށް ފާޑުކިޔާފައެވެ.

އެގޮތުން ރޭގެ ބައްދަލުވުމުގައި ރާއްޖެއަށް ފުރަތަަމަ ފަހަރަށް ސާފްޗެމްޕިއަންޝިޕް ކާމިޔާބުކޮށްދިނުމުގައި މުހިންމު ދައުރެއް އަދާކޮށްދިން އެއް ކުޅުންތެރިއެއް ކަމަށްވާ ސޮބާހު މުހައްމަދު ދެއްކި ވާހަކައިގައި އެފްއޭއެމްގެ ހިންގުންތެރިކަމަށް މެދުވަނީ ސުވާލު އުފައްދާފައެވެ.

މި ބައްދަލުވުމުގައި އިސްކޮށް ހަރަކާތެރިވީ ގައުމީ ޓީމުގެ ކުރީގެ ކުޅުންތެރިޔާ އަބްދުލް ވާހިދުގެ އިތުރުން ގައުމީ ޓީމުގެ ކުރީގެ މެނޭޖަރު ސަލްސާ އާމިރު އާއި އެފްއޭއެމްގެ ކުރީގެ ޖެނެރަލް ސެކްރެޓަރީން، ހާމިދު އަބްދުލް ގަފޫރު ޢަދި ހުސައިން ރަޝީދު އެވެ.

ރޭގެ ބައްދަލުވުމުގައި ވާހަކަދައްކަމުން ސޭވް އެފްއޭއެމް ކެމްޕޭން ލީޑް ކުރައްވާ ސަލްސާ އާމިރު ވިދާޅުވީ އޭނާ ފުޓްބޯޅަ ރިފޯމް ކުރަން "ސޭވް އެފްއޭއެމް" ކެމްޕޭނުގައި ބައިވެރިވެ މި ނުކުންނެވީ، ފުޓްބޯޅައިގެ އިސް ހިދުމަތްތެރިންތަކެއް އޭނާ ގާތު އެކަމުގައި ކުރިއަށް ނުކުންނަވަން އެދިވަޑައިގަތުމުން ކަމަށެވެ.

މިބައްދަލުވުމުގައި ވާހަކަ ދައްކަމުން ކުޅިވަރު ނޫސްވެރިޔާ އަޒްމީން ވިދާޅުވީ ފުޓްބޯޅަ އަށް ހެޔޮ ބަދަލު ގެނައުމުގައި މީޑިއާތަކާއި ކުޅިވަރު ނޫސްވެރިން މިހާރަށް ވުރެ ފުޅާކޮށް މަސައްކަތް ކުރަންޖެހޭކަމަށާއި ފުޓްބޯޅަ އެކޭ އެއްފަދައިން ނޫސްވެރިކަން ވެސް އޮތީ ވަރަށް ހާލުގައި ކަމަށެވެ. އަޒުމީންގެ އިތުރުން ކުރީގެ ފުޓްބޯޅަ ކޮމަންޓޭޓަރު އަދި ނޫސްވެރިޔާ އިމާދް ލަތީފް ވެސް ވަނީ ރޭގެ ބައްދަލުވުމުގައި ވާހަކަދައްކަމުން އެފްއޭއެމްގެ ލީޑާޝިޕް ބަދަލުކުރަން ޖެހޭ ކަމަށާއި ފުޓްބޯޅަ ކުރިން އޮތް ހާލަތަށް އަބުރާ ގެންދެވޭނީ ކުލަބުތަކާއި ނޫސްވެރިން ދައުރު މިހާރަށްވުރެ ބޮޑުވެގެން ކަމަށެވެ.

ރޭގެ މިބައްދަލުވުމުގައި ރާއްޖޭގެ ފުޓްބޯޅަ ލެޖެންޑް އަންދަރްސަވާ އިބްރާހިމް ރަޝީދު (އަންދަރޭ) ގެ އިތުރުން ގައުމީ ޓީމުގެ ކުރީގެ މެނޭޖަރު މުހައްމަދު ހާނިމް ވެސް ވަނީ ވައިވެރިވެފައެވެ.