ށ. ފީވައް، ށ. ފޭދޫ އަދި ށ. ފޯކައިދޫގައި ފަތާ ސަރަހައްދެއް ޤާއިމްކުރުމުގެ މަޝްރޫޢު ސަރުކާރުން މިއަދު އެމްޓީސީސީއާއި ހަވާލުކޮށްފިއެވެ.

މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައ،ި އެމްޓީސީސީގެ ފަރާތުން ޗީފް އޮޕަރޭޓިންގ އޮފިސަރ އަލްފާޟިލް ޝާހިދު ހުސައިން މޫސާ ސޮއިކުރެއްވިއިރު މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ ޑިރެކްޓަރ ޖެނެރަލް އަލްފާޟިލާ ފާތުމަތު ޝާނާ ފާރޫޤެވެ.

މިކަމާއި ގުޅިގެން އެމްޓީސީސީއިން ނެރެފައިވާ ބަޔާނުގައި ބުނެފައިވަނީ ށ އަތޮޅުގެ ފީވައް، ފޭދޫ އަދި ފޯކައިދޫއަކީ ފަޅުކުޑަކަމުން މޫދަށް އާންމުކޮށް އެރޭ ސަރަހައްދުތަކުގައި އޮއެ ގަދަ ރަށްތަކެއް ކަމަށާއި މިކަން ވަކިން ބޮޑަށް ހުޅަނގު ނަކަތްތަކުގައި މޫސުން ގޯސްވާއިރު ފާހަގަކުރެވޭ ކަމަށެވެ.

އެހެންކަމުން، މިއަދު ސޮއިކުރެވިގެން ދިޔަ މަޝްރޫޢުއާއިއެކު މި ތިން ރަށުގައި އަމާން ހިތްގައިމު ފަތާ ސަރަހައްދެއް މުސްތަޤުބަލުގައި ޤާއިމްވެގެން ދިޔުމަކީ މި ތިން ރަށުގެ ރައްޔިތުންނަށް ވަރަށް ބޮޑު އުފަލަކާއި ހިތްހަމަޖެހުމެއް ލިބިގެންދާނެ ކަމެއްގެ ގޮތުގައި އެމްޓީސީސީއިން ދެކޭ ކަމަށް އެ ކުންފުނިން ވަނީ ބުނެފައެވެ.

މި މަޝްރޫޢުގެ ދަށުން ކުރެވިގެންދާ މަސައްކަތްތައް:

-ށ. ފީވަކުގައި 2,500 އަކަމީޓަރުގެ ފަތާ ސަރަހައްދެއް (25x100) ޤާއިމްކުރުމަށް 97 މީޓަރުގެ ބޭރު ތޮއްޓެއް ލުމާއި 50 މީޓަރުގެ ގްރޮއިންސް ޖެހުމުގެ މަސައްކަތް.

-ށ. ފޭދޫގައި 1,620 އަކަމީޓަރުގެ ފަތާ ސަރަހައްދެއް (30x54) ޤާއިމްކުރުމަށް 62 މީޓަރުގެ ބޭރު ތޮއްޓެއް ލުމާއި 50 މީޓަރުގެ ގްރޮއިންސްޖެހުމުގެ މަސައްކަތް.

-ށ. ފޯކައިދޫގައި 2,100 އަކަމީޓަރުގެ ފަތާ ސަރަހައްދެއް (30x70) ޤާއިމްކުރުމަށް 101.56 މީޓަރުގެ ބޭރު ތޮއްޓެއް ލުމާއި 40 މީޓަރުގެ ގްރޮއިންސްޖެހުމުގެ މަސައްކަތް.

މި މަޝްރޫޢަކީ 16.61 މިލިއަން ރުފިޔާއަށް 210 ދުވަސް ތެރޭ ނިންމުމަށް އެމްޓީސީސީއާއި ހަވާލުކޮށްފައިވާ މަޝްރޫޢުއެކެވެ.