ދިވެހިރާއްޖެގެ އަންނަން އޮތް ޖީލަށް ރާއްޖެ ރައްދުކޮށްދިނުމަށް ކުރަންޖެހޭ ކަންކަން މިސަރުކާރަށް ވަނީ ނުކުރެވިފައި ކަމަށް ރާއްޖެގެ ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވީ ރޭ ދަ ޑިމޮކްރެޓްސްގެ ހަރުގެ ހުޅުވުމަށް ބޭއްވުނު ޖަލްސާގައި ވާހަކަދައްކަވަމުންނެވެ.
ރޭގެ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ރައްޖޭގެ ރައްޔިތުނަށް އެންމެ ބޭނުން ޖެހިފައިވާ ކިތަންމެކަމެއް ޑިމޮކްރެޓްސްއިން ފާހަގަކޮށްދޭނެ ކަމަށެވެ. އަދި އެކަންކަމުގެ ހައްލު، އަދި އެކަންކަން ރަނގަޅުކުރުމަށް ކުރަންވީ ކަންކަން އެޕާޓީގެ ފަރާތުން ކިޔައިދޭނެ ކަމަށް ނަޝީދު ވިދާޅުވިއެވެ.
އެގޮތުން މާލީ ކަންކަމާއި، ދިވެހި ދައުލަތުގެ ދަރަންޏާއި އެދަރަނި އަދާކުރާނެ ގޮތް، ޓެކްސް ބޮޑު ވަމުންދާ މިންވަރު، ޓެކްސް ކުޑަކުރެވޭނެ ގޮތް، ޖީއެސްޓީ ބޮޑުވަމުންދާ މިންވަރުގެ ސަބަބުން ތަކެތީގެ އަގު އުފުލެމުންދާ މިންވަރު، އިންފްލޭޝަން ރޭޓު ހުރި މަތިމިންވަރު، ޒުވާނުންގެ ވަޒީފާގެ ފުރުސަތުތައް މަދުކަން، ޒުވާނުންގެ ތެރެއިން 40 ޕަސެންޓް ޒުވާނުންނަކީ ވަޒީފާއެއް އަދާ ކުރުމުގެ ފުރުސަތު ނެތް ޒުވާނުންކަން އެމަނިކުފާނުގެ ވާހަކަފުޅުގައި ފާހަގަ ކުރެއްވެވިއެވެ.
ރައީސް ނަޝީދު ވިދާޅުވީ އެމްޑީޕީއިން ވަކިވެވަޑައިގަތީ ޕާޓީގެ ސިޔާސަތުތަކާއި، ރައްޔިތުންނަށް ވީ ވަޢުދުތަކާއި ނުފުއްދާ އެހެން ކަންތައްތަކެއްގެ ތެރޭގައި ސަރުކާރު އުޅެން ފެށުމުން ކަމަށެވެ. އަދި އެކަންކަން ވެގެންދިޔައީ ބިރުން ފިއްކަނޑައިގެން ދާވަރުގެ ވައްކަމާއި ޚިޔާނަތުގެ ކަންކަމަށެވެ.
އެމަނިކުފާނު އިތުރަސް ވިދާޅުވީ ދައުލަތުގެ ލޯލާރިއެއްގައިވެސް އެމަނިކުފާނު ޖެހިވަޑައިގެންފައި ނުވާނެ ކަމަށެވެ.
ރޭ ދަ ޑިމޮކްރެޓްސްގެ ޖަގަހަ ހުޅުވުމަށް ބޭއްވި ޖަލްސާގައި ރައީސް ނަޝީދު ބައިވެރިވެވަޑައިގެންފައިވާއިރު އެމަނިކުފާނުވަނީ އެ ޕާތީ އުފެއްދުމަށް ބޭއްވުނު ޖަލްސާގައިވެސް ބައިވެރިވެވަޑައިގެންފައެވެ. ނަމަވެސް އެމަނިކުފާނު އަދި އެޕަޓީ އަށް ސޮއި ކުރައްވައިފައެއް ނުވެއެވެ.
Advertisement
This content is created and paid for by advertisers and does not involve Voice Journalists
