ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ރިޔާސީ ކެމްޕޭނު 16 އަތޮޅެއްގައި ފަށާފައިވާކަން ޕީޕީއެމުން ހާމަކޮށްފި އެވެ. 

ރައީސް ޔާމިނުގެ ކެމްޕޭނާއި ގުޅޭގޮތުން ޕީޕީއެމުން ބުނީ އާދިއްތަ ދުވަހު މ، ފ، ދ، ތ އަދި ލ ގައި ރައީސް ޔާމީނުގެ ކެމްޕޭނު ފަށާފައިވާ ކަމަށެވެ. އަދި އެ ކެމްޕޭނުތައް ފަށާފައިވަނީ އެ ކަމަަށްޓަކައި ބޭއްވި ޚާއްސަ ޖަލްސާއެއްގަ އެވެ. 

ރައީސް ޔާމިނުގެ ކެމްޕޭނު ނިމުނު ހަފްތާގައި ރަސްމީކޮށް ފަށާފައިވާއިރު މާލޭގެ އިތުރުން ހއ، ހދ، ށ އަދި ކުޅުދުއްފުށީ ސިޓީގައި ވެސް ވަނީ ކެމްޕޭނު ހަރަކާތްތައް ރަސްމީކޮށް ފަށާފައެވެ. 

އިދިކޮޅު ކޯލިޝަންގެ ތަރުޖަމާނު ހީނާ ވަލީދު ވިދާޅުވީ މިހާތަނަށް މާލޭގެ އިތުރުން ޖުމްލަ 16 އަތޮޅެއްގައި ރައީސް ޔާމިނުގެ ކެމްޕޭނު ރަސްމީކޮށް ފަށާފައިވާ ކަމަށެވެ. 

ޕީޕީއެމުން ބުނީ މިފަހަރުގެ ރިޔާސީ އިންތިޚާބުގައި ރައީސް ޔާމިނުގެ ކެމްޕޭނު ކުރިއަށް ގެންދިއުމަށް ނިންމާފައިވަނީ ވަރަށް ބޮޑަށް އަތޮޅުތަކުގައި ތިބި ފަރާތްތަކަށް ގިނަ ބާރުތަކެއް ދޫކޮށްލައިގެން ލާމަރުކަޒީކޮށް ކަމަށެވެ.

އެފަދައިން ކެމްޕޭނު ހަރަކާތްތައް ކުރިއަށް ގެންދިއުމަށް ދާއިރާގެ ކޮންމެ ދާއިރާއަކުން ރައީސުންނާއި، ޒުވާނުންގެ ރައީސް އަދި އަންހެނުންގެ ރައީސްއެއް ވަނީ އިންތިޚާބިކޮށްފަ އެވެ. 

ރައީސް ޔާމިނުގެ ކެމްޕޭނު ހަރަކާތްތައް ފެށުމަށް މާލޭގައި ވަނީ ދޮރުން ދޮރަށް ހަރަކާތެއް ވެސް ކުރިއަށް ގެންގޮސްފަ އެވެ. 

ރައީސް ޔާމިނުގެ ކެމްޕޭނު ރަސްމީކޮށް ފަށައިގެން ކުރިއަށް ގެންދާއިރު، އެމަނިކުފާނަށް އަމަލީގޮތުން ކެމްޕޭނުގައި ބައިވެރިވުމުގެ ފުރުސަތު ލިބިވަޑައި ނުގަތުމަކީ ވަރަށް ބޮޑު ފަޅުކަމެއްގެ ގޮތުގައި އެމަނިކުފާނުގެ ކެމްޕޭނު މެނޭޖަރު ކެޕްޓަން މުޙައްމަދު އަމީނު ވަނީ ސިފަކުރައްވާފަ އެވެ. 

މިވަގުތު އެމަނިކުފާނުގެ މައްޗަށް ކޮށްފައިވާ ޖަލު ހުކުމެއް ތަންފީޒުކުރައްވަމުން ގެންދެވި ނަމަވެސް، ހައިކޯޓު މަރުހަލާއިން ރައީސް ޔާމީން މިނިވަންވެވަޑައިގަންނަވާނެ ކަމުގެ ފުރިހަމަ ޔަގީންކަން އޮތްކަމަށް ކެޕްޓަން އަމީނު ވަނީ ވިދާޅުވެފަ އެވެ. 

އަދި ރައީސް ޔާމީން މިނިވަންވެ ވަޑައިގެތް ކެމްޕޭނު ހަރަކާތްތަކާއި ގުޅިވަޑައިގަންނަވަން ދެން މަޑުނުކުރައްވާ އަތޮޅުތެރޭގައި ވެސް ކެމްޕޭނު ހަރަކާތްތައް ދުރާލާ ފަށައިގެން ކުރިއަށް ގެންދެވުމަށް ރައީސް ޔާމީނުގެ ކެމްޕޭނު މެނޭޖަރު ވަނީ އެދިވަޑައިގެންފަ އެވެ.