ދިވެހިރާއްޖޭގެ ކޯޓުތަކުގެ ގިނަ ފަނޑިޔާރުން ތިއްބެވީ، ނުހައްގުން އެބޭފުޅުންގެ ސުލޫކީ މައްސަލައެއްގެ ބަލައި ފިޔަވަޅު އަޅާނެކަމަށް، އެކަމާއި ބިރުން ކަމަށް، ގާނޫނީ ވަކީލު އަދި ކެންދޫ ދާއިރާގެ މެންބަރު ޢަލީ ހުސައިން ވިދާޅުވެއްޖެއެވެ.
އިއްޔެ ށ. ނޫމަރާގައި ބޭއްވުނު ކެންޕެއިން ޖަލްސާގައި ވާހަކަފުޅު ދައްކަވަމުން، ދިވެހިރާއްޖޭގެ ކޯޓުތަކުގެ ފަނޑިޔާރުންނަށް މިނިވަން ކަމާއި އެކު ހުކުމް ކުރުމުގެ ބާރު މިހާރު އޮންނާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވުމާއި ގުޅިގެން އެކަމަށް ރައްދު ދެއްވައި ޢަލީ ހުސައިން ކުރެއްވި ޓްވީޓެއްގައި ވިދާޅުވީ، 2018 ވަނަ އަހަރު ވެރިކަމަށް ވަޑައިގެންނެވީ ޖޭއެސްސީ އިސްލާހު ކުރާނެ ކަމަށް ވައުދުވެވަޑައިގެންފައި ކަމަށެވެ. ނަމަވެސް އެކަން އަދިވެސް ނުކުރައްވާ ކަމަށް ޢަލީ ވިދާޅުވި އެވެ.
މިއާއެކު ޢަލީ ވިދާޅުވީ ރާއްޖޭގެ މުޅި ޖުޑީޝަރީ އޮތީ ރައީސުލްޖުމްހޫރިއްޔާގެ ކޮންޓްރޯލުގެ ދަށުގައި ކަމަށެވެ.
"ގިނަ ފަނޑިޔާރުން ތިބީ ނުހައްގުން ސުލޫކީ ވެދާނެތީ ބިރުން." އަލީ ވިދާޅުވިއެވެ.
ޖުޑީޝަލް ސާވިސް ކޮމިޝަން އެކުލެވިގެންވާ ގޮތް ބަދަލުކޮށް، އެތަނަކީ ސިޔާސީ ނުފޫޒުން އެއްކިބާ ވެފައިވާ ތަނަކަށް ހެދުމަކީ ރައީސް ޞާލިހުގެ ރިޔާސީ ވައުދެކެވެ. ނަމަވެސް، އެމަނިކުފާނުގެ މި ދައުރު ނިމިގެން ދިޔައިރުވެސް އެކަން ނުކުރައްވާތީ، މަޖިލީހުގެ މަހިބަދޫ ދާއިރާގެ މެންބަރު އަހުމަދު ޠާރިގުވެސް ވަނީ ދެތިން ފަހަރެއްގެ މަތިން ޖޭއެސްސީ އިސްލާހު ކުރުމަށް މަޖިލީހަށް މައްސަލަ ހުށަހަޅުއްވާފައެވެ. ނަމަވެސް އެމްޑީޕީ މެޖޯރިޓީ އޮންނަ މަޖިލީހުން އެ މައްސަލަ ބޭރު ކޮށްލުމަށްފަހު މަޖިލިސް ޗުއްޓީއަށް ދިޔުމުގެ ކުރިން ސަރުކާރުން މަޖިލީހަށް ވަނީ ޖޭއެސްސީ އިސްލާހު ކުރާ ބިލް ހުށަހަޅާފައެވެ. އެ ބިލުގައި އަދިވެސް ޖޭއެސްސީ އިން ސިޔާސީ ހުރިހާ ފަރާތްތަކެއް އުނިކުރަން ސަރުކާރުން ނިންމާފައެއް ނުވެއެވެ.
މީގެ އިތުރުން ގިނަ ފަނޑިޔާރުން ތިބީ ނުހައްގުން ސުލޫކީ ވެދާނެތީ ބިރުން ކަމަށް އަލީ ހުސެއިން ވިދާޅުވިއިރު ޖޭއެސްސީ އިން ވަކި ފަނޑިޔާރުންތަކެއްގެ ސުލޫކީ މައްސަލަތައް ބަލައި، އަނެއްބައި ފަނޑިޔާރުންގެ މައްސަލަތައް ސާބިތުވި ނަމަވެސް މައްސަލަ ނުބަލައި ލަސްކުރާ ކަމުގެ ތުހުމަތުތައް ތަކުރާރުކޮށް އަންނަނީ ކުރެވެމުންނެވެ.
Advertisement
This content is created and paid for by advertisers and does not involve Voice Journalists
